Read Mandeali रोमियो 4 Bible Online

रोमियो 4 - Mandeali bible

रोमियो 4

¹ता फेरी आस्सा जो यहूदी लोक हूंणे रे नाते आपणे बापदादे अब्राहमा रे बारे मन्झ क्या बोलणा चहिए? केस वजहा ले परमेसरे से आपणी नजरा मन्झ धर्मी माह्णुं बणाया?

²क्यूंकि अगर अब्राहम खरे कामा रे ज्रीए परमेसरा री नजरा मन्झ धर्मी माह्णुं बणी जान्दा, ता तेजो बडयाई करणे री वजहा हुन्दी पर से परमेसरा रे साम्हणें आपणे खरे कामा पर बडयाई नी सकदा।

³क्यूंकि पवित्र सास्त्रा मन्झ लिखिरा कि “अब्राहमे परमेसरा रे वादे पर विस्वास कितेया, इधी कठे परमेसरे से आपणी नजरा मन्झ धर्मी माह्णुं बणाया।”

⁴काम करणे वाले री मजदूरी देणा दान नी ई, पर तेसरा हक्क समझ्या जाहाँ।

⁵पर लोक आपणे खरे कामा री वजहा ले नी पर पापी लोका जो आपणी नजरा मन्झ धर्मी बनाणे वाले परमेसरा पर विस्वास करणे रे ज्रीए धर्मी माह्णुं बणा।

⁶तिहां ही राजा दाऊद बोला कि परमेसरे तिन्हा लोका जो किहाँ आसीस दितिरी, जिन्हा लोका जो बगैर खरे कामा ले ही तिन्हें आपणी नजरा मन्झ धर्मी माह्णुं बणाया।

⁷जिहां जे पवित्र सास्त्रा मन्झ लिखिरा, “धन्य ऐं स्यों, जिन्हारे अधर्मा माफ हुए, होर जिन्हारे पाप भुलाई दिते।

⁸धन्य आ से माह्णुं जेसरे पाप परमेसर नी गिणदा।”

⁹ता ये धन्य वचन, क्या खतना कितिरे वाले रे कठे ही आ, या बगैर खतना कितिरे वाले रे कठे भी आ? जिहां पवित्र सास्त्रा मन्झ लिखिरा आस्से से ही बोले कि, “अब्राहमे परमेसरा रे दितिरे वादे पर विस्वास कितेया होर इधी कठे परमेसरे से आपणी नजरा मन्झ धर्मी माह्णुं बणाया।”

¹⁰ये सब कुछ केस टैमा हुआ? खतना हूंणे रे पैहले या खतना हूंणे रे बाद? ये खतने करणे रे बाद नी पर खतना हूंणे रे पैहले ही हुआ।

¹¹परमेसरे पैहले ही अब्राहमा जो आपणी नजरा मन्झ धर्मी माह्णुं बणाई किन्हें तेजो अपनाई लितिरा था, जेबे हाल्ले तेसरा खतना नी हुआ था। खतने री न्साणी परमेसरा रे ज्रीए अपनाई जाणे रा न्साणी। इधी कठे अब्राहम तिन्हा लोका रा आत्मिक बापदादे आ जिन्हा लोका रा खतना नी हुआ पर स्यों परमेसरा पर विस्वास करहे। स्यों लोक आपणे विस्वासा रे ज्रीए परमेसरा री नजरा मन्झ धर्मी माह्णुं बणे।

¹²होर अब्राहम तिन्हा खतना कितिरे वाले रा भी आत्मिक बापदादा आ, पर तेबे ही जेबे स्यों अब्राहम साहीं परमेसरा पर विस्वास करहे जिहां अब्राहमे भी आपणे खतना हूंणे ले पैहले परमेसरा पर विस्वास करहा था।

¹³परमेसरे अब्राहमा किन्हें ये वादा कितेया कि तेस होर तेसरा बंस संसारा रे वारस हूंणां, पर तिन्हें ये वादा इधी कठे नी कितेया कि अब्राहम मूसा री व्यवस्था रा पालन करेया करहा था, बल्की से इधी कठे हुआ क्यूंकि अब्राहम परमेसरा पर विस्वास करहा होर परमेसरे से आपणी नजरा मन्झ धर्मी माह्णुं बणाया।

¹⁴अगर अब्राहम होर तेसरे बंस किन्हें ये वादा इधी कठे बान्हेया क्यूंकि स्यों व्यवस्था जो मनणे वाल़े थे, ता विस्वासा री कोई जरूरत नी, होर वादे रा कोई मतलब नी रेहन्दा।

¹⁵जो व्यवस्था जो पूरी तरहा नी मनदा परमेसर तिन्हो सजा देआ, होर जेथी व्यवस्था नी ईं तेथी तेता री टाल मटोल भी नी हाई।

¹⁶एस वजहा ले वादा परमेसरा पर विस्वास करणे ले मिल्हा ई, जो अनुग्रहा रे मताबक हो। ये वादा अब्राहमा रे सभी बंसा जो मिली सका, ना कि सिर्फ तिन्हारे कठे जो लोक व्यवस्था जो मन्ने, पर तिन्हा लोका रे कठे भी आ, जो अब्राहमा साहीं परमेसरा पर विस्वास करहा ऐं; क्यूंकि अब्राहम ई आस्सा सभी विस्वासी लोका रा बापदादा आ।

¹⁷जिहां पवित्र सास्त्रा मन्झ लिखिरा कि, “मैं तू बौह्त जातिया रा बापदादे नियुक्त कितिरा।” अब्राहम परमेसरा री नजरा मन्झ आस्सा रा बापदादा आ, जिन्हें परमेसरा पर विस्वास कितेया कि से मरिरे या जो जिउंदा करहा, होर तिन्हा चीजा जो, जो बिलकुल नी हाई; तिन्हा चीजा जो हुक्म देआ कि स्यों हुई जाओ।

¹⁸परमेसरे अब्राहमा किन्हें वादा कितेया कि, “तेस कई जातिया रा बापदादे हूंणां।” हलांकि सारी गल्ला ये जाहिर करी थी कि से कई लोका रा बापदादे नी बणी सकदा, फेरी भी तिन्हें दुआसी मन्झ आस रखी किन्हें विस्वास करदा रैहया।

¹⁹होर अब्राहम एक सौ साला रा था, होर से ये जाणदे हुए कि तेसरा सरीर सौ साला री उम्रा मन्झ बूढा हुई चुकिरा था होर सारा बांझ थी, से आपणे विस्वासा मन्झ कमजोर नी हुआ।

²⁰होर तिन्हें आपणे विस्वासा री वजहा ले परमेसरा रे वादा पर सक नी कितेया, पर विस्वासा मन्झ मजबूत हुई किन्हें परमेसरा री महिमा किती।

²¹होर पक्का जाणा था कि, जेस गल्ला रा वादा जो परमेसरे कितिरा था, से तेस जो पूरा करणे रे कठे सामर्थी आ।

²²एस विस्वासा री वजहा ले परमेसरे से आपणी नजरा मन्झ धर्मी माह्णुं बणाया।

²³होर पवित्र सास्त्रा रा ये बचन कि, “परमेसरे से आपणी नजरा मन्झ धर्मी माह्णुं बणाया,” ये सिर्फ तेसरे कठे नी लिखिरा।

²⁴अगर आस्से परमेसरा पर विस्वास करघे, ये गल आस्से रे कठे बी ई। जेस परमेसरे प्रभु यीसू जो मरिरे मन्झा ले जिउंदा कितेया तेस पक्का आस्से आपणी नजरा मन्झ धर्मी माह्णुं बनाणे।

²⁵मसीह यीसू आस्सा रे पापा रे कठे पकड़वाया होर मारेया गया, होर परमेसरे से दबारा जिउंदा भी कितेया, ताकि आस्से परमेसरा री नजरा मन्झ धर्मी माह्णुं बणी सके।