Read Mandeali रोमियो 6 Bible Online

रोमियो 6 - Mandeali bible

रोमियो 6

¹परमेसरे आपणे अनुग्रह ले आस्सा रे पापा जो माफ करहा, पर एता रा मतलब ये नी कि आस्से पाप करदे रहिए कि, परमेसर आस्सा पर होर भी अनुग्रह करदा रहे।

²नी आस्सो कधी एह्ड़ा नी करणा चहिए! जेबे आस्से पापा रे कठे मरी गये ता फेरी बार-बार आस्सो पाप नी करणा चहिए।

³आस्से जाणांहे कि आस्से जितने भी मसीह यीसू साउगी एक हूंणे रे कठे बपतिस्मा लया, ये एह्ड़ा था जिहां आस्से मसीह साउगी मरे।

⁴इधी कठे जेबे आस्से बपतिस्मा लितेया ये एह्ड़ा था कि आस्से मसीह साउगी मरी गये होर गडी दिते। जिहां बापू परमेसरे आपणी महिमा रे ज्रीए यीसू मसीह जो मरिरे मन्झा ले जिउन्दा कितेया; तिहां ईं तिन्हें आस्से एस लायक बणाए कि आस्से भी नौंईं जिन्दगी जीए।

⁵क्यूंकि अगर आस्से बपतिस्मे रे ज्रीए तेसरी मौता मन्झ एस तरीके किन्हें तेसरे साउगी एक हुई गये, ता पक्का तेसरे मरिरे मन्झा ले जी उठणा री समानता मन्झ भी आस्सा तेस साउगी एक हुई जाणे।

⁶क्यूंकि आस्से जाणहां ऐं कि आस्सा री पुराणी पाप भरा स्वभाव मसीह यीसू साउगी क्रूसा प्रयाल्हे चढ़ाई गई, होर पाप भरा सरीर बेकार हुई गया, होर आस्से अगे जो पापा रे गुलाम नी रहे।

⁷क्यूंकि जेबे आस्से मसीह यीसू साउगी मरी गये, ता पापा री कैदा ले छुटी गये।

⁸होर अगर आस्से मसीह साउगी मरी गये, ता आस्सा रा ये विस्वास आ कि, आस्सा तेस साउगी जीणा भी आ।

⁹क्यूंकि आस्से ये जाणहां ऐं कि, मसीह मरिरे मन्झा ले जिउंदे हुई किन्हें दबारा मरणे वाल़ा नी आ। तेस दबारा मौता री कैदा मन्झ नी आऊंणा।

¹⁰क्यूंकि मसीह जो पापा रे कठे एक ई बार मरी गया; पर ऐबे जो जिन्दगी से जिया करहा, से परमेसरा जो आदर देणे रे कठे जिया करहा।

¹¹एह्ड़ा ई तुस्से भी आपणे आपा जो पापा रे कठे ता मरिरा, पर मसीह यीसू रे ज्रीए परमेसरा रे आदरा रे कठे जिउंदा समझा।

¹²इधी कठे पापा री इच्छा जो आपणे सरीरा पर राज नी करणे देआ, एह्ड़ा नी हो कि तुस्से इन्हा पापा री इच्छा रे अधीन जीओ।

¹³होर आपणे सरीरा रे अंगा जो बुरी काम करणे रे कठे पाप जो ना सौंपा, पर आपणे आपा जो मरिरे मन्झा ले जिउंदा जाणी किन्हें आपणी जिन्दगी परमेसरा जो सौंपा। आपणे सरीरा रे अंगा जो धार्मिकता रे कामा रे कठे परमेसरा जो पूरी तरहा सौंपा।

¹⁴होर पापा तुस्सा पर राज नी करणा, क्यूंकि तुस्से मूसा री व्यवस्था रे अधीन नी पर परमेसरा रे अनुग्रहा रे अधीन जिउंदे।

¹⁵ता एता रा मतलब क्या हुआ? क्यूंकि आस्से मूसा री व्यवस्था रे अधीन नी, पर परमेसरा रे अनुग्रह रे अधीन ऐं, इधी कठे आस्सो कधी पाप नी करणा चहिए।

¹⁶तुस्से जाणांहे कि तुस्से आपणे आपा जो केसी रा गुलाम हूंणे रे कठे सौंपी देहां ऐं, तेबे से माह्णुं तुस्सा रा माल्क हुआ होर तुस्सा जो तेसरा हुक्म मनणा चहिए। तुस्से पापा रे गुलाम बणी सके, जो तुस्सा जो मौता री वखा जो लेई जां, एता रे बजाय तुस्से परमेसरा रे हुक्मा जो भी मन्हां ईं सका ऐं, जो तुस्सा जो धार्मिकता री जिन्दगी री वखा जो लेई जां।

¹⁷तुस्सा री पुराणी जिन्दगी मन्झ तुस्से पापा रे गुलाम थे, पर ऐबे तुस्से पुरे मना किन्हें मसीह रे बारे मन्झ तिन्हा उपदेसा जो मन्नदे लगिरे जो तुस्सा जो स्खाईरे थे। इधी कठे हांऊँ परमेसरा रा धन्यावाद करहा।

¹⁸होर जेबे परमेसरे तुस्सा जो पापा री कैदा ले अजाद करी दितिरा, इधी कठे ऐबे पाप रे गुलाम नी, पर धार्मिकता रे काम करणे रे कठे तुस्से परमेसरा रे गुलाम बणी गईरे।

¹⁹केसी रे गुलाम हूंणे रे उदाहरणा जो हांऊँ इधी कठे देई करहा कि आम आदमी भी बड़ी असानी किन्हें समझी सके, क्यूंकि तुस्से हाल्ले भी आत्मिक सच्चाई जो समझणे रे कठे नासमझ ऐं। जिहां तुस्सा री पुराणी जिन्दगी मन्झ तुस्सा रे सरीरा रे अंग बुरी इच्छा रे गुलाम थे होर तुस्से हर किस्मा रे असुद्ध काम करहा ऐं थे, तिहां ईं ऐबे तुस्से आपणे सरीरा रे अंगा जो धार्मिकता रे काम करणे रे कठे परमेसरा रे गुलाम बणाऊआ, ताकि तुस्से पवित्र जिन्दगी जी सको।

²⁰जेबे तुस्से पापा रे गुलाम थे, ता तुस्से धार्मिकता रे काम नी करी पांदे थे।

²¹तुस्से बुरे काम करहे थे पर ऐबे तुस्से तिन्हा बुरे कामा ले सर्मिन्दा ऐं। एह्ड़ी पाप करणे री अजादी ले तुस्सा जो क्या फायदा हुआ? एह्ड़ी पापा री गल्ला रा अंत मौत आ।

²²पर ऐबे पापा ले छुटकारा पाई किन्हें होर परमेसरा रे गुलाम बणी किन्हें तुस्से एह्ड़े काम करहे जो पवित्रता री वखा जो लेई जाहें, होर एह्ड़े कामा रा अंत अनंत जिन्दगी ई।

²³क्यूंकि पापा री मजदूरी ता मौत ई, पर जो दान परमेसर आस्सो देआ से अनंत जिन्दगी ई, से आस्सो प्रभु यीसू मसीह ले मिला।