Read Mandeali 1 कुरिन्थियो 10 Bible Online

1 कुरिन्थियो 10 - Mandeali bible

1 कुरिन्थियो 10

¹हे भाईयो होर बैहणो, हांऊँ चाहां कि तुस्से एस गल्ला जो याद रखा कि बौह्त पैहले आस्सा रे बापदादेया साउगी बियाबान जंगला मन्झ क्या हुईरा था। परमेसरे एक बादल भेजी किन्हें तिन्हारी अगुवाई किती, जो तिन्हारे आगे-आगे चला था। होर तिन्हों लाल समुद्रा रे पाणी ले बचाई किन्हें सुक्की धरती मन्झ लेई आया।

²होर मूसा रे साउगी चलने रे नाते तिन्हें सभीए बादला मन्झ होर समुद्रा मन्झ बपतिस्मा लितेया।

³होर तिन्हें सभीए से रोटी खाधी, जो तिन्हो स्वर्गा ले परमेसरे दिति।

⁴होर तिन्हें सभीए से ही पाणी पितेया जो परमेसरे तिन्हो चट्टाना ले दितेया, क्यूंकि जिन्हें तिन्हारे कठे पाणी दितेया से तिन्हा साउगी-साउगी चल्हा था; होर से चट्टान मसीह था।

⁵पर फेरी भी तिन्हा मन्झा ले ज्यादातर लोका ले परमेसर खुस नी था, इधी कठे स्यों बियाबान जंगला मन्झ मरी गये।

⁶ये सारी गल्ला आस्सा रे बापदादेया साउगी इधी कठे हुई की आस्सो चेतावनी मिले कि अगर आस्से भी तिन्हा साहीं बुराई करणे री इच्छा करघे, ता जो तिन्हा साउगी हुआ से आस्सा किन्हें भी हुई सक्हा।

⁷मूर्तिया री पूजा मत करहा, जिहां तिन्हा मन्झा ले बौह्त लोके कितेया, ये ठीक तिहां ही आ जेह्ड़ा पवित्र सास्त्रा मन्झ लिखिरा कि, “लोक धामा मन्झ खाणे -पीणे रे कठे बैठे, होर रंगरलिया मनाणे रे कठे उठे।”

⁸लज्जा वाल़ा कोई काम नी करहे; जेह्ड़ा की आस्सा रे बापदादेया मन्झ ले कई कितेया; होर एक ई ध्याड़े त्रेई हजार लोक मरी गये।

⁹प्रभु री परखणी मत करहा; जेह्ड़ा तिन्हा मन्झा ले बौह्त लोके कितेया, होर जैहरले सांपे स्यों डसे होर स्यों मरी गये।

¹⁰कूड़कूड़ाऊआ मत, जेह्ड़ा कि तिन्हा मन्झा ले बौह्त लोके कितेया, होर परमेसरे आपणे दूत भेजी किन्हें स्यों मारी दिते।

¹¹पर ये सभ गल्ला, जो आस्सा रे बापदादेया साउगी हुई से इधी कठे हुई कि ये सभी लोका रे कठे उदाहरण बणे, होर ये गल्ला आस्सा री चेतावनी रे कठे लिखी गईरी, जो संसारा रे आखरी टैमा मन्झ रैंहयां करहा ऐं।

¹²इधी कठे अगर कोई विस्वासी ये सोच्हा कि, से आपणे विस्वासा मन्झ मजबूत खड़ीरा, ता से चतन्न रहे कि से भी इन्हा पापा मन्झ नी पई जाए।

¹³तुस्से कोई एह्ड़ी परखणी मन्झ नी पईरे, जो माह्णुं रे सैहणे ले बाहर हो। परमेसर भरोसे रे लायक आ; क्यूंकि से तुस्सा जो एह्ड़ी परीक्सा मन्झ नी पऊणे देंदा, जेस्सा रा तुस्से साम्हणा नी करी सकदे, पर एता रे बजाय तेस तुस्सा जो सामर्थ देणी, जेता री तुस्सा जो जरूरत ई, ताकि तुस्से पापा ले बची सको।

¹⁴इधी कठे, हे लाडले भाईयो होर बैहणो, मूर्तिया री पूजा करणे ले आपणे आपा जो बचाई किन्हें रखा।

¹⁵हांऊँ तुस्सा जो बुद्धिमान समझी किन्हें ये गल्ला बोल्हा, इधी कठे इन्हा गल्ला रे गास सोच विचार करहा कि युयां गल्ला सही या गलत।

¹⁶प्रभु भोज मन्झ जेबे आस्से तेस डोंगें ले (अंगूरा रा रस) पीये, होर जेता रे कठे आस्से परमेसरा रा धन्यावाद दें, तेबे आस्से सच्चे मसीह रे खूना रे साझी बणे। इधी कठे, जेबे आस्से रोटी तोड़ी किन्हें खाएं, ता आस्से सच्चे मसीह रे सरीरा रे साझीदार बणे।

¹⁷इधी कठे कि, एक ई रोटी ई जो कि मसीह ई, होर हालांकि आस्से बौह्त सारे ऐं, आस्से एक सरीर बणी जाहें; क्यूंकि आस्से सभ तेस्सा एक रोटी मन्झ ले खाहें।

¹⁸तिन्हा इस्राएल देसा रे लोका रे बारे मन्झ सोचा, जो एक बेदी रे चारों तरफ कठ्ठा हुई किन्हें तेता पर बलि कितिरी चीजा मन्झ ले खाहें, एह्ड़ा करणे ले स्यों तेस बेदी री सेऊआ रे साझी बणी जाहें।

¹⁹मेरे बोलणे रा मतलब क्या आ? हांऊँ ये नी बोलदा लगिरा कि मूर्ति, या मूर्ति रे साम्हणें चढ़ाईरी बलि री कोई कीमत या वजूद नी आ।

²⁰पर हांऊँ ये बोली करहा कि स्यों लोक तिन्हा मूर्तिया रे कठे जिन्हा चीजा री बलि चढ़ाहें, स्यों परमेसरा रे कठे नी, पर दुस्टात्मा रे कठे चढ़ाहें, हांऊँ ये नी चाहन्दा कि तुस्से दुस्टात्मा रे साझी बणा।

²¹तुस्से प्रभु रे डोंगें होर प्रभु रे मेजा मन्झा ले जो प्रभु री मौता जो याद कुराहां, साझीदार हुंदे हुए, होर दुस्टात्मा रे डोंगें होर दुस्टात्मा री मेजा मन्झा साझीदार नी हुई सक्दे, जो दुस्टात्मा रे कठे चढ़ाई जाहीं।[8]

²²अगर आस्से एह्ड़ा करघे ता सच्चे आस्से प्रभु रे गुस्से जो भड़काहें। याद रखा कि आस्से परमेसरा ले ज्यादा सक्तिमान नी ऐं।

²³तुस्से बोल्हे कि आस्सा वाले सभ कुछ करणे री अजादी, हां पर सभ चीजा आस्सा रे फायदे रे कठे नी। आस्से सभ कुछ करणे रे कठे अजाद ऐे, पर सारी चीजे परमेसर पर विस्वासा करणे जो नी बढ़ादीं।

²⁴तुस्सा मन्झ ले हर एकी जो सिर्फ आपणे बारे मन्झ ई नी सोचणा चहिए, बल्की दूजे री भलाई रे कठे भी सोचणा चहिए।

²⁵तुस्सा जो एह्ड़ा करणा चहिए बजारा मन्झ जो भी मास बिक्हा, तेता जो खरीदी किन्हें खाई लो, ये मत पूछा कि ये मूर्ति रे साम्हणें बलि कितिरा, होर तेबे तुस्सा री अंतरात्मा तुस्से दुखी नी करणे।

²⁶“तुस्से एतो खाई सके, क्यूंकि पवित्र सास्त्रा मन्झ लिखिरा, धरती होर जो कुछ एता मन्झ आ; से सभ प्रभु रा आ।”

²⁷होर अगर कोई अविस्वासी लोका मन्झ ले तुस्सा जो सादा दे, होर अगर तुस्से जाणा चाहो, ता जो खाणा तुस्सा रे साम्हणें रखिरा एता रे बारे मन्झ ये नी पूछा कि ये खाणा बलि कितिरा या नी, ताकि अगर से बलि कितिरा हुन्घा, ता तेता रे खाणे री वजहा ले तुस्सा री अंतरात्मा तुस्सा जो दोसी नी बणाहें।

²⁸पर अगर कोई तुस्सा लोका जो ये बोले, “ये मूर्ति रे कठे बलि कितिरा प्रसाद आ,” ता तुस्से तेस जो मत खाऊआ, आपणी अंतरात्मा री वजहा ले नी, पर तेसरी अंतरात्मा री वजहा ले जिन्हें तुस्सा जो ये गल दसीरी।

²⁹हांऊँ तुस्सा री नी पर दूजे री अंतरात्मा रे बारे मन्झ गल करी करहा कि क्या फायदा अगर तुस्से आपणी खाणे री अजादी जो ज्यादा जोर दे, होर दूजे माह्णुं जो ये लगा कि से पाप आ? एता ले कोई फायदा नी आ।

³⁰अगर हांऊँ धन्यावाद देईं किन्हें हांऊँ मूर्ति रे साम्हणें बलि कितिरे खाणे जो खाई लेहां, ता तेता रे कठे मेरे पर किधियो दोस लगाया जाहाँ, जेसरे खाणे रे कठे मैं परमेसरा जो धन्यावाद दितिरा?

³¹होर एता रा जबाब ये आ कि चाहे तुस्से खाऊआ या पिऊआ, या चाहे जो कुछ करा, पर सभ कुछ परमेसरा री महिमा रे कठे करा।

³²हांऊँ जो कुछ भी करहा, तेता मन्झ सभी जो खुस रखणे री कोसिस करहा; हांऊँ आपणी भलाई नी सोचदा पर सभी री भलाई सोचा ताकि सब बची सको। इधी कठे तुस्से भी एस तरीके किन्हें जीया कि तुस्से यहूदी लोका रे कठे, या गैर-यहूदी लोका रे कठे, या परमेसरा री कलीसिया रे लोका रे कठे कोई भी परेसानी खड़ी नी करी सको, जेता ले स्यों मसीह पर विस्वास करणा छाडी दे।