Read Mandeali 1 कुरिन्थियो 11 Bible Online

1 कुरिन्थियो 11 - Mandeali bible

1 कुरिन्थियो 11

¹जिहां हांऊँ मसीह साहीं जिन्दगी जीहां, तिहां ईं तुस्से भी मेरे साहीं जिन्दगी जिया।

²हांऊँ तुस्सा जो सराहां, क्यूंकि तुस्से मुंजो सभ गल्ला मन्झ याद करहा ऐं; होर जो भी गल्ला मैं तुस्सा जो सखाईरी, तिन्हारा पालण बड़े चतन्न हुई किन्हें करेया करहा ऐं।

³पर एक गल ई जो हांऊँ चाहां कि तुस्से ये जाणी लो: कि हर एक मर्धा रा मूंड मसीह आ, होर एक लाड़ीया रा मूंड लाड़ा, होर मसीह रा मूंड परमेसर आ।

⁴इधी कठे कि माह्णुं मसीह री महिमा जो जाहिर करहा अगर से, लोका रे बीच मन्झ मूंड ढख्ही किन्हें प्रार्थना या भविस्यवाणी करहा, से मसीह री बेज्जती करहा, जो तेस्सा रा मूंड आ।

⁵पर जो ज्नाने लोका रे बीच मन्झ प्रार्थना या भविस्यवाणी करदे टैम बगैर मूंड ढख्ही किन्हें प्रार्थना या भविस्यवाणी करहा ई, ता से आपणे लाड़े री बेज्जती करहा ईं जो तेस्सा रा मूंड आ। ता एह्ड़ी जनाने होर तेस्सा जन्नानी मन्झ कोई फर्क नी आ कि जेस्सा जो बेज्जती कुराणे रे कठे मूंड मूंडाईं दे।

⁶अगर से ज्नानी मूंड नी ढखणा चाहीं, ता से आपणे बाल भी काटी दे; पर अगर ज्नाने रे कठे बाल कटाणा या मूंडाणां सरमा री गल ई, ता फेरी से प्रार्थना या भविस्यवाणी करदे टैम आपणा मूंड ढख्ही ले।

⁷मर्धा रे कठे आपणा मूंड ढक्णा ठीक नी आ, क्यूंकि से परमेसरा रे रूपा मन्झ बणाईरा होर तेसरी महिमा जो दसां, पर ज्नाने मर्धा री महिमा जो जाहिर करी।[9]

⁸क्यूंकि पैहला-मर्ध आदम ज्नाने ले नी आईरा, पर ज्नाने मर्धा ले आईरी।

⁹क्यूंकि परमेसरे पैहले-मर्धा जो ज्नाने री मददा रे कठे नी बणाईरा, पर ज्नाने जो मर्धा री मददा रे कठे बणाईरी।

¹⁰इधी कठे कि स्वर्गदूता देखी करहे, ज्नाने जो ये करणा ठीक आ कि, से आपणी अधीनता जो दस्दे हुए, आपणे मूंडा जो ढ्खही किन्हें रखे।

¹¹फेरी भी अगर आस्से विस्वासी लोका री गल करहे ता ज्नाने जो मर्धा री मदद चहिए, होर मर्धा जो ज्नाने री मदद चहिए।

¹²हालांकि परमेसरे पैहली-जन्नानी जो पैहले-मर्धा किन्हें रच्या, पर ऐबे ज्नाने ई जो मर्धा जो जणा ई; पर परमेसर ही आ जिन्हें सारी चीजा री रचना किती।

¹³हांऊँ चाहां कि तुस्से आप्हुए एस गल्ला रा फैसला करा, क्या ये ठीक आ की नी कि एक ज्नाने कलीसिया मन्झ लोका रे बीच मन्झ बगैर मूंड ढखी किन्हें परमेसरा ले प्रार्थना करही।

¹⁴प्रकृति आप्हुए तुस्सा जो सिखाहीं कि अगर कोई मर्ध आपणे बाल लम्बे रखे; ता तेसरे कठे ये सरमा री गल ई।

¹⁵पर प्रकृतिए ज्नाने जो लम्बे बाल ढकणे रे कठे दितिरे; ठीक तिहां ही ज्नानिया जो लोका रे बीचा मन्झ प्रार्थना करदी बारी तिन्हो आपणा सिर ढकणा चहिए।

¹⁶पर अगर केसी जो लगहा कि हांऊँ गलत बोली करहा, ता तुस्से ये जाणी ले कि ये गल्ला आस्सा री कलीसिया मन्झ होर बाकि परमेसरा री कलीसिया मन्झ एह्ड़ी ही मन्हां ईं जाहीं।

¹⁷जिन्हारे बारे मन्झ ऐबे हांऊँ तुस्सा किन्हें गल करदा लगिरा तिन्हारे बारे मन्झ हांऊँ तारीफ नी करी सकदा, क्यूंकि कलीसिया मन्झ कठ्ठा हूंणे ले तुस्सा री भलाई नी पर बुराई ही हुई।

¹⁸क्यूंकि सभी ले पैहली गल ता ये कि मैं ये सुणीरा कि, जेबे तुस्से कलीसिया मन्झ अराधना रे कठे कठ्ठा हुंहाँ ऐं, ता तुस्सा मन्झ फूट पईरी हुंहाँ ईं, होर हांऊँ विस्वास करहा जो गल्ला स्यों बोली करहे तिन्हा मन्झ ले कुछ-कुछ सही।

¹⁹तुस्सा जो क्या लगहा कि तुस्सा रे बीचा मन्झ जेबे बंटवारा हूणा, तेबे ही दूजे लोका जो पता लगणा कि कुण परमेसरा रे चुणिरे लोक ऐं? नी एह्ड़ा बिलकुल भी नी आ।

²⁰इधी कठे जेस तरीके किन्हें तुस्से प्रभु यीसू री मौता जो याद करणे रे कठे एक जगहा कठे हुंहाँ ऐं, ता तेस जो प्रभु भोज नी बोली सकदे।[10]

²¹क्यूंकि मुंजो पता लगिरा की तुस्सा मन्झ ले कई लोक दूजे साउगी बांडणे ले पैहले आपणा खाणा झटपट खाई लैहां ऐं, जेस वजहा ले कुछ लोक भूखे ही चली जाहें, होर कुछ मुताली जाहें।[11]

²²क्या खाणे-पीणे रे कठे तुस्सा रे घर-बार नी हाए? तुस्से परमेसरा री कलीसिया रा अनादर करेया करहा ऐं, होर गरीबा जो बेज्जत करी करहा ऐं। हांऊँ तुस्सा जो क्या दसुं? क्या हांऊँ तुस्सा री तारीफ करूं? एह्ड़ा करणे रे कठे मां तुस्सा री तारीफ नी करणी।

²³क्यूंकि जो गल्ला हांऊँ तुस्सा जो सखाई करहा, ये स्यों गल्ला ई जो प्रभुए ले मुंजो मिलिरी; कि प्रभु यीसू जेस राती से पकड़या गया तिन्हें रोटी लिती,

²⁴होर परमेसरा रा धन्यावाद करी किन्हें तोड़ी होर बोल्या कि, “ये मेरा सरीर आ; जो तुस्सा रे कठे देई दितिरा, होर मेरी यादगारा रे कठे एह्ड़ा ही करदे रैहया।”

²⁵होर जेबे स्यों रोटी खाई बैठे ता यीसूए अंगूरा रे रसा रा भरिरा डोंगा लितेया होर बोल्या, “ये डोंगा मेरे खूना मन्झ नौंईं वाचा ई, जेबे केभे पीओ, ता मेरी यादगारा रे कठे एह्ड़ा ही करदे रैहया।”

²⁶क्यूंकि जेबे भी तुस्से एस रोटीया मन्झ ले खाहें, होर एस डोंगें मन्झा ले पीहां ऐं, ता प्रभु री मौता जो जेबे तक से वापस नी आये, प्रचार करहा ऐं।

²⁷इधी कठे जो कोई मसीह जो बेज्जत करणे ले तरीके ले प्रभु री रोटी खाए, या तेसरे डोंगें मन्झा ले पीए, ता से प्रभु रे सरीर होर खूना रे खलाफ पाप करहा।

²⁸इधी कठे हर एक माह्णुं एस रोटी जो खाणे ले होर एस डोंगें मन्झ ले पीणे ले पैहले आपणे आपा जो परखी ले।

²⁹क्यूंकि जो रोटी जो खाणे होर डोंगें मन्झ ले पीणे रे टैम मसीह रे सरीरा री इज्जत नी करहे,[12] से एस तरहा खाई पी किन्हें आपणे गास सजा जो बुलावा देहां।

³⁰एस वजहा ले तुस्सा मन्झा ले बौह्त सारे लोक आपणे सरीरा मन्झ कमजोर ऐं होर ब्मार ऐं, होर कई ता मरी भी गये क्यूंकि ये परमेसरा री सजा ई।

³¹अगर सभी ले पैहले आस्से आपणे आपा जो परखी लैंघे, ता परमेसरा आस्सो सजा नी देणी।

³²पर अगर प्रभु आस्सा जो एस तरहा सजा देई करहा, ता से सिर्फ आस्सा जो सुधारी करहा; ताकि आस्सा जो संसारा रे लोका साउगी न्याय रे ध्याड़े सजा नी मिले।

³³इधी कठे, हे मेरे भाईयो होर बैहणो, जेबे तुस्से प्रभु भोज खाणे रे कठे कठ्ठा हुंहाँ ऐं, ता एक दूजे रे कठे रुकेया करा कि एक साउगी खाणा खाई सके।

³⁴अगर कोई भूखा हो, ता से आपणे घरा ई खाई ले, ताकि जेबे तुस्से कठे हो ता तुस्से सब कुछ खरे ढंगा किन्हें करहा, ताकि परमेसर तुस्सा जो सजा नी दे। होर बाकि गल्ला रे बारे मन्झ जो तुस्से लिखिरा था, स्यों मां तेथी आई किन्हें समझाई देणी।