Read Mandeali 1 कुरिन्थियो 12 Bible Online

1 कुरिन्थियो 12 - Mandeali bible

1 कुरिन्थियो 12

¹हे भाईयो होर बैहणो, तुस्से मेरे ले पवित्र आत्मा रे दितिरे बरदाना रे बारे मन्झ पूछीरा था, हांऊँ चाहां कि तुस्से इन्हा बरदाना रे बारे मन्झ खरी किन्हें जाणी लो।

²तुस्से जाणहां ऐं कि, परमेसरा पर विस्वास करणे ले पैहले तुस्से किहाँ जीहां ऐं थे। तुस्से भटकाई दितिरे थे कि तुस्से मरिरी मूर्तिया री पूजा करहा।

³इधी कठे हांऊँ चाहां की तुस्सा एस्सा गल्ला जो जाणी लो कि परमेसरा री दितिरी आत्मा रे ज्रीए कोई भी माह्णुं एह्ड़ा नी बोल्दा कि यीसू स्रापित आ, होर पवित्र आत्मा रे ज्रीए ही से ये बोली सक्हा कि “यीसू ही प्रभु आ।”

⁴होर ऐबे, कई किस्मा रे आत्मिक बरदान हुयें, पर इन्हा सभीरा देणे वाल़ा सिर्फ एक ही आ, होर से पवित्र आत्मा ई।

⁵होर लग-लग तरीके किन्हें आस्से प्रभु री सेऊआ करी सके, पर आस्से सभ एक ही प्रभु री सेऊआ करहे।

⁶होर परमेसर भी कई किस्मा किन्हें आस्सा री जिन्दगी मन्झ काम करहा, पर से एक ई परमेसर आ, जो आपणा काम आस्सा री जिन्दगी रे ज्रीए करहा।

⁷पर परमेसरे आस्सा सभी जो एक-दूजे विस्वासी भाई बैहणा री मददा रे कठे एह्ड़ा बरदान दितिरा, जो पवित्र आत्मा री उपस्थिति जो जाहिर करहा।

⁸क्यूंकि पवित्र आत्मा केसी एक माह्णुं जो बुद्धि री गल्ला बोलणे रा बरदान देईं; होर से ही आत्मा केसी दूजे माह्णुं जो ज्ञाना री गल्ला बोलणे रा बरदान देईं।

⁹होर से केसी एक माह्णुं जो मसीह पर गहरा विस्वास करणे रा बरदान देईं, होर ये ही आत्मा दूजे माह्णुं जो चंगा करणे रा बरदान देईं।

¹⁰पवित्र आत्मा केसी जो चमत्कार रे काम करणे री सामर्थ देईं; होर केसी जो भविस्यवाणी करणे रा बरदान देईं, होर केसी जो ये परखणे री समझ कि पवित्र आत्मा री तरफा ले होर दुस्ट आत्मा री तरफा ले मिलणे वाले बरदाना मन्झ क्या फर्क आ। होर केसी जो लग-लग भासा बोलणे रा बरदान देईं, जो तिन्हें कधी नी सिखिरी हो; होर कुछ लोका जो इन्हा भासा रा मतलब दसणे रा बरदान देईं।

¹¹पर ये सारे बरदान एक ही आत्मा रा काम आ, पवित्र आत्मा हर विस्वासी जो तेह्ड़ा बरदान देआ जेह्ड़ा चाहां।

¹²क्यूंकि जिहां माह्णुं रे सरीर रे बौह्त सारे अंग हुयें, होर बौह्त सारे अंग मिली किन्हें एक पूरा सरीर बणा, तिहां ही मसीह भी आ होर स्यों लोक भी, जो तेस पर विस्वास करहे।

¹³एस तरीके ले आस्से सभीए जो या ता यहूदी लोक ऐं, या गैर-यहूदी ऐं, या गुलाम ऐं, या अजाद ऐं, एक ई पवित्र आत्मा रे ज्रीए एक सरीर हूंणे रे कठे बपतिस्मा लितेया। आस्सा सभी जो एक ई आत्मा मिली, जिहां आस्से सभिये एक ऐं डोंगें ले पितिरा हो।

¹⁴आस्सा रे सरीरा मन्झ एक ई अंग नी आ, पर बौह्त सारे अंग ऐं।[13]

¹⁵सोचा, अगर पैर बोले कि, “हांऊँ हाथ नी आ, इधी कठे हांऊँ सरीरा रा अंग नी आ,” ता क्या हाथ रा एह्ड़ा बोलणे ले से सरीरा रा अंग नी आ?

¹⁶होर अगर कान बोले कि, “हांऊँ हाखी नी आ, इधी कठे हांऊँ सरीरा रा अंग नी आ,” ता क्या कान रा एह्ड़ा बोलणे ले से सरीरा रा अंग नी आ?

¹⁷होर अगर सारा सरीर सिर्फ हाख ई हुन्दी ता केथी ले सुणना था? अगर सारा सरीर कान ई हुन्दा ता सिंघणा केथी ले था?

¹⁸पर परमेसरे आपणी इच्छा रे मताबक आस्सा रे सरीरा रे सभ अंगा जो एक-एक करी किन्हें ठीक जगहा मन्झ रखे।

¹⁹अगर सरीरा रे सारे अंग एक साहीं हुन्घे, ता सरीर ही नी हुन्दा।

²⁰इधी कठे, भले ही सरीर रे कई सारे अंग हुयें, पर सरीर एक ई आ।

²¹हाखी हाथा किन्हें नी बोली सक्दी कि, “मुंजो तेरी ज्रूरत नी हाई,” होर ना मूंड पैरा किन्हें बोली सक्हा कि, “मुंजो तुस्सा री ज्रूरत नी हाई।”

²²एता रे बिल्कुल परे, सरीरा रे जिन्हा अंगा जो आस्से कमजोर समझ्हा ऐं, स्यों बौह्त जरूरी ऐं।

²³होर सरीरा रे जिन्हा अंगा जो आस्से कम इज्जता रे लायक समझे, तिन्हा जो आस्से बौह्त ध्याना ले ढकी किन्हें रख्हा ऐं। ता तिन्हा अंगा जो, जिन्हों आस्से दूजेया जो नी दसी सकदे, इधी कठे आस्से तिन्हारा बौह्त ज्यादा ध्यान रखी किन्हें संभाला ऐं।

²⁴फेरी भी इज्जत रे लायक अंगा जो खास देखभाला री ज्रूरत नी ई, पर परमेसरे आस्सा रा सरीर एह्ड़ा बणाईरा, ताकि कम इज्जत वाले अंगा जो ज्यादा देखभाल होर इज्जत मिली सके।

²⁵परमेसरे ये इधी कठे कितेया कि सरीरा रे सारे अंग एक दूजे किन्हें मिली किन्हें रहे, होर सरीरा रे सारे अंग एक दूजे री देखभाल करहे।

²⁶होर अगर सरीरा रे एक अंग बीमार हुंहाँ, ता पुरे सरीरा मन्झ पीड़ा हुंहाँ ऐं, होर तिहां ही अगर सरीरा रे एकी अंगा रा लाज करहे, ता पूरा सरीर ठीक हुंहाँ होर खुसी बणा।

²⁷एस तरहा तुस्से सभ लोक मसीह रे सरीर ऐं, होर तुस्से सभ तेसरे सरीरा रे अंग भी ऐं।

²⁸होर मसीह रे एस सरीरा मन्झ जो की कलीसिया ई, परमेसरे लग-लग लोका जो लग-लग काम दितिरा। पैहले तिन्हें चुणिरा चेलेया जो नियुक्त कितेया, दूजा तिन्हें नबिया जो जेह्ड़े परमेसरा री खबरा जो सुणाहें; त्रीजे तिन्हा जो नियुक्त कितेया जो स्खायें। तेता ले बाद तिन्हा लोका जो, जेस जो तिन्हें चमत्कारा रे काम करणे रा हक दितेया। तेता ले बाद तिन्हें स्यों लोक नियुक्त किते, जिन्हा वाले चंगाई करणे रा हक आ, फेरी तिन्हा लोका जो जेह्ड़े दूजेया री मदद करी सके। फेरी तिन्हें स्यों लोक नियुक्त किते जो अगुवे, फेरी तिन्हा जो भी जो लग-लग भासा बोलणे वाले, जो तिन्हें कधी भी नी सिखिरी हो।

²⁹हर कोई चुणिरा चेला नी हुंदा। हर कोई नबी नी हुंदा। हर कोई स्खाणे वाले नी हुंदा। होर हर केसी वाले चमत्कारा रे काम करणे रा हक नी हुंदा।

³⁰हर केसी जो ब्मारा जो ठीक करणे रा बरदान नी मिलिरा। होर हर केसी जो लग-लग भासा बोलणे रा बरदान नी मिलिरा, जो तिन्हें कधी भी नी सिखिरी हो।

³¹हर केसी जो लग-लग भासा रा मतलब दसणे रा बरदान नी मिलिरा, जो तिन्हें कधी भी नी सिखिरी। इधी कठे पवित्र आत्मा ले बडे ले बडे बरदाना पाणे री इच्छा रखा! पर ऐबे मां तुस्सा जो दसणा की एता ले भी खरा क्या आ।