Read Mandeali 1 कुरिन्थियो 13 Bible Online

1 कुरिन्थियो 13 - Mandeali bible

1 कुरिन्थियो 13

¹अगर हांऊँ माह्णुंआं, होर स्वर्गदूता री भासा बोलूं, होर दूजे किन्हें प्यार नी करूं, ता मेरी गल्ला ठनठन करदा पीतल, होर झनझन करदी झांझ साहीं बेकार ईं।

²होर अगर हांऊँ भविस्यवाणी करी सकूं, होर सभ भेदा होर सभ किस्मा रे ज्ञाना जो समझी सकूं, होर एथी तक कि मेरा परमेसरा पर पूरा विस्वास हो कि, हांऊँ प्हाड़ा जो हटाई सकूं, पर दूजे किन्हें प्यार नी करूं, ता मेरी कोई भी कीमत नी।

³होर अगर हांऊँ आपणी सारी जायदाद गरीबा जो बांडी देऊँ, होर तिन्हो आपणा सरीर फुकणे रे कठे भी देई देऊँ, होर दूजे किन्हें प्यार नी करूं, ता एता ले मुंजो कोई फायदा नी आ।

⁴जो लोक प्यार करहे, स्यों सबर रखणे वाले, होर दया करणे वाले हुयें; स्यों लोक हिर्ख नी करदे, होर आपणे बारे मन्झ बडी-बडी गल्ला नी करदे बड़ाई नी करदा। होर स्यों बडयाई नी करदे।

⁵स्यों लोक केसी री बेज्जती नी करदे, स्यों आपणी ही खुसी रे बारे मन्झ नी सोचदे, स्यों जल्दी गुस्सा नी करदे, होर स्यों तिन्हा बुरी गल्ला जो याद नी रखदे, जो तिन्हारे बरखलाफ कितिरी हो।

⁶जेबे लोक बुरे कामा करहे ता स्यों खुस नी हुन्दे, पर स्यों तेबे खुस हुयें जेबे लोक सही काम करहे।

⁷स्यों लोक हमेसा सभ गल्ला जो सही लैहें, स्यों परमेसरा पर विस्वास करणा कधी नी छाडदे, स्यों हमेसा आस रखायें, जेबे तिन्हो परेसानिया होर कष्ट हुयें तेबे भी सबर रखे।

⁸भविस्यवाणिया होर होरी-होरी भासा मन्झ गल करणा होर सभी गल्ला रा खास ज्ञान, बेकार हुई जाणा, पर प्यार हमेसा बणी रैहणा।

⁹क्यूंकि आस्सा रा खास ज्ञान होर भविस्यवाणी करणे री सामर्थ दुहें अधूरी ई। पर जेबे तेस आऊंणा जो पूरा होर सिद्ध आ, तेबे जो अधुरा आ तेता री जरुरुत नी रैहणी।

¹¹ये एक माह्णुं रे बधणे साहीं आ। जेबे हांऊँ बच्चा था, ता हांऊँ बच्चे साहीं बोल्हा था, सोच्हा था, होर समझा था। पर जेबे हांऊँ बडा हुई गया, ता मैं बचपना छाडी दितेया।

¹²होर ये ही गल आस्सा विस्वासिया साउगी भी, क्यूंकि आस्से तेस माह्णुं साहीं ऐं, जो आपणी सकल धुंधले सीसे मन्झ देखी करहा, क्यूंकि ऐबे तक भी आस्से सारी गल्ला जो साफ-साफ नी समझी सके। सारी गल्ला आस्से आऊणें वाले टैम मन्झ ही समझी सके, क्यूंकि आस्सा परमेसर आम्हणें-साम्हणें देखणा। ऐबे, मेरा ज्ञान पूरा नी आ। आऊणें वाले टैम मन्झ ही मां से सच्चे जाणना, जिहां परमेसर मुंजो जाणहां।

¹³इधी कठे ऐबे आस्से इन्हा तीन गल्ला जो करे: परमेसरा पर विस्वास रखा, परमेसरा रे वादे पर आस रखा, एक दूजे किन्हें प्यार रखा। पर इन्हा तीन गल्ला मन्झ सभी ले बडी गल येई कि दूजे किन्हें प्यार करहा।