Read Mandeali 1 कुरिन्थियो 16 Bible Online

1 कुरिन्थियो 16 - Mandeali bible

1 कुरिन्थियो 16

¹यरुस्लेम सैहरा रे परमेसरा रे पवित्र लोका री मददा रे कठे जो पैसा तुस्से कठा कितिरा, एता रे बारे मन्झ तुस्से मेरे ले सुआल पूछीरा था, होर ऐबे हांऊँ तेता रे बारे मन्झ बोलणा चाहां, एसरे बारे मन्झ जो गल्ला मैं गलातिया ईलाके री कलीसिया रे लोका जो करणे रे कठे बोलिरा था तुस्से भी तेह्ड़ा करहा।

²हर तुआरा रे ध्याड़े तुस्सा मन्झा ले हर एक माह्णुं आपणी कमाई मन्झ ले कुछ पैसे काढी किन्हें लग रखेया, ताकि जेबे हांऊँ आऊ तेस टैम तुस्सा जो दान कठा करणे रे कठे परेसानी नी हो।

³होर जेबे मां तेथी रेहणा, होर जो लोक तुस्सा री नजरा मन्झ भरोसा रे लायक ऐं, स्यों मां से दान देई किन्हें यरुस्लेम सैहरा जो भेजी देणे, होर मां एक चिठ्ठी भी तिन्हा साउगी भेजणी ताकि तेथी रे विस्वासी लोका जो तिन्हारी पैहचाण हुई सके।

⁴होर अगर तुस्सा जो लगहा कि मुंजो जाणा चहिए, ता स्यों मेरे साउगी जाईं सके।

⁵मकीदुनिया ईलाके मन्झ जाणे रे बाद मां आई किन्हें तुस्सा किन्हें मिलणा।

⁶हुई सक्हा कि कुछ लंबे टैमा तक हांऊँ तुस्सा साउगी रहूँ, या हुई सकां पूरी सरदी हांऊँ तुस्सा वाले काटूं, होर तेता ले बाद मेरे अगले सफरा रे कठे तुस्से मुंजो मददा साउगी विदा करी सके।

⁷हांऊँ नी चाहन्दा कि मकीदुनिया ईलाके मन्झ जांदे हुए सिर्फ कुछ टैमा रे कठे हांऊँ तुस्सा वाले आई किन्हें तुस्सा साउगी रहूँ। अगर प्रभु री इच्छा ई ता हांऊँ आस रखा कि कुछ लंबे टैमा तक तेथी तुस्सा साउगी रहूँ।

⁸पर मां पिन्तेकुस्ता रे साजे तक इफिसुस सैहरा मन्झ ई रैंह्णां।

⁹क्यूंकि एथी मुंजो एक बडा काम यानि परमेसर रा बचन सुनाणे रा मौका मिलिरा, हालांकि एथी बौह्त लोक एह्ड़े जो मेरा व्रोध करहे।

¹⁰अगर तिमिथियुस कुरुन्थी सैहरा मन्झ आई जाए, ता तेसरा आदर-खातर इज्जता किन्हें करेया, क्यूंकि से मेरे साहीं प्रभु रा काम करहा।

¹¹इधी कठे कोई तेस जो बेज्जत नी करहे, पर सफरा रे कठे जरूरत वाली चीजा देई किन्हें विदा करेया, ताकि से मेरे वाले आई जाए; क्यूंकि हांऊँ तेसरा होर दूजे विस्वासी भाईया जो भी न्हयाल्या करहा जो तेस साउगी सफर करी करहा ऐ थे।

¹²होर मैं आस्सा रे विस्वासी भाई अपुल्लोसा ले घड़ी-घड़ीये अर्ज किती कि से भी दूजे विस्वासी भाईया साउगी जाये, जो तुस्सा किन्हें मिलदे आईरे थे, पर से एस टैम नी आऊंणा चाहन्दा, पर जेबे तेस जो बढ़िया मौका मिल्घा तेस आई जाणा।

¹³चतन्न रहुआ, तुस्से विस्वासा मन्झ मजबूत बणी रहुआ, होर साहसी बणा।

¹⁴जो कुछ भी तुस्से करहा ऐं, सब कुछ प्यारा किन्हें करा।

¹⁵हे भाईयो होर बैहणो, तुस्से स्तिफनासा जो होर तेसरे परिवारा जो जाणहां ऐं कि, अखाया ईलाके मन्झ तिन्हें ही सभी ले पैहले मसीह पर विस्वास कितेया था, होर स्यों परमेसरा रे पवित्र लोका री सेऊआ रे कठे त्यार रैंहयां ऐं।

¹⁶इधी कठे हांऊँ तुस्सा ले अर्ज करहा कि एह्ड़े लोका री सुणेया करहा, बल्की एह्ड़े सभी री सुणा जो प्रभु रे कामा जो बौह्त मैहनता किन्हें होर बड़ी भक्ति किन्हें करहे।

¹⁷होर हांऊँ स्तिफनास, फूरतूनातुस होर अखइकुस विस्वासी भाईया रे मेरे वाले आऊणें ले बौह्त खुस आ, क्यूंकि तिन्हें मेरी से मदद किती, जेता जो करणे रे कठे तुस्से एथी नी ऐं।

¹⁸तिन्हें मेरे मना जो हिम्मत दिति होर आसा करहा कि मेरे ले ये खबर सुणी किन्हें तुस्सा रे मना जो भी हिम्मत मिलणी, इधी कठे तुस्सा जो भी एह्ड़े लोका री इज्जत करणी चहिए।

¹⁹आसिया रे ईलाके री कलीसिया रे विस्वासी लोका री तरफा ले तुस्सा जो नमस्कार। अक्विला होर तेसरी लाड़ी प्रिसकिल्ला रा होर तिन्हारे घरा मन्झ कठा हूंणे वाली कलीसिया रे विस्वासी भाई बैहणा री तरफा ले भी तुस्सा जो प्रभु मन्झ बौह्त-बौह्त नमस्कार।

²⁰एथी जितने भी विस्वासी भाई बैहण ऐं, तिन्हारी तरफा ले तुस्सा जो नमस्कार। गले मिली किन्हें एक दूजे किन्हें नमस्कार करा।

²¹होर ऐबे हांऊँ पौलुस, एस्सा चिठ्ठी रे आखरी मन्झ आपणे ही हाथा किन्हें एस नमस्कारा जो लिख्या करहा।

²²अगर कोई प्रभु किन्हें प्यार नी करहा, ता से स्रापित आ, हे आस्सा रे प्रभु, आई जा!

²³हांऊँ प्रार्थना करहा कि आस्सा रा प्रभु यीसू तुस्सा जो आपणा अनुग्रह देंदा रहे।

²⁴हांऊँ तुस्सा सभी किन्हें प्यार करहा, जो मसीह यीसू किन्हें जुड़ीरे। आमीन।