Read Mandeali 1 कुरिन्थियो 4 Bible Online

1 कुरिन्थियो 4 - Mandeali bible

1 कुरिन्थियो 4

¹तुस्से आस्सा जो मसीह रे सेऊआदार समझा जिन्हा जो परमेसरा रे लुख्ही रे ज्ञाना जो लोका जो समझाणे रा काम सौंपी दितिरा।

²एता ले बढ़ी किन्हें, परमेसरे जेस जो ये काम करणे जो दितिरा जरूरी आ कि से भरोसे रे लायक हो ताकि से एस दितिरे कामा जो पूरा करी सके।

³पर हांऊँ एस गल्ला री फिकर नी करदा कि, तुस्से या कोई होर लोक मेरे बारे मन्झ ये बोल्हे कि ये भरोसे रे लायक हाया की नी आ, सच्च ता ऐं आ कि हांऊँ आपणे बारे मन्झ भी ये नी बोलदा कि हांऊँ भरोसे रे लायक हाया की नी।

⁴मेरी अंतरात्मा मुंजो केसी गल्ला मन्झ दोसी नी बणान्दी, फेरी भी एता ले हांऊँ बेकसूर नी बणदा, क्यूंकि परमेसर मेरा परखणे वाल़ा होर से ही मुंजो बेकसूर साबित करहा।

⁵इधी कठे आस्सा रे प्रभु रे वापस आऊणें रे ध्याड़े तक कोई केसी रा न्याय नी करहे; क्यूंकि परमेसरा ही लोका रे मना रे मन्झ लुख्ही रे सारे विचार जाहिर करणे जिन्हों कोई नी जाणदा। होर माह्णुंआं रे मना रे विचार जाहिर करणे, होर तेबे परमेसरा हर एक माह्णुं री बड़ाई करणी।

⁶हे भाईयो होर बैहणो, मैं अपुल्लोस होर आपणे बारे मन्झ तुस्सा जो इधी कठे दसेया कि तुस्से आस्सा जो एक उदाहरणा साहीं लेई सको, होर तुस्से एस कहाबता रा मतलब सीखी सको, “पवित्र सास्त्रा मन्झ जो लिखिरा तिन्हा गल्ला ले अगे मत बढ़ा।” ये खरा नी आ कि तुस्से केसी एकी जो इज्जत देई किन्हें बडा बणाओ, होर दूजे जो बेज्जत करी किन्हें नीचा दसा।

⁷कुण बोल्हा कि तू केसी दूजे ले खरा आ? होर जो सभ कुछ तेरे वाले आ से परमेसरे तुजो दितिरा। होर जेबे परमेसरे ही तुजो सभ कुछ दितिरा, ता तुजो कोई हक नी आ तू केसी भी गल्ला मन्झ बडयाई करहे।

⁸तुस्सा जो एह्ड़ा लगा कि तुस्सा री सारी आत्मिक जरूरता पैहले ले पूरी हुई गईरी, होर तुस्सा जो लगा कि तुस्से पैहले ले ही स्यों सारे बरदान मिली गईरे, जो पवित्र आत्मा आपणे लोका जो देआ; होर तुस्से लगा कि तुस्से आस्सा बगैर ही परमेसरा रे राजेया मन्झ राज करदे लगिरे। हांऊँ खुस हुई जांदा अगर तुस्से सच्चे राज करदे, ताकि आस्से भी तुस्सा साउगी राज करदे।

⁹मुंजो एह्ड़ा लगी करहा कि परमेसरे आस्से चुणिरे चेलेया जो सभी ले पिछली जगहा मन्झ रखिरा, यानि तिन्हा कैदिया साहीं जिन्हों राजा रे लड़ाई रे बादा मन्झ हूंणे वाली, जितिरी यात्रा मन्झ सभी री पिछली जगहा मन्झ रखायें। जिन्हारा जंगली जानवरा रा मारणा सभ लोक देख्हे; एथी तक लोक ही नी पर स्वर्गदूता होर सारे माह्णुं आस्सो देख्हे, जिहां कि स्यों तमासा देखी करहे।

¹⁰आस्से चुणिरे चेले आपणे आप जो नर्क्कले समझे, क्यूंकि आस्से मसीह रे बारे मन्झ प्रचार करहे; पर तुस्से कुरुन्थी सैहरा रे विस्वासी लोके गलती किन्हें आपणे आपा जो बुद्धिमान मसीह लोक समझी लईरा! बहुत लोक आस्सा चुणिरे चेलेया रे बारे मन्झ समझे कि आस्सा चुणिरे चेले वाले कोई हक नी आ; पर तुस्से बड़े बडयाई किन्हें बोले कि तुस्सा वाले परमेसरा री दितिरी सामर्थ ई, लोक आस्सा री इज्जत नी करदे पर स्यों तुस्सा री इज्जत करहे।

¹¹आजके ध्याड़े तक आस्से भूखे-सोखे होर पुराणे फटीरे-फुटीरे कपड़े पैहने ऐं, होर लोके आस्से मारिरे होर कुटीरे, होर आस्सा वाले रैहणे कठे घर नी ऐं।

¹²होर आस्से आपणे हाथा ले मैहनत करहा ऐं। जेबे लोक आस्सा जो बुरा बोल्हा ऐं, ता आस्से तिन्हो आसरीवाद देहां ऐं; जेबे लोक आस्सो स्ताहें, ता आस्से सबरा किन्हें सैहन करहा ऐं।

¹³जेबे लोक आस्सा जो बदनाम करहा ऐं, तेबे भी आस्से बड़ी दया किन्हें जबाब दें। आज भी लोक आस्सा री इज्जत नी करदे होर ना आस्सा री कोई कीमत ई, क्यूंकि लोक आस्सो संसारा रा गंद होर कूड़ा-करकट समझे।

¹⁴हांऊँ तुस्सा जो ये गल्ला सर्मिन्दा करणे रे कठे नी पर सुधारणे रे कठे लिखी करहा, क्यूंकि तुस्से सभ मेरे बच्चे साहीं ऐं जिन्हा किन्हें हांऊँ बौह्त प्यार करहा।

¹⁵हालांकि मसीह हूंणे रे नाते तुस्सा रे स्खाणे वाले बौह्त सारे गुरु भी हुंगे, पर तुस्सा रा बापू एक ऐ आ। होर तुस्सा जो सभी ले पैहले खुसी री खबर सुणाणे री वजहा ले हांऊँ तुस्सा रा आत्मिक बापू बणेया।

¹⁶इधी कठे हांऊँ तुस्सा ले अर्ज करहा कि, जिहां हांऊँ मसीह साहीं जिन्दगी जीहां, तिहां ईं तुस्से भी मेरे साहीं जिन्दगी जिया।

¹⁷इधी कठे मैं तिमिथियुस तुस्सा वाले भेजिरा। हांऊँ तेजो एक मह्ठे साहीं प्यार करहा, होर से प्रभु रा भरोसे लायक सेऊआदार आ तेस तुस्सा जो दसणा कि हांऊँ क्या करहा होर कियां मसीह यीसू रा चेला बणी किन्हें जियां, ठीक स्यों गल्ला जो हांऊँ हर जगहा री सभ कलीसिया रे लोका जो सखा।

¹⁸तुस्सा मन्झा ले कुछ लोक ता एह्ड़ा सोचे कि मां तुस्सा वाले आई किन्हें नी मिलणा, इधी कठे तुस्से घमंडी बणी गईरे।

¹⁹पर प्रभु चाहे ता मां तुस्सा वाले जल्दी जे आई जाणा, होर मां इन्हा घमंडी लोका री गल्ला जाणी लैणी, होर तिन्हारी सामर्था रा पता भी ल्गाई लैणा।

²⁰क्यूंकि परमेसरा रा राज बौह्त सारी गल्ला रा नी, बल्कि परमेसरा री सामर्था किन्हें जिन्दगी जीणा।

²¹जेबे हांऊँ तुस्सा वाले आऊँ ता तुस्से क्या चाहें कि हांऊँ करूं? अगर तुस्से आपणी बुरी गला ले नी सुधरी रे हुंगे ता मां आपणे तरीके ले तुस्से सुधारणे, पर अगर तुस्से सुधरी गईरे हुंगे ता मां तुस्सा पर नम्रता दसणी, होर दसणा कि हांऊँ तुस्सा किन्हें कितना प्यार करहा।