Read Mandeali 1 कुरिन्थियो 7 Bible Online

1 कुरिन्थियो 7 - Mandeali bible

1 कुरिन्थियो 7

¹ऐबे जो सुआल तुस्से मेरे ले चिठ्ठी मन्झ पूछीरा था हांऊ तेता रा जबाब देआ। तुस्से पूछीरा था कि, “क्या आस्सा लोका रे कठे ये खरा कि आस्से ब्याह नी करहे?”

²क्यूंकि ये आम गल ई लोक नजायज रिस्ते मन्झ पई जाए, इधी कठे हांऊँ सलाह देआ कि हर एक मर्ध ब्याह करहे, होर आपणी लाड़ी किन्हें वफादार रहे।

³एक मर्ध लाड़ा हूंणे रे नाते आपणी जिम्मेदारी पूरी करहे; होर तिहां ईं एक जन्नानी भी लाड़ी हूंणे री जिम्मेदारी पूरी करहे, होर दुहीं जणे एक दूजे री जरूरता जो पूरा करहे।

⁴लाड़ी जो आपणे सरीरा पर हक नी आ, पर तेस्सा रे लाड़े जो आ; तिहां ईं लाड़े जो भी आपणे सरीरा पर हक नी आ, पर लाड़ी जो आ।

⁵तुस्से एक दूजे ले लग नी रैहया; पर सिर्फ कुछ टैमा तक आपु मन्झ रजामंदी करी किन्हें लग रैहया, ताकि प्रार्थना करणे रे कठे कुछ टैम मिली सके, होर फेरी दबारा एक साउगी रैहया, एह्ड़ा नी हो कि आपणे आपा पर काबू नी रखणे री वजहा ले सैतान तुस्सा जो नजायज रिस्ता रखणे रे कठे परखे।

⁶पर जो कुछ हांऊँ बोल्हा से मेरी सलाह ई, ना कि हुक्म।

⁷हांऊँ ये चाहां कि, जिहां मैं ब्याह नी कितिरा, तिहां ही तुस्से सभ भी ब्याह मत करहा; पर परमेसरे सभी जो खास वरदान दितिरा। परमेसरे कुछ लोका जो ब्याह करणे रा वरदान दितिरा, होर कुछ लोका जो बगैर ब्याह किन्हें रैहणे रा वरदान दितिरा।

⁸कुआरेया होर विधवा जो मेरी सलाह येई कि, तिन्हारे कठे ये खरा आ कि स्यों बगैर ब्याह कितिरे रहे, जिहां जे हांऊँ आं।

⁹पर अगर स्यों सबर नी करी सको, ता स्यों ब्याह करहे; क्यूंकि सरीरा री इच्छा साउगी लड़ने ले खरा कि ब्याह करी ले।

¹⁰जिन्हारा जे ब्याह हुई गईरा, तिन्हा जो हांऊँ नी, पर प्रभु हुक्म देहां कि, लाड़ी आपणे लाड़े जो तलाक नी दे।

¹¹होर अगर तलाक हुई भी जाए, ता से दूजा ब्याह नी करहे; या आपणे लाड़े किन्हें दबारा मेल करी ले। होर ना लाड़ा आपणी लाड़ी जो तलाक दे।

¹²पर ऐबे ये प्रभु रा हुक्म नी आ, पर हांऊँ तिन्हा विस्वासी लोका किन्हें बोलणा चाहां, जिन्हारा ब्याह अविस्वासी लोका किन्हें हुई गईरा; अगर केसी विस्वासी भाई री लाड़ी प्रभु पर विस्वास नी करदी हो, होर तेस साउगी रैंहणां चाहीं, ता से विस्वासी भाई आपणी लाड़ी जो तलाक नी दे।

¹³होर जेस्सा विस्वासी जनाने रा लाड़ा विस्वास नी करदा हो, होर से तेस्सा साउगी रैहणे ले खुस हो; ता से विस्वासी जनाने आपणे लाड़े जो तलाक नी दे।

¹⁴क्यूंकि एक विस्वासी लाड़ी री वजहा ले परमेसरा तेस्सा रे अविस्वासी लाड़े जो अपनाई लेहां, होर विस्वासी लाड़े री वजहा परमेसर तेसरी अविस्वासी लाड़ी जो अपनाई लेहां। अगर ये सच्च नी हुंदा कि तुस्सा रा अविस्वासी लाड़ा या लाड़ी परमेसरा रे हुंदे, ता तुस्सा रे बाल बच्चे भी परमेसरा रे नी हुंदे, पर ऐबे ता तुस्सा रे बाल बच्चे भी परमेसरा रे।

¹⁵अगर कोई अविस्वासी भाई या बैहण तलाक देणा चाहां, ता से एह्ड़ा करी सक्हा। एह्ड़ी हालता मन्झ एक विस्वासी लाड़ा या लाड़ी जो ब्याह रे बंधना मन्झ बझिरे रैहणे री जरूरत नी ई, क्यूंकि अविस्वासी ये तलाक देई करहा; पर परमेसरे आस्सा जो सांति किन्हें जिन्दगी जीणे रे कठे सादिरा।

¹⁶हे लाड़ियो तुस्से पक्का याद रखा कि तुस्सा री वजहा ले तुस्सा रे लाड़े री जिन्दगी बदली सकां ई। या हे लाड़ेयो तुस्से याद रखा कि तुस्सा री वजहा ले तुस्सा री लाड़ीया री जिन्दगी बदली सकां ई।

¹⁷मेरा इतना सब कुछ बोलणे रा मतलब ये आ कि जिहां प्रभुए हर एकी जो जेस हालाता मन्झ रखीरा होर जिहां परमेसरे आपणे लोक हूंणे रे कठे सादीरे, से तेस ही हालाता मन्झ आपणी जिन्दगी जीये। होर ये ही गल हांऊँ हर कलीसिया रे लोका जो सखा।

¹⁸एक उदाहरणा रे कठे, अगर कोई यहूदी[4] माह्णुं प्रभु यीसू पर विस्वास करहा ता तेस जो तेसरी यहूदी हूंणे री पछयाण छाडणे री जरूरत नी, होर कोई गैर-यहूदी[5] माह्णुं प्रभु यीसू पर विस्वास करहा ता तेस जो यहूदी बणने रे कठे खतना कुराणे री जरूरत नी।

¹⁹एक माह्णुं रा खतना हुईरा हो या नी हुईरा हो एता ले कोई फर्क नी पउन्दा। पर परमेसरा रे हुक्मा जो मनणा ही सभी ले जरूरी आ।

²⁰परमेसरे जेस माह्णुं जो जेस हालाता मन्झ आपणे लोक हूंणे रे कठे सदिरा, से माह्णुं तेस हालाता मन्झ आपणी जिन्दगी जीये।

²¹अगर तैं सेऊआदार हुंदे हुए प्रभु यीसू पर विस्वास कितिरा हो, ता तू एता रे बारे मन्झ फिकर नी कर; पर अगर तेरा माल्क बोल्हा कि तू अजाद आ ता तू चली जा, तेबे तू जाईं सक्हा।

²²क्यूंकि जेस जो सेऊआदारा री हालाता मन्झ प्रभु रे लोक हूंणे रे कठे सादेया गईरा हो, से एक अजाद माह्णुं साहीं आ क्यूंकि प्रभु यीसूए तेस जो तेसरे पापा ले अजादी देई दितीरी। होर तिहां ईं जेस माह्णुं जो अजादी री हालाता मन्झ सदिरा हो, स्यों मसीहा रा सेऊआदार बणी जाहाँ।

²³क्यूंकि परमेसरे तुस्सा रे कठे बौह्त बडी कीमत चुकाईरी, जेबे तिन्हें यीसू मसीह जो क्रूसा प्रयाल्हे बलिदान कितेया; इधी कठे माह्णुं रे गुलाम नी बणी किन्हें परमेसरा रे गुलाम बणा।

²⁴हे भाईयो होर बैहणो, परमेसरे जेस माह्णुं जो जेस हालाता मन्झ आपणे लोक हूंणे रे कठे सदिरा, से तेस ही हालाता मन्झ आपणी जिन्दगी जीये।

²⁵कुआरिया रे बारे मन्झ प्रभु रा कोई हुक्म मुंजो नी मिलिरा, पर प्रभुए आपणी दया ले मुंजो भरोसे रे लायक ज्ञान दितिरा होर तेता री वजहा ले हांऊँ आपणी राय देहां।

²⁶क्यूंकि इन्हा ध्याड़े मन्झ विस्वासी लोका साउगी हर जगहा बौह्त परेसानिया वाली गल्ला हुई करहा ई, इधी कठे मुंजो लगहा कि ये खरा कि कुआरे लोक कुआरे ही रहे।

²⁷अगर तेरे वाले लाड़ी ई, ता फेरी तलाक देणे री कोसिस नी कर; होर अगर तेरे वाले लाड़ी नी ई, ता तू ब्याह करणे री कोसिस नी कर।

²⁸पर अगर तू ब्याह भी करहे, ता पाप नी आ; होर अगर कुआरी रा ब्याह हुई जाए ता तेता मन्झ भी कोई पाप नी आ; पर ब्याहिरे लोका जो संसारा मन्झ रैहन्दे हुए बौह्त कस्टा रा साम्हणा करणा पऊणा, होर हांऊँ चाहां कि तुस्से इन्हा कस्टा ले बची रैहया।

²⁹हे भाईयो होर बैहणो, हांऊँ तुस्सा किन्हें बोल्हा कि, एस संसारा मन्झ आस्सा रा रैहणे रा टैम बौह्त थोह्ड़ा रही गईरा, इधी कठे एस्सा गल्ला री ज्यादा फिकर नी करा कि, तुस्सा वाले लाड़ी हाई की नी ई। पर प्रभु री सेऊआ करणे रे बारे मन्झ सोचदे रैहया।

³⁰होर जो रोणे वाले हो, या जो खुसी मनाणे वाले हो, होर जो खरीदारी करणे वाले हो, कोई भी इन्हा गल्ला री ज्यादा फिकर नी करहे, क्यूंकि एह्ड़ा करणे ले तुस्से प्रभु री सेऊआ करणे ले दूर हुई सके।

³¹होर जो कुछ एस संसारा मन्झ आस्सा वाले आ, आस्सा जो इन्हा चीजा जो ज्यादा कीमत नी देणी चहिए, क्यूंकि एस संसारा मन्झ जो कुछ आस्सा वाले आ, से जल्दी ही खत्म हूंणे वाल़ा आ।

³²हांऊँ चाहां कि तुस्से संसारा री रोजकी जिन्दगी री फिकरा ले अजाद रहो। कुआरा आदमी प्रभु री सेऊआ रे बारे मन्झ सोच्दा रैंहयां कि से प्रभु जो किहाँ खुस करहे।

³³पर ब्याहिरा आदमी संसारा री गल्ला रे बारे मन्झ सोच्दा रैंहयां कि, से आपणी लाड़ी जो किहाँ खुस करहे।

³⁴होर इधी कठे से दो गल्ला रे बारे मन्झ सोचदा रैहया, एक तेस जो आपणी लाड़ी जो खुस करणा होर दूजा प्रभु जो खुस करणा। ब्याहिरी होर कुआरी मन्झ भी फर्क आ: कुआरी प्रभु री सेऊआ रे बारे मन्झ सोच्दी रैंहयां ईं, ताकि किहाँ से सरीरा होर आत्मा दुंहीं किन्हें परमेसरा जो खुस करी सके; पर ब्याहिरी ज्नाने, संसारा री चीजा रे बारे मन्झ सोच्दी रैंहयां ईं कि, से आपणे लाड़े जो किहाँ खुस रखे।

³⁵हांऊँ यूँ गल्ला तुस्सा री भलाई रे कठे बोल्या करहा, तुस्सा जो ब्याह करणे ले रोकणे रे कठे नी बोली करहा। पर इधी कठे कि तुस्से सही ढंगा किन्हें जिन्दगी जी सको; ताकि तुस्से एक मन हुई किन्हें प्रभु री सेऊआ मन्झ लगी रहो।

³⁶अगर केसी बापू जो लगहा कि से आपणी कुआरी मह्ठी रा देरी किन्हें ब्याह करणे रे ज्रीए तेस्सा साउगी अन्याय करी करहा, क्यूंकि तेस्सा री उम्र ढलदी लगिरी हो, ता से बापू तेह्ड़ा ही करहे, जेह्ड़ा तेस जो करणा ठीक लगहा। ता से बापू आपणी मह्ठी रा ब्याह करी सक्हा, एता मन्झ कोई पाप नी आ।

³⁷अगर से आपणे मना मन्झ पक्का करी लेहां कि, तेसरी मह्ठीया रे कठे कुआरा रेहणा ही ठीक आ, होर एह्ड़ा करणे रे कठे तेस पर केसी रा दबाब नी हो, तेबे जो फैसला तिन्हें लितिरा, ता तेस बापू जो पूरा करणे रा हक आ। होर अगर तिन्हें आपणी मह्ठी जो कुआरा रखणे रा फैसला करी लितिरा, ता से परमेसरा री नजरा मन्झ खरा करहा।

³⁸इधी कठे जो आपणी कुआरी मह्ठी रा ब्याह करहा, से खरा करहा; पर जो ब्याह नी करदा से होर भी खरा करहा।

³⁹जेबे तक केसी ज्नाने रा लाड़ा जिउंदा आ, तेबे तक तेस जो तेस साउगी ब्याहा रा रिस्ता निभाणा पऊणा, पर अगर तेस्सा रा लाड़ा मरी जाए ता से अजाद ई, होर जेस साउगी से चाहे ब्याह करी सक्हा ई, पर सिर्फ तेस किन्हें जो प्रभु मन्झ विस्वास करदा हो।

⁴⁰पर मेरे विचारा ले, अगर से दबारा ब्याह नी करहे; ता तेस्सा होर भी ज्यादा खुस रहणा। हांऊँ सम्झहा कि जेबे हांऊँ एह्ड़ी गल्ला बोल्हा ता परमेसरा री आत्मा मेरे ज्रीए ये गल्ला करही।