Read Mandeali 1 कुरिन्थियो 8 Bible Online

1 कुरिन्थियो 8 - Mandeali bible

1 कुरिन्थियो 8

¹तुस्सा री चिठ्ठी मन्झ तुस्से मेरे ले मूर्ति रे साम्हणें बलि कितिरी चीजा रे बारे मन्झ भी पूछीरा था। हां, आस्से सब इन्हा गल्ला रे बारे मन्झ “कुछ ना कुछ जाणांहे।” पर जेबे ये ही ज्ञान लोका जो बडयाई करणे वाल़ा बणाई देहां, ता प्यार आस्सा जो आगे बधणे मन्झ मदद करहा।

²अगर कोई आदमी ये समझ्हा कि, से ज्ञानवान आ, ता से असली मन्झ ऐबे तक कुछ तेहड़ा जाणी ही नी सकेया, जेहड़ा जाणना तेसरे कठे जरूरी आ।

³पर अगर कोई परमेसरा किन्हें प्यार रख्हा, ता परमेसर तेस जो जाणहां।

⁴होर ऐबे खाणे रे बारे मन्झ हांऊँ तुस्सा जो जबाब देणा चाहां। मूर्ति रे साम्हणें बलि कितिरी चीजा रे बारे मन्झ आस्से जाणांहे कि मूर्तिया एस संसारा री सच्ची इस्वर नी, होर सिर्फ एक ही सच्चा परमेसर आ।

⁵हलांकि स्वर्गा मन्झ होर धरती पर बौह्त सारी चीजा ई, जिन्हा जो लोक इस्वर होर प्रभु बोले।

⁶तेबे बी आस्सा रा एक ई परमेसर आ; होर से आस्सा रा बापू आ; होर तिन्हें ही सारी चीजा रचिरी, होर आस्से तेसरे कठे ही जिउंदे, होर आस्सा रा एक ई प्रभु आ, होर से यीसू मसीह आ; जेसरे ज्रीए सारी चीजा रचिरी, होर आस्से तेसरे ज्रीए जिउंदे।

⁷पर आस्सा रे कुछ विस्वासी लोका जो ऐबे तक ये नी पता कि मूर्तिया वाले कोई सामर्थ नी। क्यूंकि स्यों पैहले इन्हा मूर्तिया री पूजा करहे थे, ऐबे स्यों मूर्तिया रे साम्हणें बलि कितिरी चीजा जो खाहें, ता तिन्हों एस गल्ला री गलत समझ हुई जाहीं कि स्यों हाल्ले भी मूर्तिया री पूजा करेया करहा ऐ; इधी कठे स्यों आपणे मना मन्झ ये सोची किन्हें बौह्त दुखी हुई जाहें कि, मूर्तिया रे साम्हणें बलि कितिरा खाणा तिन्हो खाणा पो, ता स्यों पाप करी बैठे।

⁸पर खाणा आस्सा जो परमेसरा रे नेडे नी पुजान्दा, अगर आस्से नी खान्घे, ता तेता ले आस्से परमेसरा जो कम खुस नी करदे, होर अगर खाई भी ले, तेबे बी परमेसरा री नजरा मन्झ आस्से कुछ खास नी बणदे।

⁹पर चतन्न रैहया कि, तुस्सा री खाणे री अजादी विस्वासा मन्झ कमजोर लोका रे कठे तेसरे पाप करणे री वजहा नी बणे।

¹⁰तुस्से ता जाणांहे कि ये मूर्तिया असली मन्झ परमेसर नी, ता तुस्से इन्हा मूर्तिया रे मन्दरा मन्झ कुछ भी खाई ले। पर एह्ड़ा कोई माह्णुं जो आपणे विस्वासा मन्झ कमजोर आ, होर से तुस्सा जो तेथी कुछ खांदे देखी किन्हें आपु भी मूर्तिया रे साम्हणें बलि कितिरी चीजा खाणे रे कठे हिम्मत करहा, हलांकि से सोच्हा कि एह्ड़ा करणा पाप आ।

¹¹होर इधी कठे तू जिन्हा गल्ला जो जाणहां, तिन्हारी वजहा ले से विस्वासा मन्झ कमजोर आदमी मसीह पर विस्वास करणा छाडी देणा, जेसरे कठे मसीह यीसूए आपणी जान दितीरी।

¹²होर जेबे तुस्से आपणे विस्वासी भाई या बैहणा ले कुछ एह्ड़ा कुराहें, जो तेस जो करणा गलत लगहा ता एह्ड़ा कुराई किन्हें, तुस्से तेसरे बरखलाफ पाप करहे; ता तुस्से मसीहा रे बरखलाफ भी पाप करहे।

¹³इधी कठे अगर मूर्तिया रे साम्हणें बलि कितिरे खाणे (मास) री वजहा ले केसी विस्वासी भाई होर बैहणा रा विस्वास कमजोर हुई जाहाँ, ता मां कधी भी एह्ड़ा खाणा नी खाणा जेसरी वजहा ले तेस आदमी रा विस्वास कमजोर हुई जाओ।