Read Mandeali 1 कुरिन्थियो 9 Bible Online

1 कुरिन्थियो 9 - Mandeali bible

1 कुरिन्थियो 9

¹जो कुछ मुंजो खरा लगहा तेता जो खाणे रे कठे हांऊँ अजाद आ। हांऊँ एक चुणिरा चेला आ। मैं आस्सा रा प्रभु यीसू देखीरा। प्रभुए जो काम करणे रे कठे मुंजो दितिरा तुस्से तेता रा नतीजा।

²भले ही दूजे लोक एस्सा गल्ला जो नी मनदे कि हांऊँ प्रभु यीसू रा चुणिरा चेला आ, पर तुस्सा जो ये गल मनणी चहिए। क्यूंकि हांऊँ ही तुस्सा वाले सभी ले पैहले खुसी री खबर लेई किन्हें आईरा था। तुस्सा रा विस्वास जो यीसू मसीह पर आ, से एस गल्ला रा सबूत आ कि हांऊँ सच्चे तुस्सा रे कठे परमेसरा रा चुणिरा चेला आ।

³स्यों जे मेरे चुणिरा चेले हूंणे पर सुआल करहे तिन्हारे कठे मेरा येई जवाब आ।

⁴मेरा होर बरनबासा रा पुरा हक आ कि आस्से तुस्सा लोका ले पैसे री मदद लेई सके।

⁵जिहां चुणिरे चेले, प्रभु रे भाई होर पतरस[6] जेबे सेऊआ करणे रे कठे आपणी लाड़ी साउगी जाहें, तिहां मेरा भी हक आ कि हांऊँ एह्ड़ा करूं।

⁶क्या तुस्सा जो एह्ड़ा लगहा कि मुंजो होर बरनबासा जो ही, आपणे खर्चे पुरे करणे रे कठे काम धंधा करणा चहिए, जेबे कि आस्से भी परमेसरा रे सेऊआदार ऐं?

⁷कोई भी आदमी आपणे खर्चे पर स्पाही रा काम नी करदा। से जो अंगूरा रा बगीचा लगां से भी तेसरा फल खाणे री उम्मीद रखा। होर भेडा रे झुंडा री रखवाली करणे वाल़ा भी तिन्हा भेडा रा दूध पीणे री उम्मीद रखा।

⁸हांऊँ ये सभ गल्ला माह्णुं री सोचा रे मताबक नी बोल्दा लगिरा।

⁹मूसा री व्यवस्था भी एह्ड़ा बोली। मूसा री व्यवस्था मन्झ लिखिरा, “कणक गांहणे वाले बोल्ह्दा रा मुंह देख्या बान्ह्दा,” क्या परमेसर सिर्फ बोल्ह्दा री फिकर करहा? नी!

¹⁰पर से आस्सा रे कठे ही बोल्हा। होर ये आस्सा रे कठे ही लिखिरा, क्यूंकि हल चलाणे वाल़ा आस रखी किन्हें डोहर्रिया बाहें, होर गांहणे वाल़ा फसल पाणे री आस रखी किन्हें फसला जो गांहा।

¹¹आस्से तुस्सा रे बीचा मन्झ आत्मिक बेजा बाय्हिरा, होर इधी कठे ये बड़ी गल नी कि आस्से तुस्सा ले आस्सा री जरूरता जो पूरा करणे री फसला जो काटणे री उम्मीद रखायें।

¹²अगर तुस्से दूजे लोका री मदद किती जिन्हें तुस्सा वाले आई किन्हें प्रचार कितेया, तेबे बरनबासा होर मेरा ज्यादा हक बणा कि तुस्से आस्सा री जरूरत पूरी करहा। क्यूंकि आस्से सभी ले पैहले तुस्सा जो खुसी री खबर सुणाई री, पर आस्से दुहीं जणे एस गल्ला रे कठे तुस्सा पर बोझ नी पाया, एता रे बजाय आस्से हर चीजा बर्दास किती, ताकि आस्से केसी जो भी मसीह री खुसी री खबरा पर विस्वास करणे ले नी रोके।

¹³तुस्से पक्का जाणांहे कि जो लोक मन्दरा मन्झ सेऊआ करहा ऐं, तिन्हा जो तिन्हारा खाणा मन्दरा ले ई मिल्हा, होर जो बेदी पर बलि चढ़ाहें तिन्हा जो तेस्सा बलि रे चढ़ावे मन्झ हिस्सा मिला।

¹⁴एस तरहा प्रभुए हुक्म दितिरा कि खुसी री खबर सुनाणे वाले रा गुजारा खुसी री खबरा जो सुणने वाले लोका ले ही मिलना चहिए।

¹⁵पर इन्हा हका मन्झा ले मैं एकी रा भी कधी इस्तेमाल नी कितेया। होर ये गल्ला मैं इधी कठे नी लिखी कि, ऐबे तुस्सा मेरे कठे एह्ड़ा करणा। बिलकुल भी नी! मेरे कठे मरणा ठीक आ एता रे बजाय कि हांऊँ तुस्सा ले मदद मांगू, क्यूंकि अगर मैं तुस्सा ले मजदूरी पाई ता फेरी हांऊँ एस गल्ला पर बडयाई नी करी सकदा कि मैं बिना कुछ लितिरे तुस्सा रे कठे काम कितिरा।

¹⁶इधी कठे अगर हांऊँ खुसी री खबरा रा प्रचार करहा ता एता मन्झ बडयाई करणे री कोई वजहा नी; क्यूंकि प्रभु यीसूए मुंजो ये काम करणे रा हुक्म दितिरा, होर अगर हांऊँ खुसी री खबर नी सुणाऊं ता मुंजो बौह्त सजा मिलणी।

¹⁷क्यूंकि अगर हांऊँ आपणी इच्छा ले ये काम करहा, ता मुंजो मजदूरी मिल्हा ई, होर अगर हांऊँ आपणी इच्छा ले नी करूं, तेबे भी जो जिम्मेदारी परमेसरे मुंजो दितिरी, तेस्सा जो हांऊँ पूरा करहा।

¹⁸ता मेरी मजदूरी क्या ई? मेरी मजदूरी येई कि हांऊँ बिना केसी ले मजदूरी जो लितिरे खुसी री खबरा रा प्रचार करी सक्हा। हालांकि मुंजो खर्चा मांगणे रा पूरा हक आ।

¹⁹एता रा मतलब ये आ कि हांऊँ केसी रा भी गलाईरा मनणे रे कठे बंधीरा नी आ, सिर्फ इधी कठे कि स्यों मेरी मदद करहे बल्की हांऊँ अजाद आ, फेरी भी मैं सभिरा सेऊआदार बणा, ताकि हांऊँ तिन्हा जो मसीह वाले ल्याई सकूं।

²⁰यानि जेबे हांऊँ यहूदी लोका साउगी हुंहाँ, ता तिन्हा साहीं जियां था ताकि हांऊँ तिन्हा जो मसीह वाले ल्याई सकूं; जेबे हांऊँ यहूदी व्यवस्था रे मनणे वाले साउगी रैहया था, हांऊँ आपु भी तेस व्यवस्था रे अधीन रैहया। हालांकि मुंजो तेस व्यवस्था जो मनणे री जरूरत नी, पर मैं स्यों मन्हां ईं ताकि हांऊँ व्यवस्था रे अधीन रैहणे वाल़ेया जो मसीह वाले ल्याई सकूं।

²¹ठीक तिहां ही हांऊँ गैर-यहूदी लोका रे साउगी था ता तिन्हा साहीं जियां, जो यहूदी व्यवस्था जो नी मनदे थे, ताकि तिन्हो भी मसीह वाले ल्याई सकूं, पर हांऊँ जाणहां कि हांऊँ परमेसरा री व्यवस्था रे बगैर नी जिया करहा था, क्यूंकि हांऊँ मसीह री व्यवस्था रे अधीन ही आ।

²²कि जेबे हांऊँ तिन्हा लोका साउगी रैहया था, जो कुछ गल्ला जो लेई किन्हें सक करहे थे कि इन्हा गल्ला जो करणा प्रभु री नजरा मन्झ ठीक आ की नी, ता मैं भी गल्ला जो करणा छाडी दिती; ताकि हांऊँ तिन्हा जो भी मसीह वाले ल्याई सकूं।[7] होर हांऊँ सभ माह्णुं रे कठे सभ कुछ बणेया, ताकि किहाँ नी किहाँ मेरे ज्रीए परमेसर कुछ लोका रा उद्धार करी सके।

²³होर हांऊँ सभ कुछ मसीह रे बारे मन्झ जो खुसी री खबर ई, तेता जो सुनाणे रे कठे करी करहा, ताकि हांऊँ भी तेस आसरीवाद रा साझीदार बणी जाऊं, जेस जो देणे रा वादा परमेसरे खुस खबरी मन्झ कितिरा।

²⁴तुस्से पक्का जाणांहे कि, दौड़ा मन्झ ता बौह्त सारे लोक दौड़हा ऐं, पर इनाम एक ई लई जाहाँ। तुस्से एह्ड़े दौड़ा कि, इनाम जीती सको।

²⁵जो लोक दौड़ मन्झ दौड़ना चाहें स्यों पैहले एता री त्यारी करहे, होर हर तरहा रा सबर करहा ऐं, स्यों एह्ड़ा जीतणे रे कठे होर इज्जत पाणे रे कठे करहे। तिन्हारी इज्जत पातरा रे बणिरे मुक्टा किन्हें करी जाहीं, जो जल्दी सुक्की जाहें। पर आस्से जो यीसू मसीह मन्झ विस्वास करहे, आस्सा री भी इज्जत हूणीं, होर आस्सो एह्ड़ी आसीस मिलणी; जो जुग-जुग रे कठे बणी रैहणी। होर इधी कठे आस्सो होर भी सबर रखणा चहिए।

²⁶इधी कठे ही हांऊँ आपणी मसीह जिन्दगी जो एक पक्के मकसदा साउगी जिंदा लगीरा, जिहां एक कुस्ती लड़ने वाल़ा हाऊआ मन्झ नी पर आपणे व्रोधी रे सरीरा पर ही मुक्के मारहा।

²⁷हांऊँ आपणे सरीरा जो आपणे बसा मन्झ रखा, ताकि हांऊँ आपणी ही इच्छा जो आपणे काबू मन्झ रख्ही सकूं, केते एह्ड़ा नी हो कि हांऊँ होरी लोका जो खुसी री खबरा रा प्रचार करूं, होर मुंजो आपु जो ही इनाम नी मिले।