Read Mandeali 2 कुरिन्थियो 11 Bible Online

2 कुरिन्थियो 11 - Mandeali bible

2 कुरिन्थियो 11

¹तुस्से दूजेया री ता सुणी ले जेबे स्यों आपणे बारे मन्झ खरी गल्ला बोला ऐं, इधी कठे हांऊँ सोचा कि अगर हांऊँ थोह्ड़ी वेवकुफी री गल्ला करहा, ता तुस्सा हांऊँ सही लैणा।

²क्यूंकि जिहां परमेसर तुस्सा री फिकर करहा, तिहां हांऊँ भी तुस्सा री फिकर करहा; इधी कठे हांऊँ पवित्र कुआरी साहीं तुस्सा जो मसीह जो देआ जो तुस्सा रा एक ही लाड़ा।

³पर हांऊँ डरहा कि जिहां सैताने सांपा रे रूपा मन्झ आपणी चलाकी किन्हें पैहली जन्नानी हव्वा बैहकाई, तिहां ईं तुस्सा रे मन तेस्सा सिधाई होर पवित्रता किन्हें तुस्सा जो मसीह री इज्जत करणी चहिए कि केते भ्रस्ट नी किते जाए।

⁴अगर कोई तुस्सा वाले आई किन्हें, यीसू रे बारे मन्झ लग ही प्रचार करहे, जेह्ड़ा आस्से यीसू रे बारे मन्झ प्रचार कितेया था; या तुस्सा जो कोई होर आत्मा मिले, जो पवित्र आत्मा ले लग ई जो तुस्सा जो पैहले मिलिरी थी; या होर कोई एह्ड़ी खबर मिले जो तेस खुसी री खबरा ले लग हो जो तुस्से पैहले ग्रहण कितिरी थी, तेबे तुस्से इन्हा झूठे उपदेसा जो बड़ी असानी किन्हें मनी ले। होर एह्ड़ा करी किन्हें तुस्सा ले बौह्त बडी गलती हुई गईरी।

⁵हांऊँ नी समझ्दा कि, स्यों झूठे चुणिरे चेले मेरे ले बढ़िया ऐं, जो आपणे आपा जो सभी ले महान चुणिरे चेले समझा ऐ।

⁶हांऊँ मना कि तिन्हा लोका साहीं बोलणे ग्लाणे मन्झ माहिर नी आ, पर हांऊँ तिन्हा ले ज्यादा ज्ञान रखा आ; बल्की मैं आपणा ज्ञान तिन्हा सारे उपदेसा रे ज्रीए साबित कितिरा।

⁷मैं आपणे आपा जो छोटा करी दितेया होर मुफ्ता मन्झ ही तुस्सा जो परमेसरा री खुसी री खबर रा प्रचार कितेया, ताकि तुस्से इज्जत पाओ; क्या एह्ड़ा करी किन्हें मै कुछ पाप कितेया?

⁸मैं दूजी कलीसिया रे लोका ले दान ग्रहण कितेया; ताकि हांऊँ मुफ्ता मन्झ तुस्सा री सेऊआ करूं। इधी कठे तुस्से एह्ड़ा मत बोला कि मै कलीसिया रे लोक लुटे।

⁹होर जेबे हांऊँ तुस्सा साउगी था, होर मुंजो पैसे री कमी हुई, ता मैं केसी पर भार नी पाया, क्यूंकि विस्वासी लोके, मकीदुनिया ईलाके ले आई किन्हें मेरी कमी पूरी किती। होर मैं केसी गल्ला मन्झ आपणे आपा जो तुस्सा पर बोझ नी बणने दितेया, होर ना आगे बणने देणा।

¹⁰हांऊँ मसीह रे बारे मन्झ तुस्सा जो सच्चाई ही दसां, तिहां ही हांऊँ दसां कि मुंजो गर्व आ कि मैं अखाया ईलाके मन्झ केसी ले पैसे नी लिते।

¹¹मैं तुस्सा रा पैसा किधियो नी लितेया? क्या इधी कठे कि हांऊँ तुस्सा किन्हें प्यार नी रखदा? परमेसर ये जाणहां कि हांऊँ तुस्सा किन्हें प्यार रखा।

¹²बल्की जो हांऊँ करेया करहा, मां तेह्ड़ा ई करदे रैंह्णां; ताकि जो लोक आस्सा री बराबरी करणे रा मौका तोप्हा ऐं, मां तिन्हा जो एस गल्ला री बडयाई नी करणे देऊँ।

¹³क्यूंकि एह्ड़े लोक झूठे चुणिरे चेले ऐं, होर धोखा धड़ी करणे वाले, होर मसीह रे चुणिरे चेले हूंणे रा झूठा दावा करहा ऐं।

¹⁴होर ये कुछ हरानी री गल नी ई क्यूंकि सैतान आपु भी ज्योतिमर्य स्वर्गदूत हूंणे रा झूठा दावा करहा।

¹⁵होर अगर सैताना रे सेऊआदार भी धार्मिकता रे सेऊआदार हूंणे रा झूठा दावा करहा ऐं, ता कुछ बड़ी गल नी ई, पर तिन्हारा अंत तिन्हारे कामा रे मताबक हूंणां।

¹⁶हांऊँ दबारा याद कुराई करहा, कोई मुंजो नर्क्कला नी समझे; पर अगर तुस्से हांऊँ नर्क्कला ही समझीरा ता एह्ड़ा समझी किन्हें मुंजो अपनाई लऊआ, ताकि मुंजो भी थोहड़ा बडयाई करणे रा मौका मिली जाये।

¹⁷ऐबे ये गल्ला जो हांऊँ निधड़क हुई किन्हें बोल्या करहा, तेहड़ा नी बोलदा लगिरा जिहां प्रभु मेरे ले बुलाणा चाहां, पर नर्क्कले री वजहा ले बोल्या करहा।

¹⁸जेबे कि बौह्त लोक संसारा रे लोका रे मताबक बडयाई करहा ऐं, ता मां भी बडयाई करणी।

¹⁹तुस्से ता आपणे आपा जो समझदार समझे, पर फेरी भी तुस्से बड़ी खुसी किन्हें नर्क्कल्या जो सही ले!

²⁰क्यूंकि जेबे तुस्सा जो कोई गुलाम बणाई लैहां, या सब कुछ लेई लेया जो तुस्सा वाले हाया, या तुस्सा रा फायदा लैहां ऐं, या आपणे आपा जो तुस्सा ले बडा बणाहां, या तुस्सा रे मुंहा पर चांडा मारहा, ता तुस्से तेसरी सही लैहां ऐं।

²¹तुस्सा जो क्या लगहा कि मैं तुस्सा साउगी एह्ड़ा नी कितेया, ता क्या मुंजो सरम आऊणीं चहिए? नी! पर जेस केसी गल्ला मन्झ कोई बडयाई करणे री हिम्मत करहा ता हांऊँ भी नर्क्कल्या मन्झ बोल्या करहा कि हांऊँ भी तिहां बडयाई करणे री हिम्मत करहा।

²²क्या स्यों ईं इब्रानी भासा बोलणे वाल़े? हांऊँ भी इब्रानी आ। क्या स्यों इस्राएल देसा रे लोक ये? हांऊँ भी आ; क्या स्यों अब्राहमा रे बंसा रे ऐं? हांऊँ भी आ।

²³क्या स्यों ईं मसीह रे सेवक ऐं? हांऊँ तिन्हा ले बढ़ी किन्हें आ! हांऊँ पागल आदमी साहीं हुई किन्हें बोल्हा कि मैं तिन्हा ले ज्यादा मैहनत कितिरी; तिन्हा ले ज्यादा जेल्हा मन्झ पाईरा; कई बारी कुटीरा; कई बारी मुंजो मौता रा साम्हणां करणा पईरा।

²⁴यहूदी अगुवे पांज बारी मुंजो उन्ताली कोड़े मारे।

²⁵तीन बार मैं बैंता री मार खाध्ही; एक बार पत्थरवाह हुआ; तीन बार मेरा जहाज डुबेया; एक ध्याड़ा होर एक रात मैं समुद्रा मन्झ काटी।

²⁶बार-बार मुंजो सफर करना पया। कधी दराऊआ मन्झ, कधी खूंखार डाकुआ मन्झ, कधी आपणे देसा रे लोका मन्झ, कधी अन्यजाति लोका मन्झ, कधी सैहरा मन्झ, कधी जंगला मन्झ, कधी समुद्रा रे खतरे मन्झ, कधी झूठे विस्वासी लोका रे खतरे रा सामना करना पया।

²⁷मैं मैहनत किती होर संघर्स कितेया, होर कई रातीया जागी किन्हें काटी। हांऊँ भूख-प्यासा रहा होर खाणे रे कठे कुछ नी था। होर मैं ठंडा रे ध्याड़े काटीरे, होर मेरे वाले निघे कपड़े नी थे।

²⁸होर इन्हा सभी मुस्किला रे अलावा हर रोज मुंजो कलीसिया री भलाई री चिन्ता रा बोझ बणी रहा।

²⁹जेबे कोई कमजोर हूँआ था ता हांऊँ भी आपु जो कमजोर समझा था। मुंजो बौह्त दुःख हुआं था जेबे कोई पाप करहा था।

³⁰अगर बडयाई करणा जरूरी आ, ता मां आपणी कमजोरी री गल्ला पर करणा।

³¹परमेसर, जो यीसू मसीह रा बापू, जो हमेसा बड़ाई रे लायक आ, से जाणहां कि, हांऊँ झूठ नी बोल्दा।

³²जेबे हांऊँ दमिस्क सैहरा मन्झ था तेबे राजा अरितास रे हाकमे मुंजो पकड़णे रे कठे सैहरा पर पैहरा बैठाई रखिरा था।

³³पर मुंजो सैहरा री चार दिवारी रे खोले ले किरडू मन्झ बठ्याली किन्हें हेठ तुआरी दितेया गया, होर हांऊँ हाकमा रे हाथा ले बची निख्ल्या।