Read Mandeali 2 कुरिन्थियो 12 Bible Online

2 कुरिन्थियो 12 - Mandeali bible

2 कुरिन्थियो 12

¹जेब्की बडयाई करणा ता मेरे कठे खरा नी आ, तेबे बी करणा पहूंआं; पर मां प्रभु रे दितिरे दर्सन होर प्रकासना रे बारे मन्झ दसेया करहा।

²हांऊँ एक एह्ड़े माह्णुं [7] जो जाणहां जो मसीह पर विस्वास रखा। चौदा साल पैहले ये माह्णुं स्वर्गा तक उठाया गया-सरीरा साउगी या बिना सरीरा रे, ये सिर्फ परमेसर ही जाणहां।

³हांऊँ दबारा बोल्हा, मुंजो पता ये माह्णुं स्वर्गलोका वखा जो खिंजी लितेया (फेरी भी मुंजो नी पता ये सच्चे हुआ या सिर्फ एक सूपणा, सिर्फ परमेसर जाणहां), होर तेथी तिन्हें एह्ड़ी गल्ला सुणी जो सब्दा मन्झ बखान नी करी सकदे। जिन्हा गल्ला जो बोलणे री ईजाजत केसी माह्णुं जो नी।

⁵एह्ड़े माह्णुं रे वखा ले मां गर्व करणा, पर आपणे आपा पर नी, सिर्फ आपणी कमजोरिया पर गर्व करणा।

⁶क्यूंकि अगर हांऊँ गर्व करणा चाहूँ भी ता मां नर्क्कले नी बणना, क्यूंकि हांऊँ सच्च ही बोल्या करहा; तेबे बी गर्व करणे ले हांऊँ रुकी जाहाँ, एह्ड़ा नी हो कि, जिहां कोई मुंजो देख्हा, या मेरे ले सुणहां, मुंजो तेस ले बढ़ी किन्हें समझे।

⁷पर परमेसरे मुंजो नौखे प्रकासन दितिरे, तेता रे बारे मन्झ बौह्त बडयाई नी करणी चहिए। इधी कठे तिन्हें मुंजो एक बौह्त बडी परेसानी जो झेलणे रे कठे देई दिति यानि मेरे सरीरा मन्झ एक कांडा देई दितेया। ये एह्ड़ा था जेहड़ा सैताना रा एक दूत मुंजो दुःख देहां ताकि हांऊँ बडयाई नी करूं।

⁸ऐता रे बारे मन्झ मैं प्रभु ले तीन बारी बिनती किती कि, मेरे वाले ले ये कांडा दूर हुई जाए।

⁹होर तिन्हें मेरे किन्हें बोल्या, “मेरा अनुग्रह तेरे कठे काफी आ; क्यूंकि तुस्सा री कमजोरी मन्झ मेरी सामर्थ सिद्ध हुंहाँ ईं।” इधी कठे मां बड़ी खुसी किन्हें आपणी कमजोरिया पर बडयाई करणी, ताकि मसीह मुंजो सामर्थ देंदा रहे।

¹⁰ऐस वजहा ले हांऊँ मसीह रे कठे कमजोरिया मन्झ, होर बेज्जती मन्झ, होर गरीबी मन्झ, होर उपद्रवा मन्झ, होर दुःखा मन्झ, बौह्त खुस हुंहाँ; क्यूंकि जेबे हांऊँ कमजोर हुंहाँ, तेबे ई हांऊँ मसीह री सामर्था मन्झ ताकतवर हुंहाँ।

¹¹हांऊँ नर्क्कला साहीं बणी गया, बल्की तुस्से ई मुंजो एह्ड़े बणने मन्झ मजबूर करी दितेया। तुस्सा जो ता मेरी तारीफ़ करणी चहिए थी, क्यूंकि अगर हांऊँ कुछ भी नी आ, तेबे भी हांऊँ तिन्हा महान चुणिरे चेलेया ले केसी गल्ला मन्झ कम नी आ।

¹²मै तुस्सा रे बीचा मन्झ सच्चे चुणिरा चेले हूंणे रा सबूत देंदे हुए, सबर, नौखे चिन्ह, होर चमत्कारा रे काम दसे।

¹³तुस्से केह्ड़ी गल्ला मन्झ दूजी कलीसिया रे लोका ले कम थे? सिर्फ एता मन्झ कि मैं तुस्सा ले कधी भी आपणी जरूरता रे कठे पैसे नी लिते। एह्ड़ा करी किन्हें अगर मैं गलती कितिरी, ता मुंजो माफ करी देआ।

¹⁴ऐबे हांऊँ त्रीजी बारी तुस्सा वाले आऊणें रे कठे त्यार आ, होर एस बारी भी मां तुस्सा ले कोई मदद नी लैणी। क्यूंकि हांऊँ तुस्सा री जायदाद नी, बल्की हांऊँ तुस्सा जो चाहां। क्यूंकि बाल बच्चेया जो माऊ-बापू रे कठे धन दौलत कठा नी करणा चहिए, पर माऊ-बापू जो बाल बच्चेया रे कठे धन दौलत जोड़नी चहिए।

¹⁵परमेसरा जो मनणे रे कठे बौह्त खुसी किन्हें तुस्सा रे कठे आपणा सब कुछ देणा, बल्की आपणी जान भी देई देणी। हांऊँ तुस्सा साउगी बौह्त प्यार रख्हा, पर एह्ड़ा लगा कि तुस्से मेरे किन्हें कम प्यार करहे।

¹⁶कुछ भी हो, हांऊँ तुस्सा पर कोई बोझ नी बणेया। फेरी भी कोई मेरे पर जरूर दोस लगाई सक्हा कि, “ये बौह्त च्लाक आ होर तुस्सा जो धोखा देई गया!”

¹⁷मैं तितुसा जो होर विस्वासी भाई जो कधी भी तुस्सा वाले भेजी किन्हें ढब्बे री मदद नी मांगी।

¹⁸मै स्यों तुस्सा वाले भेजे, ता क्या तितुसे धोखा देई किन्हें तुस्सा ले कुछ लितेया? नी! क्यूंकि आस्सा रा एक उदेस्य आ होर आस्से एक साहीं काम करहे।

¹⁹हे लाडले भाईयो होर बैहणो, तुस्से आपणे मना मन्झ ये सोचेया करहा ऐं कि आस्से येह सब आपणे बचाव करणे रे कठे बोल्या करहा ऐं। आस्से ता मसीह रे ज्रीए परमेसरा जो हाजिर जाणी किन्हें बोल्हा ऐं, सब गल्ला तुस्सा रे विस्वासा री उन्नति रे कठे ई।

²⁰क्यूंकि मुंजो डर आ, केते एह्ड़ा नी हो कि, हांऊँ आई किन्हें जेह्ड़ा चाहां, तेह्ड़ा तुस्सा जो नी पाऊं; होर तुस्से भी मुंजो आपणी उम्मीद रे मताबक नी पाओ। मुंजो डर आ कि तुस्सा मन्झ झगड़ा, जल्नी, गुस्सा, विरोध, हिर्ख, चुगली, बडयाई, होर बखेड़े नी हो।

²¹केते एह्ड़ा नी हो जेबे हांऊँ दबारा वापस तुस्सा किन्हें मिलणे आऊँ मेरा परमेसर मुंजो बेज्जत करहे। होर मुंजो तिन्हा कईया रे कठे रोणा नी पई जाए, जिन्हें पैहले गंदे काम होर अपवित्रता, होर व्यभिचार, होर भोग विलास जेह्ड़े पाप कितिरे हो, होर तिन्हें पाप करणा नी छाडीरा हो।