Read Mandeali 2 कुरिन्थियो 2 Bible Online

2 कुरिन्थियो 2 - Mandeali bible

2 कुरिन्थियो 2

¹मैं आपणे मना मन्झ येई ठाणी लया था कि मां फेरी दबारा तुस्सा वाले तेथी आई किन्हें तुस्सा जो दुःख नी दूं।

²क्यूंकि अगर हांऊँ आई किन्हें तुस्सा जो दुखी करूं, ता तुस्सा रे अलावा मुंजो खुसी देणे वाल़ा होर कोई नी आ, सिर्फ तुस्से ई जेह्ड़े मै दुखी कितिरे।

³होर मैं येई गल तुस्सा जो इधी कठे लिखी कि, केते एह्ड़ा नी हो कि, मेरे आऊणें पर जिन्हा ले मुंजो खुसी मिलणी चहिए, हांऊँ तिन्हा ले दुखी हुई जाऊं। क्यूंकि मुंजो तुस्सा सभी पर ऐस गल्ला रा भरोसा आ कि, जो मेरी खुसी ई, सेई तुस्सा सभी री भी खुसी ई।

⁴बड़े कस्टा ले, होर दुखी मना ले, मैं बौह्त रोई-रोई किन्हें मैं ये चिठ्ठी तुस्सा कठे लिखी; इधी कठे नी कि, तुस्से दुखी हुई जाओ, बल्की इधी कठे कि तुस्से तेस बड़े प्यारा जो जाणी लो, जो मुंजो तुस्सा साउगी आ।

⁵अगर कोई मेरे दुखा री वजहा ई ता से सिर्फ मेरे कठे नी पर केसी हदा तक किन्हें तुस्सा सभी रे कठे भी दुखा री वजहा बणीरी। हांऊँ तेसरी गलतिया रे बारे मन्झ बढ़ाई-चढ़ाई किन्हें होर कुछ नी बोलणा चांहदा।

⁶एह्ड़े माह्णुं जो तुस्से विस्वासी लोके जो सजा दिती, सेई तिन्हारे कठे भतेरी ई।

⁷इधी कठे ऐता ले ये खरा आ कि तेसरी गलती माफ करहा; होर तस्सली देआ, एह्ड़ा नी हो कि से माह्णुं परमेसरा पर आपणे विस्वासा ले पूरी तरहा ले पीछे हटी जाए।

⁸इधी कठे हांऊँ तुस्सा ले बिनती करहा कि, तेस जो ये दसा कि तुस्से सच्चे तेस किन्हें प्यार करहे।

⁹क्यूंकि मैं इधी कठे भी लिखिरा था कि, हांऊँ तुस्सा जो परखी लूं की तुस्से मेरी सारी गल्ला जो मनणे रे कठे त्यार ऐ की नी।

¹⁰जेसरा तुस्से कुछ माफ करहा ऐं तेता जो हांऊँ भी माफ करहा, हांऊँ तिन्हो तुस्सा रे फायदे रे कठे मसीह रे हका ले माफ करहा।

¹¹ताकि सैताना री चलाकी आस्सा पर कामयाब नी हो, क्यूंकि आस्से तेसरी सारी चाला जो जाणांहे।

¹²होर जेबे हांऊँ मसीह री खुसी री खबर सुनाणे रे कठे त्रोआस सैहरा मन्झ आया, ता प्रभुऐ मेरे कठे प्रचार करणे रे कठे एक द्वार खोल्ही दितेया।

¹³मेरा तितुस भाई तुस्सा री कोई खबर लेई किन्हें मेरे वाले नी आया, जेता ले मेरे मना जो चैन नी मिल्या। इधी कठे हांऊँ त्रोआस सैहरा रे विस्वासी लोका ले विदा हुई किन्हें मकीदुनिया ईलाके जो चली गया ताकि हांऊँ तितुसा जो तोपी सकूं।

¹⁴परमेसरा रा धन्यावाद हो, जेह्ड़ा आस्सा जो मसीह मन्झ वास करणे री वजहा ले हमेसा आपणे साउगी लेई चला होर आस्सा जो जीताई देआ, होर आस्सा रे ज्रीए मसीह जो जाणने री मीठी खुसबू हर जगहा फैलाहां।

¹⁵क्यूंकि आस्सा री जिन्दगी परमेसरा रे वाले पूजणे वाली मसीह री मीठी खुसबू साहीं ई। होर आस्सा रा प्रचार मीठी खुसबू साहीं उद्धार पाणे वाले, होर नास हूणें वाले, दुंहीं वाले पुज्हा।

¹⁶ये खुसबू नास हूणें वाले लोका जो मरणे रे कठे मौता री मुस्क ई, होर उद्धार पाणे वाले लोका रे कठे जीवना देणे रे कठे जिन्दगी री खुसबू ई। होर सच्चे कोई भी आपणे आपा ले एस खुसबू जो फैलाणे रे लायक नी आ।

¹⁷क्यूंकि आस्से तिन्हा साहीं नी ऐं, जो परमेसरा रे बचना रा प्रचार अमीर हूंणे रे कठे करहा ऐं; बल्की ये जाणी किन्हें कि आस्से परमेसरा रे भेजिरे। आपणी मना री सच्चाई किन्हें मसीह रे हका रे ज्रीए परमेसरा री उपस्थिति मन्झ तेसरे बचना रा प्रचार करहा ऐं।