Read Mandeali 2 कुरिन्थियो 4 Bible Online

2 कुरिन्थियो 4 - Mandeali bible

2 कुरिन्थियो 4

¹इधी कठे जेबे आस्सा पर परमेसरा री एह्ड़ी दया हुई कि, आस्सा जो परमेसरा रे बचना जो प्रचार करणे री सेऊआ मिली, ता आस्से हिम्मत नी हारदे।

²बल्की आस्से ता बेज्जती री गल्ला होर गुप्त काम करणा छाडी दिते, ना आस्से चलाकी करहा ऐं, होर ना आस्से परमेसरा रे बचना मन्झ मिलावट करहा ऐं, बल्की परमेसरा रे साम्हणें सिर्फ सच्चाई री गल्ला बोल्हा ऐ। होर हर माह्णुं एस गल्ला री गुआही देई सकां कि आस्से सच्चे ऐं।

³अगर आस्से जेस खुसी री खबरा रा प्रचार करहे, तेस पर परदा पईरा हो, ता ये नास हूणें वाले रे कठे ई पईरा।

⁴होर तिन्हा अविस्वासी लोका रे कठे, जिन्हारी बुद्धि ऐस संसारा रे इस्वर सैताने काणी करी दितीरी, ताकि स्यों मसीह री खुसी री खबरा जो होर तेसरी महिमा जो नी समझी सके। होर मसीह ही परमेसरा रा स्वरूप आ।

⁵क्यूंकि आस्से आपणे आपा जो नी, बल्की यीसू मसीह रा प्रचार करहा ऐं कि मसीह यीसू ही प्रभु आ। होर तिन्हें ही आस्से तुस्सा रे सेऊआदार हूंणे रे कठे भेजिरे।

⁶इधी कठे परमेसरे बोल्या कि, “नह्यारे मन्झा ले प्रयासा चमके,” होर सेई परमेसर समझ रूपी चमका जो आस्सा रे दिला चमका आ, ताकि आस्से यीसू मसीह मन्झ परमेसरा री महिमा जो देखी सके।

⁷आस्से तिन्हा माटे रे भांडे साहीं ऐं जिन्हा मन्झ धन रखिरा आ। एता ले गल ये साफ हुई जाहीं कि ये असीम सामर्थ आस्सा री तरफा ले नी, बल्की परमेसरा री तरफा ले ई।

⁸आस्से चहुँ वखा ले दुःख ता काटहा ऐं, पर पिसदे नी ऐं; आस्से घबराई गईरे, पर आस्से दुआस नी हुन्दे।

⁹सताये ता जाहें; पर छाडी नी जान्दे; गिराये ता जाहें, पर खत्म नी हुन्दे।

¹⁰आस्से हमेसा तिन्हा गल्ला जो आपणे सरीरा मन्झ सैहन करहे, जेहड़ी यीसूऐ मरदे हुए सैहीरा था; ताकि आस्सा रे कामा ले लोक यीसू री जिन्दगी रे बारे मन्झ जाणी सके।

¹¹क्यूंकि आस्से जिन्दे जी हमेसा यीसू री वजहा ले मौता रे खतरे मन्झ रहे, ताकि यीसू री जिन्दगी भी आस्सा रे मरणे वाले सरीरा मन्झ जाहिर हो।

¹²एसरा मतलब आस्से ता लगातार मौता रा साम्हणा करहे, पर एसरी वजहा ले तुस्सा जो अनंत जिन्दगी मिली।

¹³पर आस्से खुसी री खबर सुणांदे रहे क्यूंकि आस्सा रा से ही विस्वास आ जेहड़ा भजन लिखणे वाले रा था, जेबे तिन्हें पवित्र सास्त्र मन्झ एह्ड़ा लिख्या कि, “मैं विस्वास कितेया, इधी कठे ग्लाया।”

¹⁴क्यूंकि आस्से जाणहां ऐं, जिन्हें प्रभु यीसू जो मरिरे लोका मन्झ जिउंदा कितेया, से ही परमेसर आस्से भी मसीह यीसू साहीं जिउंदे करणे, होर तुस्सा साउगी आस्से भी आपणे उपस्थिति मन्झ लेई जाणे।

¹⁵क्यूंकि जो भी दुःख आस्से सैहण कितिरे से तुस्सा रे फायदे रे कठे, ताकि परमेसर रा अनुग्रह ज्यादा ले ज्यादा लोका जो मिले, होर बौह्त सारे लोक परमेसरा री महिमा रे कठे तिन्हारा ज्यादा ले ज्यादा धन्यावाद करणा।

¹⁶इधी कठे आस्से हिम्मत नी हारदे; जेब्की आस्सा रा सरीर मजे-मजे मरदा लगिरा, पर तेबे भी आस्सा रे अंदर आस्सा री आत्मा रोज-रोज नौंईं हुन्दी जाहीं।

¹⁷क्यूंकि आस्सा री ऐबे री ये परेसानिया बौह्त छोटी होर स्यों लम्बे टैमा तक नी टिकणी। पर इन्हा परेसानिया री वजहा ले आस्सो जुग-जुग री महिमा मिलणी, जो तिन्हा सब चीज़ा ले बढ़ी किन्हें ई, जेसरे बारे मन्झ समझाणा नामुमकिन आ।

¹⁸होर आस्से ता देखिरी चीजा जो नी बल्की अनदेखी चीजा जो देखदे रैंहयां ऐं, क्यूंकि देखीरी चीजा थोड़े ई ध्याड़े री ई, पर अनदेखी चीजा सदा बणीं रहीं।