Read Mandeali 2 कुरिन्थियो 5 Bible Online

2 कुरिन्थियो 5 - Mandeali bible

2 कुरिन्थियो 5

¹क्यूंकि आस्से जाणहां ऐं कि, एस संसारा मन्झ आस्सा रा सरीर एक डेरे साहीं आ, जेस मन्झ आस्से रहे। होर जेबे ये डेरा ढई जाणा यानि आस्सा मरी जाणा, ता आस्सा जो परमेसरा री तरफा ले स्वर्गा मन्झ एक एह्ड़ा डेरा मिलणा, जो माह्णुंआं रे हाथा रा बणाईरा नी पर जुग-जुग रे कठे हूंणां।

²एस सरीरा मन्झ रैहन्दे हुए ता आस्से रोहां धोहां ऐं, होर बड़ी इच्छा रख्हा ऐं; कि आस्सा आपणे स्वर्गीय सरीर पैन्ह्णा।

³होर जेबे आस्सो तेस स्वर्गीय सरीरा जो पाई लैन्घे, तेबे आस्से तेस सरीरा बगैर नी पाए जाणे।

⁴होर आस्से ऐस सरीर रूपी डेरे मन्झ रैहन्दे हुये बोझा हेठ दभी किन्हें रोहें-पिट्हा ऐं; क्यूंकि आस्से इन्हा सांसारिक सरीरा जो छाडणा नी चाहन्दे, पर आस्से ये चाहें कि परमेसर आस्सो स्वर्गीय सरीर देई दे, ताकि ये मरणे वाले सरीर नी मरणे वाले सरीरा मन्झ बदली जाए।

⁵से परमेसरा आ, जिन्हें आस्से एस नंऊँऐं सरीरा जो पाणे रे कठे त्यार कितिरा। तिन्हें आस्सो पवित्र आत्मा ये पक्का करणे रे कठे दितिरी कि तेस सच्चे ही आस्सो नंऊँआं सरीर देणा।

⁶इधी कठे आस्से हमेसा हिम्मत रख्हा ऐं होर ये जाणहां ऐं; कि जेबे तक आस्से सरीरा मन्झ रैंहयां ऐं, तेबे तक आस्से परमेसरा साउगी स्वर्गा मन्झ नी रैहन्दे।

⁷क्यूंकि आस्से प्रभु यीसू रे रूप जो देखी किन्हें नी, पर तेस पर विस्वास रखणे री वजहा ले जीएं।

⁸इधी कठे आस्से हिम्मत रख्हा ऐं, होर मरणे रे बाद एस सरीरा जो छाडी किन्हें प्रभु साउगी रैंह्णां होर भी खरा समझ्हा ऐं।

⁹ऐस वजहा ले आस्सा रे मना री इच्छा येई कि, चाहे आस्से स्वर्गा मन्झ परमेसरा साउगी रहे, चाहे धरती मन्झ तेस ले दूर रहे, पर आस्से तेस जो खरे लगदे रहे।

¹⁰क्यूंकि ये जरूरी आ कि, मसीह आस्सा सभिरा न्याय करहे, ताकि हर एक माह्णुं आपणे-आपणे भले बुरे कामा रा इनाम मिले, जो तिन्हें आपणे सरीरा रे ज्रीए कितिरे हो।

¹¹इधी कठे प्रभु रा डर मनी किन्हें आस्से लोका ले अर्ज करहा ऐं कि स्यों सच्चाई पर विस्वास करहे, होर परमेसरा जाणहां कि सच्चे आस्से कुणहें। होर मेरी उम्मीद येई कि, सच्चमुच तुस्से भी आपणी अन्तरात्मा मन्झ आस्सो जाणी लो।

¹²आस्से फेरी भी आपणी बड़ाई तुस्सा रे साम्हणें नी करदे बल्की आस्से आपणे बारे मन्झ तुस्सा जो गर्व करणे रा मौका देहां ऐं, ताकि तुस्से तिन्हा लोका जो जवाब देई सको, जो मना पर नी, बल्की बाहरी कामा पर बडयाई करहा ऐं।

¹³अगर कोई बोले कि आस्से होसा मन्झ नी ऐं, ता से परमेसरा रे कठे ऐं; होर अगर कोई बोले आस्से स्याणें ऐं, ता से तुस्सा रे कठे ऐं।

¹⁴क्यूंकि मसीह रा प्यार आस्सा जो मजबूर करहा, इधी कठे आस्से पूरा विस्वास करहे कि जेबे मसीह सभी लोका रे कठे मरेया ता आस्से ये भी विस्वास करहे कि आस्से भी आपणी पुराणी जिन्दगी रे कठे मरी चुकिरे।

¹⁵होर मसीह इधी कठे सभी रे कठे मरी गया, ताकि जो लोक जिउंदे ऐं, स्यों अगे जो आपणे कठे नी जीये बल्की तेसरे कठे जीये, जो तिन्हारे कठे क्रूसा प्रयाल्हे मरेया होर दबारा जिउंदा हुआ।

¹⁶इधी कठे ऐबे ले आस्से केसी जो भी माह्णुंआं री नजरा ले नी देखणा, होर अगर आस्से मसीह जो भी माह्णुंआं री नजरा ले देखे थे, पर ऐबे ले आस्सा से एह्ड़ा नी देखणा; क्यूंकि ऐबे आस्से तेस जो जाणी गईरे।

¹⁷इधी कठे अगर कोई मसीह पर विस्वास करहा, ता से नौंईं सृस्टी ई। पुराणी गल्ला बीती गई; होर स्यों सभ गल्ला नौंईं हुई गईरी।

¹⁸होर सब गल्ला परमेसरा री तरफा ले ई, जिन्हें मसीह रे ज्रीए आस्सा रे साउगी मेल मिलाप कितेया। होर आस्सा जो, लोका किन्हें परमेसर साउगी मेल मिलापा कुराणे री सेऊआ सौंपी दिती।

¹⁹होर एस नौखे मेल मिलापा री खबर जो आस्सो सौंपीरी से येई कि परमेसरे मसीह रे ज्रीए संसारा रे लोका रा मेल मिलाप आपणे साउगी करी लया। परमेसरे लोका रे पापा रा दोस तिन्हा पर नी ल्गाया होर स्यों माफ करी दिते।

²⁰इधी कठे आस्से मसीह रे राजदूत ऐं। मानो परमेसर लोका ले आस्सा रे ज्रीए अर्ज करहा कि स्यों तेस मेल मिलापा री खबरा जो अपनाई ले: आस्से मसीह री वखा ले अर्ज करहा ऐं कि, परमेसरा साउगी मेल मिलाप करी लऊआ।

²¹मसीह जो पापा ले अनजाण था, तेस जो ही परमेसरे आस्सा रे कठे पापी बणाया, ताकि आस्से परमेसरा री नजरा मन्झ धर्मी माह्णुं बणी जाये, क्यूंकि मसीहे आस्सा रे पापा री सजा जो आपणे गास लेई लितिरा।