Read Mandeali 2 कुरिन्थियो 6 Bible Online

2 कुरिन्थियो 6 - Mandeali bible

2 कुरिन्थियो 6

¹आस्से परमेसरा साउगी काम करणे मन्झ लगिरे, आस्से ये अर्ज करहा ऐं कि, परमेसरा रा अनुग्रह जो तुस्सा पर हुईरा, तेस जो तुस्से बेकार नी जाणे देऊआ।

²क्यूंकि पवित्र सास्त्रा मन्झ परमेसर बोल्हा, “होर जेबे सही टैम आया मैं तुस्सा री सुणीं, होर उद्धारा रे ध्याड़े मैं तेरी मदद किती।” सुणा, ऐबे ही सही टैम आ; होर ये ही से ध्याड़ा आ जेस ध्याड़े तुस्सा उद्धारा पाणा।

³परमेसरा साउगी काम करदे हुए आस्सा रा व्यवहार केसी रे कठे कोई भी बाधा नी पांदा, ताकि एह्ड़ा नी हो कि स्यों आस्सा री सेऊआ पर दोस लगाये।

⁴पर हर गल्ला मन्झ हर तरीके किन्हें आस्से ये जाहिर करहे कि आस्से सच्चमुच परमेसरा रे सेऊआदार ऐं। क्यूंकि आस्से हमेसा दुखा मन्झ धीरज रखे, हालांकि आस्सा जो बौह्त सारी कठिनाई होर संकटा हुईरे।

⁵आस्से कोड़े खाधे, आस्सा जो जेल्हा मन्झ पाई दितेया, होर दंगे फसादा मन्झ आस्सो चोट लगी। आस्से बढ़ी मैहनत किती, बगैर सोये होर बगैर खाणे-पीणे रे रहे।

⁶पर आस्से आपु जो पवित्र रखेया, होर समझदारी से काम कितिरा, आस्से धीरज रखेया होर दूजेया पर दया कितिरी, पवित्र आत्मा आस्सा साउगी रैंह्यां होर आस्सा रा प्यार सच्चा।

⁷आस्से सच्चाई री खबर सुणाई, होर परमेसरा री सामर्थे आस्सा मन्झ काम कितेया। आस्से सीधे हाथा ले हमला करणे रे कठे होर पूठे हाथा ले बचाव करणे रे कठे धार्मिकता रे हथियारा रा इस्तेमाल करहे। इन्हा सभ गल्ला ले पता लगां कि आस्से परमेसरा रे सेऊआदार ऐं।

⁸चाहें लोके आस्सा री इज्जत किती या बेज्जती किती, या तारीफ किती या बुराई किती, आस्से हमेसा आपणे बारे मन्झ सच्च ही बोल्या, भले लोक आस्सो कपटी ही बोल्हे।

⁹भले ही आस्से दूजेया रे कठे अजनबी ऐं, पर तुस्से आस्सा जो ढंगा किन्हें जाणाये। एह्ड़ा लगा कि आस्से मरदे ही लगिरे पर फेरी भी आस्से हाले भी जिऊन्दे ऐं। आस्सा जो सजा मिली पर कधी केसिए आस्से जानी ले नी मारे।

¹⁰पर आस्से हमेसा दुखा रे टैमा भी खुसी म्नांहें। हलांकि आस्से आपु ता गरीब ऐं, पर कईया जो आत्मिक रूपा ले अमीर बणाई दितिरा। होर आस्सा वाले आपणा कुछ नी हाया, पर फेरी भी सब कुछ आस्सा रा आपणा। होर येही गल्ला जाहिर करही कि आस्से परमेसरा से सेऊआदार ऐं।

¹¹हे कुरिन्थुस सैहरा रे विस्वासी लोके, आस्से तुस्सा किन्हें सच्ची गल्ला बोल्हे, आस्से पुरे दिला ले तुस्सा जो चाहें ऐं।

¹²तुस्सा रे कठे आस्सा रा प्यार कधी कम नी हुआ, पर तुस्सा रा प्यार आस्सा रे कठे घटी गईरा।

¹³पर आपणे बाल बच्चे जाणी किन्हें हांऊँ तुस्सा किन्हें बोल्हा कि, तुस्से भी आस्सा रे प्यार रे बदले मन्झ आस्सा किन्हें पुरे दिला किन्हें प्यार करहा।

¹⁴अविस्वासी लोका साउगी केसी तरीके रा नाता मत रखा। क्यूंकि धार्मिक कामा रा अधर्मा रे कामा साउगी कोई बराबरी नी। होर ना ही प्रयासे रा नह्यारे साउगी कोई रिस्ता आ।

¹⁵होर मसीह रा सैताना साउगी कोई रिस्ता नी आ। होर विस्वासी लोका रा अविस्वासी लोका साउगी कोई मेल नी आ।

¹⁶होर मूर्तिया री परमेसरा रे मन्दरा मन्झ कोई जगहा नी। क्यूंकि आस्से ता जिन्दे परमेसरा रे मन्दर ऐं, जेह्ड़ा परमेसरे पवित्र सास्त्रा मन्झ बोलिरा कि, “मां इन्हा लोका साउगी रैहणां, होर तिन्हारे बीचा मन्झ चल्या फिरया करणा; होर मां तिन्हारा परमेसर हूंणां, होर तिन्हा मेरे लोक हूंणां।”

¹⁷इधी कठे प्रभु पवित्र सास्त्रा रे ज्रीए आस्सा किन्हें बोल्हा, “अविस्वासी लोका रे बीचा मन्झा ले बाहर निकला होर आपणे आपा जो तिन्हा ले लग रखा; असुद्ध चीजा किन्हें कोई रिस्ता मत रखा, तेबे मां तुस्से ग्रैहण करणे।”

¹⁸“होर मां तुस्सा रा बापू हूंणां, होर तुस्सा मेरे मह्ठे होर मह्ठीया हूंणां; ये सर्वसक्तिमान प्रभु परमेसरा रा बचना आ।”