Read Mandeali 2 कुरिन्थियो 8 Bible Online

2 कुरिन्थियो 8 - Mandeali bible

2 कुरिन्थियो 8

¹ऐबे हे भाईयो बैहणो, आस्से तुस्सा जो मकीदुनिया ईलाके री कलीसिया रे लोका पर हुई परमेसरा रे अनुग्रहा रे बारे मन्झ दसणा चाहें।

²तिन्हें बड़ी परेसानिया रा सामना कितेया, होर स्यों बौह्त गरीब भी थे, फेरी भी तिन्हें बड़ी खुसी साउगी होर बढ़ी उदारता किन्हें दूजे विस्वासी लोका री मदद करणे रे कठे ढब्बे दिते।

³होर तिन्हारे बारे मन्झ मेरी ये गुआही ई कि, जितना जे हुई सकां था तिन्हें दितेया, बल्की तिन्हें तेता ले भी बढ़ी किन्हें दितेया, होर तिन्हें ये काम आपणी पूरी इच्छा ले कितेया।

⁴तिन्हें लोके आस्सा किन्हें बौह्त अर्ज करी किन्हें ये ईजाजत लैणी चाही कि यरुस्लेम सैहर मन्झ रैहणे वाले परमेसरा रे पवित्र लोका री मदद करणे री खुसी मन्झ हाजिर हुई सके।

⁵आस्से एह्ड़ा नी सोचा था कि तिन्हा एस तरीके किन्हें ढब्बे देणे, पर सभी ले पैहले तिन्हें प्रभु रे कठे आपणे आपा जो सौंपी दितेया, फेरी परमेसरा री इच्छा रे मताबक आपणे आपा जो आस्सा रे कठे देई दितेया।

⁶इधी कठे आस्से तितुसा ले अर्ज किती कि, जिहां तिन्हें ढब्बे कठ्ठा करणे रा काम सुर्हू कितेया था, सेई एस भले कामा जो भी पूरा करहे।

⁷तुस्से सब गल्ला मन्झ दूजेया ले बढ़िया करहा ऐं। तुस्सा रा विस्वास पक्का आ, तुस्से परमेसरा रे बचना रा प्रचार करणे रे लायक ऐं, होर तुस्सा जो ज्यादा ज्ञान भी आ। तुस्से दूजेया री मदद करणे रे कठे यत्ना करहा ऐं, होर आस्सा किन्हें दूजेया ले ज्यादा प्यार करहा ऐं। ऐबे तुस्सा री कोसिस ये हो कि तिहां ही गरीब विस्वासी लोका जो ढब्बे देणे रे कामा मन्झ भी बढ़दे जाऊआ।

⁸हांऊँ तुस्सा जो कोई हुक्म नी देंदा लगिरा, हांऊँ सिर्फ दूजे लोका री हिम्मता री तुलना तुस्सा रे प्यारा किन्हें करेया करहा, ताकि तुस्सा रे प्यारा री सच्चाई जो परखी सकूं।

⁹आस्सा रे प्रभु यीसू मसीह रे अनुग्रह जो तुस्से ठीक ढंगा किन्हें जाणहां ऐं कि, से अमीर हुई किन्हें भी तुस्सा रे कठे गरीब बणी गया ताकि तेसरे गरीब हुई जाणे ले तुस्से अमीर हुई जाओ।

¹⁰पिछले साल सभी ले पैहले तुस्से ही थे जिन्हें ढब्बे दिते होर देणे री इच्छा मन्झ भी सभी ले अगे थे। होर एस बारे मन्झ मेरी सलाह ये ही कि तुस्सा रे कठे ये खरा कि जो काम तुस्से सुर्हू कितेया था तेता जो पूरा करा। होर एस कामा जो खत्म करणे मन्झ उत्साही बणी रहा, जिहां एतो सुर्हू करणे मन्झ तुस्से उत्साही थे। जो कुछ तुस्सा वाले हाया तेता ले ही एस कामा जो पूरा करहा।

¹²क्यूंकि अगर तुस्सा रे ढब्बे देणे री इच्छा ई ता जो कुछ तेस वाले आ, तेता रे मताबक ई तेसरा दान ग्रैहण भी हूंणां, ना कि तेता रे मताबक जो तेस वाले नीआ।

¹³आस्सा रा मतलब ये नी कि, होरी जो मदद करणे री वजहा ले तुस्से आपु दुखा मन्झ पई जाओ, पर इतना कि सभ वाले बराबर हो।

¹⁴पर एस टैमा मन्झ ता तुस्सा री बढ़ती तिन्हारी ज्रूरत जो पूरी करणे रे कठे भतेरी, पर एह्ड़ा भी हुई सक्हा कि जेबे तुस्सा जो ज्रूरत पो, तेबे तिन्हा आपणी बढ़ती मन्झ ले तुस्सा री मदद करणी। तेबे दुहीं एक बराबर हुई जाणे।

¹⁵जिहां पवित्र सास्त्रा मन्झ लिखिरा कि, “जिन्हें बौह्त कठा कितेया तेस वाले ज्यादा कुछ नी बच्या, होर जिन्हें कम कठा कितेया तेस वाले भतेरा था।”[1]

¹⁶परमेसरा रा धन्यावाद हो कि, जो फिकर मुंजो तुस्सा रे बारे मन्झ हुंहाँ ईं, ठीक तेह्ड़ी ई फिकर परमेसरे तुस्सा रे बारे मन्झ तितुसा रे मना मन्झ पाई दिती।

¹⁷जेबे आस्सा तेस ले अर्ज किती कि आई किन्हें तुस्सा किन्हें मिली ले ता तिन्हें आस्सा री अर्ज मनी लई, होर से ज्यादा उत्साही हुई किन्हें आपणी इच्छा ले तुस्सा वाले गया।

¹⁸होर आस्से तितुसा साउगी एक विस्वासी भाई भेजिरा, होर सभ कलीसिया रे विस्वासी लोक तेस जो सराहें क्यूंकि से खुसी री खबरा रा प्रचार बौह्त खरे तरीके किन्हें करहा।

¹⁹होर सिर्फ इतना ई नी, बल्की तेस जो कलीसिया रे लोका रे ज्रीए नियुक्त भी कितेया गया, ताकि ऐस ढब्बे देणे रे कामा रे कठे से आस्सा साउगी चले। आस्से ये सेऊआ इधी कठे करहा ऐं, ताकि प्रभु री महिमा हो, होर यरुस्लेम सैहरा रे विस्वासी लोका जो मदद करणे मन्झ आस्सा री हिम्मत जाहिर हुई जाए।

²⁰तितुसा साउगी तेस विस्वासी भाई जो भेजी किन्हें आस्से ऐस गल्ला मन्झ चतन्न रैंहयां ऐं कि, एस ढब्बे देणे री मददा री रकमा रे हिसाब किताब रे बारे मन्झ केसी जो भी आस्सा पर दोस लगाणे रे कठे कोई मौका नी मिले।

²¹क्यूंकि आस्से एस गल्ला री फिकर कि ना सिर्फ प्रभु रे साम्हणें बल्की माह्णुं रे साम्हणें भी हर गल्ला जो ठीक ढंगा किन्हें करी सके।

²²होर आस्से तितुस होर दूजे लोका साउगी आस्से आपणा एक होर विस्वासी भाई भेजदे लगिरे, जेस जो आस्से बार-बार परखी किन्हें बौह्त सारी गल्ला मन्झ उत्साही पाया। पर ऐबे तुस्सा पर तेस जो बड़ा भरोसा, ऐस वजहा ले से होर भी ज्यादा उत्साही आ।

²³अगर कोई तितुसा रे बारे मन्झ पुछे, ता बोल्या कि से मेरा साथी, होर तुस्सा रे कठे मेरा सैहकर्मी आ, होर अगर आस्सा रे विस्वासी भाईया रे बारे मन्झ पूछे, ता स्यों कलीसिया रे लोका रे ज्रीए भेजिरे लोक ऐं, होर स्यों मसीह रे नांऊँआं रा आदर बढ़ाए।

²⁴इधी कठे कलीसिया रे साम्हणें तुस्से आपणा प्यार होर तुस्सा रे कठे आस्सा री गर्वा री वजहा रा सबूत तिन्हा जो देआ।