Read Mandeali 2 कुरिन्थियो 9 Bible Online

2 कुरिन्थियो 9 - Mandeali bible

2 कुरिन्थियो 9

¹ऐबे एस ढब्बे रे बारे मन्झ जो यरुस्लेम सैहरा रे परमेसरा रे पवित्र लोका री सेऊआ रे कठे कठा कितेया जाहाँ, तिन्हारे बारे मन्झ मुंजो तुस्सा जो लिखणे री ज्रूरत नी ई।

²क्यूंकि हांऊँ पैहले ले तुस्सा रे मना री इच्छा जाणहां कि तुस्से तिन्हारी मदद करणे रे कठे त्यार ऐं; इधी कठे हांऊँ तुस्सा रे बारे मन्झ मकीदुनिया ईलाके रे विस्वासी लोका रे साम्हणें गर्व दस्हा ऐं कि, तुस्से अखाया ईलाके रे विस्वासी लोक ता पिछले एक साला ले एस सेऊआ रे कठे त्यार थे, होर तुस्सा रे उत्साहा री वजहा ले होर भी लोक उत्साहित हुई गये।

³बल्की मैं तुस्सा वाले तितुस होर तेसरे साउगी दो लोक इधी कठे भेज्दा लगिरा कि, आस्से जो गर्व तुस्सा रे बारे मन्झ दसेया, से एस गल्ला मन्झ बेकार ना ठैहरे; बल्की जेह्ड़ा मैं बोल्या तिहां ईं तुस्से भी यरुस्लेम सैहरा रे विस्वासी लोका जो ढब्बे देणे री मददा रे कठे त्यार रहो।

⁴एह्ड़ा नी हो कि, अगर मकीदुनिया ईलाके रे कोई विस्वासी भाई मेरे साउगी आये, होर तुस्सा वाले से ढब्बे त्यार नी हो, ता आस्सा रा जेह्ड़ा भरोसा तुस्सा पर आ, तेता री वजहा ले आस्से बेज्जत हूंणा, पर तुस्सा एता ले भी ज्यादा बेज्जत हूंणा।

⁵इधी कठे मैं विस्वासी भाईया साउगी अर्ज करणा ठीक समझ्या ताकि स्यों आस्सा ले पैहले तुस्सा वाले जाए, होर जो ढब्बे देणे रा वादा तुस्से कितिरा था तेस जो त्यार रखे, जो तुस्से कंजूसी री भावना ले नी, पर बड़ी उदारता री भावना ले दितिरा।

⁶बल्की गल ता येई कि, जो कम बोहां तेस कम ई काटणा; होर जो ज्यादा बोहां, तेस ज्यादा ई काटणा।[2]

⁷इधी कठे जिन्हें आपणे मना मन्झ जितना भी देणे रा फैसला कितिरा से उतना ई दे, बिना इच्छा ले या मजबूरी किन्हें नी दे, क्यूंकि “परमेसर खुसी किन्हें देणे वाले साउगी प्यार रख्हा।”[3]

⁸तुस्सा री जरूरता ले बढ़ी किन्हें परमेसर तुस्सा जो सब किस्मा रा अनुग्रह देई सक्हा ऐं। जेस ले हर गल्ला मन्झ होर हर टैम, सब कुछ, जो तुस्सा रे कठे जरूरी हो, तुस्सा वाले रहे, ताकि भले काम रे कठे तुस्सा वाले जरूरता ले भी ज्यादा हो।

⁹जिहां कि पवित्र सास्त्रा मन्झ लिखिरा, “परमेसर बड़ी उदारता किन्हें गरीबा जो दान देआ, होर तेसरी धार्मिकता हमेसा बणी रैंह्णी।”[4]

¹⁰से परमेसर ई आ जो बोणे वाले जो बेजा, होर खाणे वाले जो रोटी देहां। तिहां ई परमेसरा तुस्सा जो स्यों ससाधन देणे होर बढ़ाणे भी ऐं; जेसरे ज्रीए परमेसर तुस्सा सभी लोका मन्झ उदारता री एक बड़ी फसल काटणी।[5]

¹¹परमेसरा तुस्सा जो हर किस्मा रा आसरीवाद देणा, ताकि तुस्से हमेसा उदारता किन्हें देई सको। होर जेबे आस्से तुस्सा रे उदारता ले दितिरे दान जरूरता वाले लोका वाले लेई जाये तेबे तिन्हा परमेसरा रा बौह्त धन्यावाद करणा।

¹²क्यूंकि ऐस सेऊआ जो पूरा करणे ले, ना सिर्फ परमेसरा रे पवित्र लोका री घटी पूरी हुंहाँ ईं, बल्की तिन्हा लोका री तरफा ले परमेसरा रा बौह्त ज्यादा धन्यावाद देणे री वजह बणी जाहीं।

¹³क्यूंकि तुस्सा री मदद करणे रे कठे ढब्बे देणे री सेऊआ जो सबूत मनी किन्हें कई लोका परमेसरा री बड़ाई करणी, क्यूंकि तुस्से मसीह री खुसी री खबरा जो ग्रहण करी किन्हें मनी लितिरा, तिन्हा गरीब विस्वासी लोका री होर दूजे विस्वासी लोका री मदद करणे मन्झ उदारता जाहिर करदे रैंहयां ऐं।

¹⁴होर तिन्हा तुस्सा रे कठे परमेसरा ले प्रार्थना करणी। स्यों तुस्सा किन्हें प्यार करहा ऐं, क्यूंकि स्यों जाणांहे कि परमेसरे तुस्सा लोका पर बड़ा अनुग्रह कितिरा।

¹⁵परमेसरा रा तेस दाना रे कठे धन्यावाद करहे, जो तेसरा मह्ठा यीसू मसीह आ, जेस दाना रे बारे मन्झ कोई पूरा ब्खान नी करी सकदा।