Read Mandeali गलातियो 2 Bible Online

गलातियो 2 - Mandeali bible

गलातियो 2

¹चौदा साला ले बाद हांऊँ बरनबासा साउगी यरुस्लेम सैहरा जो गया होर हांऊँ तितुसा जो भी आपणे साउगी लेई गया।

²होर हांऊँ तेथी इधी कठे गया, क्यूंकि परमेसरे मुंजो दसिरा था कि हांऊँ तेथी जांऊँ। होर जेबे हांऊँ तेथी था ता सिर्फ जाणे-माने अगुवे किन्हें कल्हे मन्झ मिलेया, होर तेस खुसी री खबरा रे बारे मन्झ स्यों समझाए, जेसरे बारे मन्झ हांऊँ अन्यजाति लोका रे बीचा मन्झ प्रचार करदा आईरा। हांऊँ तिन्हा वाले इधी कठे गया ताकि जो काम मैं पिछले टैमा मन्झ कितिरा था, या जो ऐबे करेया करहा, से बेकार नी हुई जाए।

³हालांकि तितुस, जो मेरे साउगी आ से यूनान देसा रा रैहणे वाल़ा; होर तेसरा खतना नी हुईरा। पर यरुस्लेम सैहरा री कलीसिया रे जाणे-माने अगुवे तेस जो अपनाणे रे कठे अपनाणे ले नांह नी कितेया। होर तिन्हें तेस जो खतना कुराणे रे कठे भी मजबूर नी कितेया।

⁴तितुसा रा खतना नी कुराणा एक परेसानी बणी गई जेबे स्यों झूठे भाई[2] छुपी किन्हें आस्सा रे बीचा मन्झ आये, हालांकि हांऊँ कल्हे जे ही अगुवे किन्हें मिलिरा था। तिन्हें झूठे भाईए आस्सा री तेस अजादी जो नास करणे री कोसिस किती जो आस्सा जो आस्सा रे उद्धारकर्ता यीसू मसीह रे ज्रीए मिलिरी, ताकि स्यों दबारा आस्सा जो यहूदी धर्मा री व्यवस्था रा गुलाम बणाए।

⁵पर आस्से एक घड़ी रे कठे भी तिन्हारी गल नी मन्नी, ताकि तुस्से सच्ची खुसी री खबर पर विस्वास करदे रेहो, जो आस्से तुस्सा जो सखाईरी।

⁶पर यरुस्लेम सैहरा री कलीसिया रे जाणे-माने अगुवे मेरे उपदेसा साउगी कुछ होर नी जोड़ेया। स्यों अगुवे कुण थे एता ले मुंजो कोई फर्क नी पऊन्दा, क्यूंकि परमेसर बाहरा रा रूप देखी किन्हें न्याय नी करदा।

⁷पर एता ले उल्टा जेबे तिन्हें अगुवे देख्या कि, जिहां परमेसरे पतरसा जो यहूदी लोका जो खुसी री खबरा रा प्रचार करणे रा काम करणे रे कठे नियुक्त कितेया, तिहां ई गैर-यहूदी लोका जो खुसी री खबरा रा प्रचार करणे रे कठे हांऊँ नियुक्त कितेया।

⁸क्यूंकि परमेसरे जिन्हें पतरसा जो यहूदी लोका रे कठे चुणिरा चेला नियुक्त कितेया, तिन्हें ई हांऊ भी नियुक्त कितिरा था कि हांऊँ गैर-यहूदी लोका रे कठे चुणिरा चेला बणुं।

⁹याकूब, पतरस[3], होर यहून्ना जो कलीसिया रे जाणे-माने अगुवे समझी जाहें थे, तिन्हें तेस बरदाना जो पछयाणी लितेया, जो मुंजो मिलिरा। तिन्हें मेरे होर बरनबास साउगी आपणा हाथ मलाई किन्हें आस्से आपणे साथी बणाये। होर स्यों एस गल्ला ले मंजूर हुई गये कि आस्सा गैर-यहूदी लोका वाले जाणा, होर तिन्हा यहूदी लोका वाले जाणा।

¹⁰तिन्हें आस्सा किन्हें एक अर्ज किती कि आस्से यरुस्लेम सैहरा मन्झ रैहणे वाले गरीब विस्वासी लोका री मदद करहे; होर एस ई काम करणे रे कठे हांऊँ आपु भी कोसिस करेया करहा था।

¹¹पर बादा मन्झ जेबे पतरस अन्ताकिया सैहरा मन्झ वापस आई गया, ता एक बारी हांऊँ तेस जो विस्वासी लोका रे साम्हणें तेस पर प्रुआचेया, क्यूंकि से जो करी करहा था, से ठीक नी था।

¹²क्यूंकि से पैहले गैर-यहूदी विस्वासी लोका साउगी खांहां पिहां था, पर जेबे यरुस्लेम सैहरा ले याकूबा रे भेजीरे कुछ विस्वासी लोक अन्ताकिया सैहरा मन्झ आये, तेबे पतरसे यहूदी लोका रे डरा ले जो गैर-यहूदिया रा खतना कुराणा चाहें थे, तिन्हें गैर-यहूदी लोका साउगी खाणा-पीणा छाडी दितेया।

¹³पर तेसरे साउगी अन्ताकिया सैहरा रे कुछ होर विस्वासी लोके भी पाखंड कितेया, एथी तक कि बरनबासे भी डरा रे मारे गैर-यहूदी विस्वासी लोका साउगी मिलणा-जुलणा छाडी दितेया।

¹⁴पर जेबे मैं देख्या कि, स्यों खुसी री खबरा री सच्चाई रे मताबक आपणी जिन्दगी नी जींदे, ता मैं सभी विस्वासी लोका रे साम्हणें पतरसा किन्हें बोल्या कि, “तू यहूदी हुई किन्हें यहूदी लोका रे रीती रुआजा जो नी मनदा, पर गैर-यहूदी लोका रे रीती रुआजा जो मन्हा। होर अगर यहूदी हुई किन्हें तैं एह्ड़ा कितिरा ता तू गैर-यहूदी लोका जो आस्सा यहूदी लोका रे रीती रुआजा जो मनणे रे कठे किधियो बोल्हा?”

¹⁵आस्से जो जन्म-जाता ले यहूदी लोक ऐे, होर तिन्हा लोका साहीं नी ऐं, जिन्हें आस्से यहूदी लोक “पापी गैर-यहूदी” बोल्हे।

¹⁶आस्से यहूदी विस्वासी लोक जाणांहे कि माह्णुं मूसा री व्यवस्था जो मनणे ले परमेसरा री नजरा मन्झ धर्मी नी बणदा, पर सिर्फ यीसू मसीह पर विस्वास करणे ले ही परमेसरा री नजरा मन्झ धर्मी बणहां। इधी कठे आस्से आपु भी मसीह यीसू पर विस्वास कितेया कि, आस्से मूसा री व्यवस्था जो मनणे ले नी पर यीसू मसीह पर विस्वास करणे ले परमेसरा री नजरा मन्झ धर्मी बणी जाये। क्यूंकि व्यवस्था जो मनणे ले कोई भी माह्णुं परमेसरा री नजरा मन्झ धर्मी नी बणना।

¹⁷कुछ यहूदी लोक आस्सा जो पापी समझे, क्यूंकि परमेसरा री नजरा मन्झ धर्मी बणने रे कठे व्यवस्था जो मनणे रे बजाय आस्से सिर्फ मसीह पर भरोसा रख्हा ऐ, ता क्या एता रा मतलब ये हुआ कि मसीह आस्सा ले पाप कुराहां? नी, कधी नी।

¹⁸पर अगर हांऊँ दबारा ये मनी लू कि व्यवस्था जो मनणे ले एक माह्णुं परमेसरा री नजरा मन्झ धर्मी बणा, ता हांऊँ सच्चे पाप करहा।

¹⁹ये एह्ड़ा था कि हांऊँ व्यवस्था रे कठे मरी गया होर इधी कठे हांऊँ व्यवस्था री कैदा मन्झ नी आ ताकि परमेसरा जो आदर देणे रे कठे जी सकूं।

²⁰ये एह्ड़ा था जिहां हांऊँ मसीह साउगी तेसरे क्रूसा प्रयाल्हे मरी गया, हांऊँ से नी आ जो ऐबे भी जिउंदा, पर मसीह मेरे मन्झ जिउंदा। होर जेस तरहा ले ऐबे हांऊँ जिउंदा, ता सिर्फ परमेसर रे मह्ठे पर विस्वास करणे रे ज्रीए जिउंदा, जिन्हें मेरे किन्हें इतना प्यार कितेया कि तिन्हें आपणी जान मेरे कठे देई दिती।

²¹परमेसर आपणे अनुग्रहा री वजहा ले आस्सा जो धर्मी बणा। हांऊँ एस्सा गल्ला जो कधी भी नी नकारी सकदा, क्यूंकि व्यवस्था जो मनणे रे ज्रीए लोक परमेसरा री नजरा मन्झ धर्मी बणी जांदे, ता मसीह जो मरणे री जरूरत नी थी।