Read Mandeali गलातियो 5 Bible Online

गलातियो 5 - Mandeali bible

गलातियो 5

¹मसीहे आस्सा जो अजाद कितिरा, ताकि आस्से मूसा री व्यवस्था जो मनणे ले मुक्त हुई जाये। इधी कठे आपणी अजादी मन्झ मजबूत बणी रैहया, दबारा आपणे आपा जो व्यवस्था जो मनणे रे कठे गुलाम मत बनाऊआ।

²ध्याना किन्हें सुणा, हांऊँ पौलुस तुस्सा किन्हें क्या बोल्या करहा। परमेसरा री नजरा मन्झ धर्मी बणने रे कठे अगर तुस्से खतना कुरान्घे, ता मसीहे जो तुस्सा रे कठे कितिरा, तेता ले तुस्सा जो कोई फायदा नी हूंणा।

³हांऊँ एस्सा गल्ला जो दबारा बोला कि हर एक माह्णुं जो परमेसरा री नजरा मन्झ धर्मी बणने री इच्छा ले, जो कोई आपणा खतना कुराहां, तेस जो सारी यहूदी व्यवस्था मनणी पऊणी।

⁴तुस्से जो, मूसा री व्यवस्था मनणे रे ज्रीए परमेसरा री नजरा मन्झ धर्मी बणना चाहें, तुस्से सभीए मसीह साउगी आपणा रिस्ता तोड़ी दितिरा, होर आपणे आपा जो तेस अनुग्रह ले लग करी दितिरा, जेसरे ज्रीए परमेसरे तुस्सा रा उद्धार करी सका।

⁵हांऊँ ये गल बोली सका, क्यूंकि आस्सा जो पवित्र आत्मा रे ज्रीए ये पक्का कि परमेसरा आस्से आपणी नजरा मन्झ धर्मी बनाणे, क्यूंकि आस्से मसीह पर विस्वास करहे।

⁶अगर तुस्से मसीह यीसू रे चेले ता ये एस गल्ला ले फर्क पउन्दा कि तुस्से खतना कुराईरा या नी, पर सिर्फ एस गल्ला रा फर्क आ कि आस्से मसीह पर आपणे उद्धारकर्ता रे रूपा मन्झ विस्वास रखे, होर परमेसर होर दूजे लोका किन्हें प्यार करहे।

⁷मसीह साउगी आपणे रिस्ते मन्झ तुस्से भली भांति दोड़ेया करहा ऐं थे, ऐबे कुन्हें तुस्से रोकी दिते कि, सच्चाई जो नी मन्नो?

⁸एह्ड़ी गल्ला परमेसर तुस्सा जो नी स्खान्दा, जिन्हें तुस्से आपणी बच्चे बणने रे कठे सादिरे।

⁹चतन्न रहा, क्यूंकि लोक जेस कहाबता जो बोल्हे से सही आ कि, “थोह्ड़ा जे सीजणा ले गुन्धी रा पुरा आटा सीजी जाहाँ।”

¹⁰पर हांऊँ परमेसरा पर भरोसा करहा कि से तुस्सा जो इन्हा झूठे उपदेसा पर विस्वास करणे ले बचाणे। पर जो लोक तुस्सा रे मना जो असांत करी करहे, परमेसरा तिन्हो सजा देणी।

¹¹पर हे भाईयो होर बैहणो, हांऊँ प्रचार करी करहा कि खतने कुराणे री जरूरत नी, जो की यहूदी व्यवस्था रे बरखलाफ आ, होर इधी कठे यहूदी लोक मुंजो ऐबे तक स्ताया करहे। ता अगर हांऊँ क्रूसा रे बजाय लोका जो खतने कुराणे रे बारे मन्झ प्रचार करदा, ता यहूदी लोक मेरे ले नराज नी हुंदे।

¹²खरा हुन्दा कि, जो लोक तुस्सा रे मना जो असांत करी करहे, खतना कुराणे रे साउगी-साउगी स्यों आपणे आपा जो नामर्द बनाई लैंदे।

¹³हे भाईयो होर बैहणो, परमेसरे तुस्से अजाद हूंणे रे कठे सादीरे, होर इधी कठे व्यवस्था रे गुलाम मत बणा। एस्सा अजादी जो आपणी सरीरा री इच्छा जो पूरी करणे रा मौका मत समझा; एता रे बजाय प्यार किन्हें एक दूजे री सेऊआ करणे रे कठे, एस्सा अजादी जो इस्तेमाल करहा।

¹⁴क्यूंकि सारी व्यवस्था रा निचोड़ एस एक हुक्मा मन्झ आ कि, “तू आपणे पड़ोसी किन्हें आपणे साहीं प्यार कर।”[16]

¹⁵पर अगर तुस्से एक दूजे जो जानवरा साहीं काटहा-फाड़दे रहे, ता चतन्न रैहया कि, केतकी एक दूजे रा नास नी करी दो।

¹⁶पर हांऊँ बोल्हा कि, तुस्सा जो पवित्र आत्मा रे मताबक आपणी जिन्दगी जीणी चहिए, तेबे तुस्सा सरीरा री पापमय इच्छा जो पूरी नी करणी।

¹⁷क्यूंकि आस्सा री पापा री इच्छा पवित्र आत्मा रे बरखलाफ ई, होर पवित्र आत्मा पापा री इच्छा रे बरखलाफ ई; क्यूंकि ये एक दूजे रे व्रोधी ऐं। इधी कठे आस्से तिन्हा खरे कामा जो हमेसा नी करी पांदे जो आस्से करणा चाहें।

¹⁸होर अगर तुस्से पवित्र आत्मा रे मताबक आपणी जिन्दगी जीए, ता तुस्से मूसा री व्यवस्था रे अधीन नी रहे।

¹⁹तुस्से जाणांहे जो लोक पापा री इच्छा जो पूरी करहे स्यों केह्ड़े-केह्ड़े काम करहे; स्यों व्यभिचार होर गंदे काम करहे, तिन्हो भोग-बिलास करना खरा लगहा।

²⁰स्यों मूर्तिया री पूजा होर जादू टोणा करहे, स्यों आपणे साउगी लोका किन्हें नफरत करहे, एक दूजे किन्हें झगड़ा करहे, स्यों दूजेया री चीजा देखी किन्हें जल्नी करहे। तिन्हो एकदम गुस्सा आहूँआं, एक दूजे रा वरोध करहे, तिन्हारा साथ नी देणे वाले लोका ले राजी नी हुई किन्हें, जो लोक तिन्हारा साथ दे तिन्हा किन्हें जुड़ी जाये।

²¹स्यों एक दूजे किन्हें हिर्ख रखे, पी किन्हें मुताली जाये, होर धामा मन्झ रंगरलिया मन्नाहें, होर स्यों लोक एस तरीके रे होर भी बुरे-बुरे काम करहे। इन्हारे बारे मन्झ हांऊँ तुस्सा जो पैहले ले चेतावनी दितिरी थी होर ऐबे भी देहां कि, एह्ड़े-एह्ड़े काम करणे वाले परमेसरा रे राजा रे वारस नी हूंणे।

²²पर परमेसर रा आत्मा आस्सो जो गुण देहां से यूयाँ ऐं, प्यार, खुसी, सांति, सबर,

²³होर दया, भलाई, भरोसे रे लायक बणना, नम्रता, होर आपणे आपा पर काबू रखणा। एह्ड़ी कोई व्यवस्था नी जो इन्हा गुणा रा व्रोध करही।

²⁴होर जो उद्धारकर्ता यीसू मसीह रे लोक ऐं, तिन्हें आपणे पापमय जिन्दगी जो तेसरी बुरी इच्छा होर कामनाओं साउगी क्रूसा प्रयाल्हे मारी दितिरी।

²⁵जेब्की पवित्र आत्मे आस्सा जो नौंईं जिन्दगी दितिरी, ता आस्सा जो आपणी जिन्दगी पवित्र आत्मा रे मताबक जीणी चहिए।

²⁶आस्से घमंड करणे वाले नी बणे, एक दूजे जो गुस्सा नी दलाणे वाले बणे; होर ना एक दूजे किन्हें हिर्ख रखा।