Read Mandeali गलातियो 6 Bible Online

गलातियो 6 - Mandeali bible

गलातियो 6

¹हे भाईयो होर बैहणो, तुस्से जो आपणी जिन्दगी आत्मा रे मताबक जीये, अगर ये पता चले कि कोई विस्वासी अपराध मन्झ पखड़ी गईरा, ता बड़ी नम्रता साउगी तेस जो सही रस्ते पर आऊणें रे कठे तेसरी मदद करहा। होर आपणी भी चौकसी करा कि, तुस्से आपु भी एह्ड़ी परीक्सा मन्झ नी पई जाए।

²जेबे कोई परेसान मन्झ ऐं आ, ता तेसरी मदद करहा, होर इंहां करी किन्हें तुस्से मसीह री व्यवस्था[17] जो पूरी करणी।

³क्यूंकि अगर कोई कुछ नी हूंणे पर भी आपणे आपा जो बड़ा सम्झहा, ता आपणे आपा जो धोखा देहां।

⁴पर हर एक आपणे ई कामा जो परखी ले कि से खरा हाया की नी। होर अगर तिन्हें कुछ खरा कितिरा ता से आपणे कामा पर बडयाई करी सक्हा, पर तेस जो दूजे लोका रे कामा साउगी बराबरी नी करणी चहिए।

⁵क्यूंकि हर एक माह्णुंआं आपणे ही कामा री जिम्मेदारी चकणी।

⁶जिन्हा लोका जो परमेसरा रा बचना सखाई जाहाँ, तेस जो आपणे स्खाणे वाले साउगी आपणा सभ कुछ (पैसा या खाणा) साझा करहे।

⁷धोखा देख्या खांदे, केसी जो ये नी लगे कि से परमेसरा जो धोखा देई सक्हा, क्यूंकि माह्णुं जो कुछ आपणे कठे बाहां, सेई काटहा।

⁸क्यूंकि जो माह्णुं आपणे पापा रे स्वभाव रे मताबक काम करहा, तेसरे पापा रे स्वभावा से मौता री वखा जो लेई जाणा। पर जो माह्णुं परमेसरा री इच्छा रे मताबक काम करहा, आत्मा तेस जो अनंत जिन्दगी देणी।

⁹आस्से खरे काम करणे रे कठे हिम्मत नी छाडे; क्यूंकि अगर आस्से हार नी मनदे, ता आस्सा जो परमेसरा रे तय कितिरे टैमा पर इनाम मिलणा।

¹⁰इधी कठे जेबे भी आस्सो मौका मिले, आस्से सभी लोका रा भला करहे; खास करी किन्हें विस्वासी भाईया रा।

¹¹तुस्से देखी सके, ऐबे किहाँ हांऊँ आपणे ही हाथा किन्हें इन्हा बडे-बडे अक्सरा किन्हें तुस्सा रे कठे लिखी करहा।

¹²जो लोक खतना कुराणे रे कठे तुस्सा पर दबाब पाहें, स्यों एह्ड़ा इधी कठे करहे कि यहूदी लोक तुस्सा जो अपनाई ले। स्यों एह्ड़ा इधी कठे ही करहे ताकि लोक तिन्हो नी सताये, जेबे स्यों ये प्रचार करहे कि परमेसर लोका रा उद्धार करहा, जेबे स्यों एस गल्ला पर विस्वास करहे कि मसीह क्रूसा प्रयाल्हे मरी गया।

¹³क्यूंकि खतना कुराणे वाले यहूदी विस्वासी भी मूसा री सारी व्यवस्था जो नी मनदे, पर स्यों चाहें कि तुस्सा रा खतना हुई जाये, ताकि स्यों दूजे यहूदिया ले एस गल्ला पर बडयाई करी सके कि तुस्से इन्हारी वजहा ले खतना कुराईरा।

¹⁴हांऊँ क्रूसा प्रयाल्हे आस्सा रे प्रभु यीसू री मौता रे अलावा केसी होरी गल्ला पर बडयाई नी करणा चाहंदा। होर तेसरी मौता रे ज्रीए मानो ये संसार मेरे कठे, होर हांऊँ संसारा रे कठे क्रूसा प्रयाल्हे मरी गया।

¹⁵एता ले कोई फर्क नी पउन्दा कि तुस्से खतना कुराईरा या नी। पर फर्क एस गल्ला रा कि आस्से नौंईं सृस्टी मन्झ बदली रे या नी।

¹⁶जितने लोक एस नियमा जो मन्हें यानि परमेसरा रे सच्चे इस्राएल देसा रे लोक ऐे, परमेसरा तिन्हा सभी जो आपणी सांति देंदा रहे होर तिन्हा पर आपणी दया करदा रहे।

¹⁷अगे मुंजो कोई होर दुःख नी दे, क्यूंकि जो घाव[18] मेरे सरीरा मन्झ ऐं स्यों एस गल्ला जो दसे कि हांऊँ यीसू रा चुणिरा चेला।

¹⁸हे भाईयो होर बैहणो, हांऊँ प्रार्थना करहा कि आस्सा रा प्रभु यीसू मसीह तुस्सा जो अनुग्रह देंदा रैहे। आमीन।