Read Mandeali इफिसियो 2 Bible Online

इफिसियो 2 - Mandeali bible

इफिसियो 2

¹तुस्से पैहले आपणे अपराध होर पापा री वजहा ले मरिरे लोका साहीं थे; परमेसरा ले मिलणे वाली जिदंगी तुस्सा वाले नी थी।

²तेस टैम तुस्से एस संसारा रे लोका साहीं जिन्दगी जीये थे। होर तुस्से सैताना जो मन्हें थे, जो दुस्ट आत्मा रा अधिकारी हुई किन्हें आसमाना मन्झ राज करहा, जो ऐबे भी परमेसरा रे हुक्मा जो नी मनणे वाले लोका जो काबू मन्झ रखणे री कोसिस करहा।

³आस्से भी तिन्हा साहीं जिन्दगी जीये थे, आस्से भी आपणे पापा रे स्वभावा री इच्छा पूरी किती। आस्से से सब कुछ कितेया, जो आस्सा री सरीरा री बुरी इच्छा होर मना रे बिचार बोलणे जो करहे थे। सभ लोका साहीं आस्से भी स्वभावा ले बुरे थे, होर परमेसरा री सजा रे हकदार थे।

⁴पर परमेसरे जो बौह्त ज्यादा दयावान आ; तिन्हें आपणे तेस बड़े प्यारा रे कारण आस्सा किन्हें प्यार कितेया।

⁵जेबे आस्से पापा री वजहा ले मरिरे लोका साहीं थे, ता मानो परमेसरे आस्से मसीह साउगी दबारा जिउंदे किते। परमेसरा रे अनुग्रहा री वजहा ले आस्सा रा उद्धार हुईरा।

⁶मसीह यीसू साउगी एक हूंणे री वजहा ले परमेसरे आस्से मरिरे मन्झ ले जिउंदे किते, होर स्वर्गीय स्थाना मन्झ तेस साउगी बैठाया।

⁷परमेसरे एह्ड़ा इधी कठे कितेया, ताकि आऊणें वाले टैमा मन्झ से संसारा रे लोका जो दसी सके कि तेसरा अनुग्रह कितना महान आ। आस्से जो मसीह यीसू साउगी एक ऐं, आस्सा रे कठे जो कुछ परमेसरे कितेया, ये अनुग्रह तिन्हें आस्सो दसेया।

⁸क्यूंकि विस्वासा रे ज्रीए परमेसरा रे अनुग्रह ले ई तुस्सा रा उद्धार हुईरा, होर तुस्सा रा उद्धार तुस्सा री वजहा ले नी हुआ, पर ये परमेसरा रा दान आ।

⁹होर ये तुस्सा रे भले काम करणे री वजहा ले नी हुईरा, होर इधी कठे कोई एह्ड़ी वजहा नी कि तुस्से घमंड करहे।

¹⁰क्यूंकि आस्से परमेसरा रे हाथा री सभी ले बढ़िया रचना ई; होर मसीह यीसू साउगी एक हूंणे री वजहा ले आस्से भले काम करणे रे कठे बणाये गईरे, जिन्हा जो परमेसरे पैहले ले आस्सा रे करणे रे कठे त्यार कितिरा।

¹¹इधी कठे याद करा कि, तुस्से जन्मा ले ही गैर-यहूदी ऐं, होर यहूदी लोका तुस्सा रा मजाक ड़ुआयें कि, तुस्से खतना नी कुरांदे, होर स्यों खतना कुराहें, पर तिन्हें लोके ये खतना सिर्फ सरीरा रा कितिरा, पर दिला रा नी।

¹²तुस्से लोक तेस टैम मसीह जो नी जाणदे थे, होर परमेसरा रे चुणिरे लोक यानि इस्राएल देसा रे लोका मन्झ नी गिणी जांदे थे। होर परमेसरा रे लोका साउगी कितिरी वाचा रे भी साझीदार नी थे, होर एस संसारा मन्झ बगैर आस होर बगैर परमेसरा रे जिन्दगी जीये थे।

¹³एक टैम था जेबे तुस्से परमेसरा ले दूर थे, पर ऐबे तुस्से यीसू मसीह साउगी एक हूंणे री वजहा ले, मसीह रे बहाईरे खूना रे ज्रीए परमेसर तुस्सा जो आपणे वाले लेई किन्हें आईरा।

¹⁴क्यूंकि मसीहे ई आस्सा रे बीचा मन्झ सांति ल्यान्दी, पैहले मान्नो एक कान्धे यहूदी होर गैर-यहूदी लोका जो लग करी रखिरा था। स्यों एक दूजे किन्हें नफरत करहे थे, पर ऐबे मसीहे से कान्ध ढाली दितिरी, होर दुहीं जो एक करी दितिरा।

¹⁵क्रूसा प्रयाल्हे मसीहा री मौता रे ज्रीए तिन्हें मूसा री व्यवस्था जो तेसरी सारी बिधिया होर नियमा साउगी रद्द करी दितेया, ताकि से आपणे आपा मन्झ यहूदी होर गैर-यहूदी लोका रा मेल मिलाप कुराई किन्हें तिन्हो नऊँयें माह्णुं बणाई दे।

¹⁶होर क्रूसा प्रयाल्हे आपणी मौता रे ज्रीए मसीहे यहूदी होर गैर-यहूदी लोका रे बीचा मन्झ बैर-भाव खत्म करी किन्हें दुहीं जो एक बणाया, होर परमेसरा साउगी मेल-मिलाप कुराया।

¹⁷मसीह आया होर तुस्से गैर-यहूदी लोक जो परमेसरा ले दूर थे होर जो यहूदी लोक तेसरे नेडे थे, दुहीं जो मेल-मिलापा री खुसी री खबर सुणाई।[4]

¹⁸मसीह री वजहा ले होर एक ही पवित्र आत्मा रे ज्रीए आस्से सभ बापू वाले आई सके।

¹⁹इधी कठे ऐबे तुस्से गैर-यहूदी लोक परदेसी होर मूसाफर नी रहे, पर परमेसरा रे पवित्र लोका साउगी संगी स्वदेसी होर परमेसरा रे परिवारा रे सदस्य हुई गईरे।

²⁰तुस्से एक घरा साहीं ऐं जेसरी निंऊआं चुणिरे चेले होर नबीये, जेसरे कुणे रा पात्थर यीसू मसीह आपणे आप आ।[5]

²¹मसीह एस घरा जो जोड़ी रखा, होर एता जो प्रभु रे कठे एक पवित्र मन्दरा रे रूपा मन्झ बढ़ादां जाहाँ।

²²होर तुस्से गैर-यहूदी विस्वासी लोक भी मसीह यीसू साउगी एक हूंणे री वजहा ले, परमेसरा रे दूजे विस्वासी लोका किन्हें जुड़ी जाएं, ताकि तुस्से पवित्र आत्मा री सामर्था रे ज्रीए परमेसरा रे रैहणे रा घर बणी सको।