Read Mandeali इफिसियो 5 Bible Online

इफिसियो 5 - Mandeali bible

इफिसियो 5

¹इधी कठे परमेसरा रे प्यारे बच्चे हूणे रे नाते तुस्से परमेसरा साहीं बणने री कोसिस करा।

²एक दूजे किन्हें साउगी प्यारा किन्हें जिन्दगी जीया; जेह्ड़ा मसीहे भी तुस्सा किन्हें प्यार कितेया, होर तुस्सा रे पापा जो माफ करणे रे कठे आपणे आपा जो बलिदान करी दितेया। परमेसर एता ले खुस हुआ, क्यूंकि से बलिदान तेसरे कठे मीठी मुस्का साहीं था।[12]

³होर जेह्ड़ा परमेसरा रे पवित्र लोका रे खरा आ, तुस्सा मन्झ ना ता व्यभिचार, ना केसी किस्मा रे गंदे काम, होर ना पैसे रे लालचा री गल तक हो।

⁴तुस्से गंदी गल्ला होर वेवकुफी री गल्ला मत करा, होर ना ही भद्दे मजाक करो। क्यूंकि तुस्सा जो एह्ड़ी गल्ला करणा सोभा नी देंदी, बल्की तुस्से परमेसरा रा धन्यावाद ही करा।

⁵क्यूंकि तुस्से ये खरी तरीके किन्हें जाणहां ऐं कि, व्यभिचार करणे वाल़ा, या गन्दा आदमी, या लालची माह्णुं जो मूर्ति पूजणे वाले रे बराबर ऐं, यूँ त्राए मसीह होर परमेसरा रे राजा मन्झ विरासत नी पाई सकदे।

⁶कोई तुस्सा जो धोखा देई किन्हें तुस्सा जो भी आपणे साहीं बुरे काम नी कुराये, क्यूंकि इन्हा गल्ला री वजहा ले हुक्म नी मनणे वाले पर परमेसरा रा गुस्सा भड़क्हा।

⁷इधी कठे तुस्से तिन्हा साउगी मिली किन्हें ये पापा रे काम मत करा।

⁸क्यूंकि तुस्से ता पैहले नहयारे मन्झ थे पर ऐबे जेब्की तुस्से प्रभु साउगी एक बणी गईरे, ता तुस्से ज्योति मन्झ ऐं, होर इधी कठे प्रयासे मन्झ जीणे वाले साहीं आपणी जिन्दगी जीया।

⁹क्यूंकि अगर कोई एक माह्णुं प्रयासे मन्झ आ, ता तेस भलाई होर धार्मिकता रे काम करणे, होर आस्से तेस पर भरोसा करी सके।

¹⁰होर ये जाणने री कोसिस करहा कि, प्रभु जो क्या खरा लग्हा।

¹¹होर तिन्हा साउगी मिली किन्हें नहयारे मन्झ रैहणे वाले लोका साहीं बेकार काम मत करा, बल्की तिन्हारे पापा रे कामा रा भांडा फोड़ दो।

¹²क्यूंकि परमेसरा पर विस्वास नी करणे वाले लोक जो स्यों लुख्ही-लुख्ही किन्हें काम करहा ऐं, तिन्हारे बारे मन्झ गल्ला करणा भी सरमा री गल ई।

¹³क्यूंकि जेबे प्रयासा केसी चीजा पर चमका, ता से सभ चीजा जाहिर करहा, होर जेबे प्रयासा केसी चीजा जो जाहिर करहा से चीज आपणे आपा मन्झ प्रयासा बणी जाहाँ।

¹⁴एस वजहा ले लोक बोल्हे कि, “हे सोणे वाले जागी जा, होर मरिरे या मन्झा ले उठी जा; ता मसीह तुस्सा जो आपणा प्रयासा देणा।”

¹⁵इधी कठे ध्याना रखा कि, केह्ड़ी जिन्दगी जीया करहे; पर नर्क्कले साहीं नी पर बुद्धिमाना साहीं जीया।

¹⁶होर भलाई रे कठे समझदारी किन्हें हर मौके रा इस्तेमाल करहा, क्यूंकि ध्याड़े बुरे ऐं।[13]

¹⁷इधी कठे नर्क्कले मत बणा, पर समझदारी किन्हें ये जाणने री कोसिस करा कि, प्रभु क्या चाहां कि तुस्से करो।

¹⁸होर सराब पी किन्हें मुताली मत जाऊआ, क्यूंकि एता ले तुस्सा बेसरमा साहीं लुचपन करणे मन्झ पई जाणा, एता रे बजाय पवित्र आत्मा किन्हें भरी जाऊआ।

¹⁹अगर तुस्से पवित्र आत्मा किन्हें भरी जांघे, ता तुस्सा एह्ड़ा करणा कि जेबे भी तुस्सा कठ्ठा हूंणा, ता परमेसरा रे कठे भजन होर बड़ाई गान गाया करणा। होर दूजे भी गाणे गाया करहा जो पवित्र आत्मा तुस्सा जो देहां। होर आपणे-आपणे मना मन्झ प्रभु रे कठे गाणे गान्दे होर बड़ाई करदे रैहया।

²⁰होर जो कुछ आस्सा रे प्रभु यीसू मसीहे कितिरा, इधी कठे हमेसा सभ गल्ला रे कठे आस्सा रे बापू परमेसरा रा धन्यावाद करा।

²¹होर मसीह री इज्जत करदे हुए, एक दूजे रे अधीन रैहया।

²²हे लाड़ीयो, आपणे-आपणे लाड़े रे अधीन रैहया, जिहां तुस्से प्रभु रे अधीन रैहे।

²³क्यूंकि लाड़ा लाड़ी रा मूंड आ, जेह्ड़ा कि मसीह कलीसिया रा सिर आ; होर मसीह आपणे सरीरा रा यानि कलीसिया रा उद्धार करणे वाल़ा।

²⁴जिहां कलीसिया मसीह रे अधीन ई, तिहां लाड़ीया भी हर गल्ला मन्झ आपणे-आपणे लाड़े रे अधीन रहे।

²⁵हे लाड़ेयो, आपणी-आपणी लाड़ी किन्हें प्यार रखा, जेह्ड़ा मसीहे भी कलीसिया किन्हें प्यार करी किन्हें आपणी जान कलीसिया रे कठे देई दिती।

²⁶ताकि कलीसिया जो बचना रे ज्रीए पाणी किन्हें सुद्ध करी किन्हें पवित्र बणाई सके।

²⁷होर आपणी कलीसिया जो एक तेजस्वी कलीसिया बणाई किन्हें सभ लोका जो आपणी उपस्थिति मन्झ खड़ी करी सके। तेता मन्झ दाग, झुरिया, या एह्ड़ी कोई भी बुरी चीज नी हो, बल्की से पवित्र होर बेकसूर हो।

²⁸ठीक एस तरहा लाड़े भी आपणी-आपणी लाड़ीया किन्हें तिहां प्यार करहे जिहां से आपणे आपा ले करहा। जो आपणी लाड़ी किन्हें प्यार रख्हा, से आपु आपणे आपा किन्हें प्यार करहा।

²⁹क्यूंकि केसिए कधी आपणे सरीरा ले बैर नी रख्या, बल्की तेसरा पालन-पोसण करहा। मसीह भी कलीसिया साउगी एह्ड़ा ही करहा।

³⁰इधी कठे कि आस्से सभ एक ही सरीरा रे अंग ऐं।

³¹जिहां पवित्र सास्त्रा मन्झ लिखिरा कि, “एस वजहा ले माह्णुंआं आपणे माऊ बापू ले लग हुई किन्हें आपणी लाड़ी साउगी रैंह्णां, होर तिन्हा एक ही हूंणां।”[14]

³²एथी आस्सा जो समझणे रे कठे एक बौह्त गहरा उपदेस आ; पर जेथी तक मेरी गल ई, हांऊँ एस गल्ला री तुलना मसीह होर तेसरी कलीसिया किन्हें करहा।

³³पर ये गल तुस्सा जो भी लागू हुईं कि, तुस्सा मन्झा ले हर एक आपणी लाड़ी किन्हें आपणे साहीं प्यार करहा, होर लाड़ी भी आपणे लाड़े री इज्जत करहे।