Read Mandeali फिलिप्पियो 1 Bible Online

फिलिप्पियो 1 - Mandeali bible

फिलिप्पियो 1

¹हांऊँ पौलुस, तिमिथियुस साउगी ये चिठ्ठी लिखी करहा, होर आस्से यीसू मसीह रे सेऊआदार ऐं। हांऊँ ये चिठ्ठी फिलिप्पी सैहरा मन्झ रैहणे वाले परमेसरा रे पवित्र लोका रे कठे होर कलीसिया रे अगुवे होर सेऊआदारा रे नांऊँ लिख्या करहा।

²हांऊँ प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

³हांऊँ जेबे-जेबे तुस्सा जो याद करहा, तेबे-तेबे हांऊँ आपणे परमेसर रा धन्यावाद करहा।

⁴होर खुसी साउगी आपणी हर एक प्रार्थना मन्झ तुस्सा सभी रे कठे हमेसा परमेसरा ले सहायता री अर्ज करहा।

⁵इधी कठे कि, तुस्से पैहले ध्याड़े ले जेबे तुस्से खुसी री खबर पर विस्वास कितेया था ता आजा तक खुसी री खबर फैलाणे मन्झ मेरे साथी रहे।

⁶होर मुंजो एस गल्ला रा भरोसा आ कि, जेस परमेसरे तुस्सा मन्झ खरा काम सुर्हू कितिरा, तेस ई से काम यीसू मसीह रे दबारा वापस आऊणें रे ध्याड़े तक पूरा करणा।

⁷तुस्सा रे बारे मन्झ मेरा एह्ड़ा सोचना ठीक ई आ; क्यूंकि तुस्से सभी रे कठे मेरे मना मन्झ बौह्त खास जगहा ई। होर ऐबे जेबे हांऊँ जेल्हा मन्झ आ, होर तेबे जेबे हांऊँ खुसी री खबरा रा बचाव करणे होर एसरी सच्चाई जो जाहिर करणे रे कठे अजाद था, इन्हा दुहीं हालता मन्झ तुस्से सभ मेरे साउगी परमेसरा रे अनुग्रह जो बांडा ऐं थे।

⁸क्यूंकि परमेसर मेरा गुआह आ; कि हांऊँ मसीह यीसू रे प्यारा साहीं तुस्सा सभी जो देखणे कितना चाहां।

⁹होर हांऊँ ये प्रार्थना करहा कि, तुस्सा मन्झ सच्चाई रा ज्ञान होर सही फैसला लेणे री समझ बढ़दी रहे, होर एक दूजे किन्हें तुस्सा रा प्यार भी ज्यादा ले ज्यादा बढ़दे जाए।

¹⁰ताकि तुस्से खरी गल्ला जो चुणी सको होर मसीह रे दबारा वापस आऊणें रे ध्याड़े तक हर बुरी गल्ला ले दूर होर बेकसूर बणी किन्हें रैंहयां।

¹¹होर परमेसर री महिमा होर बड़ाई रे कठे तेस धार्मिकता रे भले कामा ले भरी जाऊआ, जो सिर्फ यीसू मसीह रे ज्रीए ही फला ऐं।

¹²हे भाईयो होर बैहणो, हांऊँ चाहां कि, तुस्से ये जाणी लो कि, जो कुछ मेरे पर बीतिरा, तेसरी वजहा ले खुसी री खबरा फैलाणे मन्झ मेरी मदद हुईरी।

¹³एथी तक कि महाराजे रे राजमहला री सारी पलटन होर बाकि लोका ये जाणी गईरे कि, मसीह रा सेऊआदार हूंणे री वजहा ले हांऊँ जेल्हा मन्झ आ।

¹⁴मेरे जेल्हा मन्झ हूंणे री वजहा ले प्रभु मन्झ बौह्त सारे विस्वासी भाई बैहणा जो होंसला मिलिरा। स्यों प्रभु पर विस्वास रखी किन्हें पैहले ले ज्यादा हिम्मता साउगी निधड़क हुई किन्हें परमेसरा रा बचन सुणां ऐ।

¹⁵ये सच्च आ की कुछ लोक मसीह रा प्रचार इधी कठे करहा ऐं क्यूंकि स्यों आस्सा ले हीर्ख रखे होर लड़ाई करहे, पर कुछ लोक खरी इरादे ले मसीहा रा प्रचार करहा ऐं।

¹⁶जो लोक खरी इरादे ले प्रचार करहे स्यों मसीह किन्हें प्यार करहे, होर जाणहां ऐं कि मुंजो मसीह रे खुसी री खबरा रा बचाव करणे री वजहा ले जेल्हा मन्झ पाईरा।

¹⁷होर जो लोक मसीह रा प्रचार हीर्ख होर लड़ाई री वजहा ले करहा ऐं, स्यों खरे इरादे ले नी पर आपणे मतलबा कठे मसीहा रा प्रचार करहा ऐं। स्यों जेल्हा मन्झ भी मेरी कठे परेसानिया जो बढ़ाहें।

¹⁸तेबे क्या हुआ? सिर्फ ये हुआ कि हर तरहा ले, चाहे बुरे इरादे ले, चाहे सच्चे इरादे ले, मसीह री खुसी री खबरा रा प्रचार हुंहाँ। एता ले मुंजो खुसी मिल्हा ई, होर खुसी मिल्दी ई रैहणी।

¹⁹क्यूंकि हांऊँ ये जाणहां कि, तुस्सा री प्रार्थना होर यीसू मसीह रे ज्रीए भेजिरी पवित्र आत्मा री सहायता ले एस कैद मन्झ रेहणा मेरे कठे भलाई री वजहा ई।

²⁰मेरे दिला री आस होर सभी ले बड़ी इच्छा ता येई कि, केसी गल्ला मन्झ हांऊँ सर्मिन्दा नी होऊं। पर हमेसा निधड़क हुई किन्हें मसीह रे बारे मन्झ प्रचार करु जिहां हांऊँ पैहले करहा था। चाहे हांऊँ जिउंदा रहूं या मरी जाऊं मेरी जिन्दगी रे ज्रीए मसीह री बढ़ाई हमेसा करदा रैहणा।

²¹क्यूंकि हांऊँ जिउंदा रहूँ ता मसीह रे कठे, होर मरणा मेरे कठे होर भी खरा।

²²अगर मेरे जिउंदे रैंहणें ले ही मसीह रा काम हुई सका, तेबे हांऊँ नी जाणदा कि मुंजो क्या चुणणा चहिए।

²³हांऊँ दुंहीं फैसले रे बीचा मन्झ लटकीरा; इच्छा ता ये करहा ई कि हांऊँ ये दुनिया छाडी किन्हें मसीह वाले चला जाऊं, क्यूंकि मेरे कठे ये ज्यादा खरा हूंणां।

²⁴पर तुस्सा री मददा रे कठे जिउंदे रैंह्णां होर भी ज्यादा जरूरी आ।

²⁵होर इधी कठे कि मुंजो एस गल्ला रा भरोसा आ, हांऊँ जाणहां कि मां जिउंदा रैंह्णां, बल्की तुस्सा सभी साउगी रैंह्णां, ताकि प्रभु मन्झ मजबूत रैहणें होर तेस मन्झ खुस रैहणें मन्झ हांऊँ तुस्सा री मदद करी सकूं।

²⁶जेबे मां तुस्सा वाले दबारा वापस आऊंणा तेबे जो काम मेरे ज्रीए प्रभु करेया करहा तेसरी वजहा ले मसीह यीसू पर बडयाई करणे रा तुस्सा वाले होर भी वजहा हूंणे।

²⁷बस इतना करा कि तुस्सा री जिन्दगी मसीह रे खुसी री खबरा रे लायक हुई सके। चाहे हांऊँ आई किन्हें तुस्सा जो देखूं, चाहे नी भी आऊँ, तुस्सा रे बारे मन्झ ये सुणूं कि, तुस्से एक ई इरादे ले, होर एक मन हुई किन्हें खुसी री खबरा रे विस्वासा रे कठे बड़ी मैहनत करहा ऐं।

²⁸होर केसी गल्ला मन्झ व्रोधिया ले नी डरा; ये तिन्हारे कठे ता विनासा रा होर तुस्सा रे कठे उद्धारा रा साफ सबूत आ; होर ये परमेसरा री तरफा ले आ।

²⁹क्यूंकि मसीह री वजहा ले तुस्सा पर ये अनुग्रह हुईरा कि ना सिर्फ तेस पर विस्वास करा पर तेसरे कठे दुःख भी सहन करा।

³⁰तुस्से मुंजो फिल्लिपी सैहरा मन्झ भी कस्ट सहन करदे हुए देखीरा होर ऐबे भी मेरे दुखा रे बारे मन्झ सुणे जो मुंजो जेल्हा मन्झ हुआ। ऐबे तुस्सा जो भी मेरे साहीं कस्ट सहन करणा पऊणा।