Read Mandeali फिलिप्पियो 2 Bible Online

फिलिप्पियो 2 - Mandeali bible

फिलिप्पियो 2

¹क्यूंकि मसीह साउगी जुड़े हूणे री वजहा ले तुस्सा जो हिम्मत हूँआ ई, होर तुस्से मसीह रे प्यारा ले जो से तुस्सा किन्हें करहा सांति मिलाई, तुस्सा री पवित्र आत्मा साउगी संगती ई, होर मसीहे तुस्सा पर करुणा होर अनुग्रहा कितिरा।

²इधी कठे तुस्से मेरी ये खुसी पूरी करा कि तुस्से एक मना रे, होर एक ई प्यार, एक ई भावना, होर एक ई नजरिया रखणे वाले बणा।

³आपणे मतलब होर झूठी साना रे कठे कुछ मत करा, पर दीन हुई किन्हें, एक दूजे जो आपणे ले ज्यादा बढ़ी किन्हें समझा।

⁴तुस्सा मन्झा ले हर एकी जो चहिए कि से सिर्फ आपणी भलाई रे कठे नी, पर दूजे री भलाई रा भी ख्याल रखे।

⁵जेह्ड़ा मसीह यीसू रा स्वभाव था, तेह्ड़ा ई तुस्सा रा स्वभाव भी हो।

⁶जिन्हें जे परमेसरा हूणे पर भी परमेसरा री समानता जो आपणे बसा मन्झ रखणे री चीज नी समझी।

⁷बल्की आपणे आपा जो एह्ड़ा खाली करी दितेया, होर नौकर रा रूप धारण कितेया, होर माह्णुं बणी गया।

⁸होर माह्णुं रे रूपा मन्झ जाहिर हुई किन्हें आपणे आपा जो दीन कितेया, होर परमेसरा रा हुक्म मन्नदे हुए, मौत, हां, क्रूसा री मौत भी सही ली।

⁹एस वजहा ले परमेसरे तेस जो बौह्त म्हान भी कितेया, होर तेस जो से नांऊँ दितेया जो सभ नांऊँआं ले गास आ।

¹⁰कि जो स्वर्गा मन्झ होर धरती पर होर जो धरती रे हेठ ऐं; स्यों सभ यीसू रे नांऊँआं जो आदर देणे रे कठे घुटना टेके।

¹¹होर बापू परमेसर री महिमा रे कठे हर एक माह्णुं मनी ले कि यीसू मसीह ई प्रभु आ।

¹²हे लाडले भाईयो होर बैहणो, जेबे हांऊँ तुस्सा साउगी था ता तुस्से हमेसा ले मेरी बिधिया मनी री। होर ऐबे जेबे हांऊँ तुस्सा ले दूर आ ता तिन्हा बिधिया जो मनणा तुस्सा रे कठे होर भी ज्यादा जरूरी आ। डर किन्हें होर बड़ी इज्जत साउगी परमेसरा रे हुकमा जो मना। होर आपणे उद्धारा रे कामा जो पूरा करणे रे कठे कड़ी मेहनत करा।

¹³क्यूंकि परमेसर ही आ, जो तुस्सा जो एह्ड़ी इच्छा होर सक्ति देहां कि तुस्से से काम करहा जो तेस जो खुस करहा।

¹⁴सब काम बगैर गलांण होर बगैर बैहसा ले करा।

¹⁵ताकि तुस्से बेकसूर होर भोले हुई किन्हें संसारा रे टेढ़े होर ढीठ लोका रे बीचा मन्झ परमेसरा रे सिद्ध बच्चे बणी किन्हें रैहया। एस संसारा रे लोका रे बीचा मन्झ आसमाना रे तारे साहीं चमकदे हुए तिन्हो परमेसरा रा बचन सुणाऊआ जो तिन्हो अनंत जिन्दगी देआ।

¹⁶जिन्दगी रे बचना जो मजबूती किन्हें पकड़ी रखा ताकि मसीह रे दबारा वापस आऊणें रे ध्याड़े मुंजो एस गल्ला रा बडयाई हो कि, मेरी जिन्दगी री भाग दोड़ होर मेरी मैहनत बेकार नी हुई।

¹⁷जेबे मै तुस्सा जो खुसी री खबर सुणाई तुस्से प्रभु यीसू पर विस्वास करी किन्हें आपणी जिन्दगी सेऊआ रे कठे बलिदान किती। होर एस वजहा मुंजो मरणा भी पो, तेबे भी हांऊँ खुस आ, होर तुस्सा सभी साउगी खुसी मनाणी।

¹⁸तिहां ईं तुस्से भी खुस हो, होर मेरे साउगी खुसी मणाऊआ।

¹⁹मुंजो प्रभु यीसू मन्झ आस ई कि, मां तिमिथियुसा जो झटपट तुस्सा वाले भेजी देणा, ताकि तुस्सा रा हाल सुणी किन्हें मुंजो हिम्मत मिली सके।

²⁰क्यूंकि मेरे वाले तिमिथियुस रे अलावा एह्ड़ा कोई नी हाया, जो खरे मना ले तुस्सा री फिकर करहे।

²¹क्यूंकि सभ आपणे मतलबा रे कठे जीएं, होर यीसू मसीह री गल्ला री परवाह नी करदे।

²²पर तिमिथियुस जो ता तुस्से जाणी गईरे कि से सच्चा आ, जेह्ड़ा मह्ठा बापू साउगी करहा, तिहां ई तिन्हें खुसी री खबरा रे फैलाणे मन्झ मेरे साउगी मैहनत किती।

²³इधी कठे मुंजो आसा ई कि, जीहां ई मुंजो पता चलणा कि मेरी क्या हालत हूणीं, तिहां ई मां तिमिथियुस तुस्सा वाले जल्दी भेजी देणा।

²⁴होर मुंजो प्रभु मन्झ भरोसा आ कि, मां आपु भी तुस्सा वाले जल्दी आई जाणा।

²⁵पर मैं इपफ्रुदीतुस जो तुस्सा वाले भेजणा जरूरी समझ्या, जो मेरा भाई होर साउगी काम करणे वाल़ा, होर खुसी री खबरा रे बचाव रे कठे मेरे साउगी योद्धा, होर जरूरता मन्झ मेरी सेऊआ टैहल करणे रे कठे तुस्सा री वखा ले भेजिरा दूत आ।

²⁶क्यूंकि तेस जो तुस्सा सभी किन्हें मिलणे रा बड़ा मन आ। से बेचैन हुईरा क्यूंकि तुस्सा लोका जो तेसरे ब्मार हूंणे रा पता लगी गईरा।

²⁷सच्चे से बौह्त ब्मार हुई गईरा था, एथी तक कि से मरणे वाल़ा ई था। पर परमेसरे तेस पर दया करी किन्हें से ठीक कितेया होर मेरे पर भी परमेसरे दया किती कि, जेल्हा मन्झ रैहन्दे हुए जेहड़ा दुःखा हांऊँ सहन करदा लगिरा तेता प्र्याहले होर दुःखा मन्झ नी पऊ।

²⁸इधी कठे मैं इपफ्रुदीतुस जो तुस्सा वाले वापस भेजणे री होर भी इच्छा रखा ताकि तेस जो दबारा देखी किन्हें तुस्से खुस हुई जाओ होर तुस्सा रे कठे मेरी चिंता कम हुई जाए।

²⁹तुस्से मसीह रे प्यारा मन्झ होर बड़ी खुसी किन्हें तेसरा स्वागत करेया, होर तेसरी होर तेस जेह्ड़े लोका री इज्जत करदे रैंह्णां।

³⁰क्यूंकि तिन्हें मसीह रे कामा रे कठे आपणे जिन्दगी जो खतरे मन्झ पाई दितिरा था तेबे भी मरदे-मरदे बची गया, ताकि से तिन्हा गल्ला मन्झ मेरी मदद करहे जेस जो तुस्से मेरे कठे नी करी सके क्यूंकि तुस्से मेरे ले दूर ऐं।