Read Mandeali फिलिप्पियो 3 Bible Online

फिलिप्पियो 3 - Mandeali bible

फिलिप्पियो 3

¹हे मेरे भाईयो बैहणो, इधी कठे प्रभु मन्झ खुस रैहया। तुस्सा जो बार-बार स्यों गल्ला लिख्दे रैंहणें ले मुंजो कोई कस्ट नी हुन्दा, क्यूंकि एता ले तुस्सा झूठे गुरुआ ले बची जाणा।

²एह्ड़े बुरे लोका ले चतन्न रहुआ जो जंगली कुत्ते साहीं तुस्सा रे कठे खतरनाक ऐं, होर तिन्हा लोका ले भी चतन्न रहुआ जो बोल्हा ऐ उधार पाणे रे कठे खतना कुराणा जरूरी आ।

³क्यूंकि हकिकता मन्झ परमेसरा रे लोक आस्से ई ऐं, जो पवित्र आत्मा रे ज्रीए अराधना करहा ऐं, होर मसीह यीसू साउगी गहरी संगती रखणे मन्झ बडयाई करहा ऐं, होर आस्से आपणे कितिरे भले कामा पर भरोसा नी रख्दे।

⁴पर हांऊँ ता आपणे कितिरे भले कामा पर भरोसा रख्ही सक्हा। होर अगर कोई होरी जो आपणे जतना पर भरोसा रखणे रा विचार हाया, ता हांऊँ तिन्हा ले भी बढ़ी किन्हें रख्ही सक्हा।

⁵परमेसरा रे हुकमा रे मताबक आठुऐ ध्याड़े मेरा खतना हुआ, इस्राएल देसा रे बंस, होर बिन्यामिना रे गोत्रा रा आ; मेरे बापदादे भी इब्रानी थे, इधी कठे हांऊ भी एक इब्रानी आ; होर एक फरीसी हुंदे हुए मै मूसा री व्यवस्था पूरा पालन कितिरा।

⁶जेथी तक मेरे जोसा रा सुआल आ, ता हांऊँ कलीसिया जो सताणे वाल़ा; होर यहूदी बिधियो जो मनणे मन्झ धार्मिक माह्णुं था, क्यूंकि हांऊँ सारी बिधियो जो मना था।

⁷पर जो-जो गल्ला मेरे फायदे री थी, तिन्हो मैं नुकसान सम्झहा तेस कामा री वजहा ले जो मसीहे आस्सा रे कठे काम कितिरे।

⁸क्यूंकि हांऊँ आपणे मसीह जो जाणना चाहां, जो सभ चीजा ले कीमती आ, इधी कठे मैं इन्हा सारी चीजा जो बेकार समझा। मैं सभ चीजा जो छाडी दितेया, होर तिन्हा चीजा जो हांऊँ कूड़ा सम्झहा, ताकि हांऊँ यीसू मसीह जो जाणी सकूं।

⁹होर हांऊँ तेस साउगी एक हुई किन्हें जीऊ। परमेसरे मुंजो आपणी नजरा मन्झ धर्मी इधी कठे नी बणाया कि मैं मूसा री व्यवस्था रा पालन कितिरा, पर मसीह पर विस्वास करणे री वजहा ले ही परमेसरे हांऊँ आपणी नजरा मन्झ धर्मी माह्णुं बणाया।

¹⁰हांऊँ ये ही चांहा कि मसीह जो होर तेस्सा सामर्था जो मैहसूस करी सकूं, जेस ले मसीह मरिरे मन्झ ले जिउंदे हुईरा। होर मरणे मन्झ मसीह साहीं बणी किन्हें तेस साउगी दुःखा उठाणे मन्झ साझी बणी जाऊँ,

¹¹ताकि हांऊँ केसी भी तरीके ले मरिरे मन्झा ले जी उठी सकूं।

¹²ये मतलब नी आ कि, हांऊँ ये सारी गल्ला पाई लितिरी; या सिद्ध हुई चुकिरा। पर हांऊँ कोसिस साउगी आगे बढ़दा लगिरा कि मुंजो से मिली जाए, जेसरे कठे मसीह यीसू हांऊँ चुणी लईरा।

¹³हे भाईयो होर बैहणो, हांऊँ ये नी सोचदा कि मैं सभ कुछ पाई लेईरा; पर सिर्फ एक काम करहा जो कि जो गल्ला हुई गईरी, तिन्हा जो भूली किन्हें, मैं सिर्फ आगे बढ़ने रे कठे कड़ी मेहनत करदा रैहया।

¹⁴हांऊँ न्साणे री तरफ आगे बड़ी करहा, ताकि इनाम पाऊं, होर मेरा इनाम ये आ कि परमेसरे हांऊँ स्वर्गीय जिन्दगी वखा जो सादिरा। ये एह्ड़ा इधी कठे हुआ क्यूंकि यीसू मसीह मेरे कठे मारी दितिरा था।

¹⁵इधी कठे आस्सा मन्झ जितने लोक आत्मिक रूपा ले स्याणे हुई गईरे, होर तुस्से सभ एक बराबर सोच रखा, होर अगर केसी गल्ला मन्झ तुस्सा री सोच लग ई, ता परमेसरा तुस्सा पर स्यों गल्ला जाहिर करी देणी।

¹⁶इधी कठे आस्से तेस सच्चाई रे मताबक चलणा जो परमेसरे आस्सो पैहले दसी दितिरी।

¹⁷हे भाईयो होर बैहणो, मेरे उदाहरणा रा अनुसरण करहा, होर जो मेरे उदाहरणा रा अनुसरण करहे तिन्हा पर ध्यान देआ, होर तिन्हारे उदाहरणा भी अनुसरण करहा।

¹⁸क्यूंकि बौह्त लोक एह्ड़ी जिन्दगी जिए, जिन्हारे बारे मन्झ मैं तुस्सा जो बार-बार बोलिरा, होर ऐबे भी रोई-रोई किन्हें बोल्हा कि स्यों आपणी जिन्दगी जीणे रे ढंगा ले मसीह रे क्रूसा री मौता जो बेकार बनाई देआ ऐं।

¹⁹तिन्हारा अंत विनास आ, तिन्हारा इस्वर तिन्हारी सरीरा री इच्छा ई, स्यों बेसर्म री गल्ला करणे पर बडयाई करहा ऐं, होर संसारा री चीजा पर मन ल्गाहें।

²⁰पर आस्सा रा आपणा देस स्वर्गा मन्झ आ होर सच्चे आस्सा रा घर एस संसारा मन्झ नी आ। होर तेथी ले आस्से आपणे उद्धार करणे वाले प्रभु यीसू मसीह रे आऊणें रा इंतजार करेया करहा ऐं।

²¹यीसू मसीह जेस तरीके ले आपणी सामर्था रे ज्रीए सभ चीजा जो आपणे बसा मन्झ करहा, तिहां ही आस्सा रे कमजोर होर एस संसारा रे सरीरा जो बदली किन्हें आपणे महिमामय सरीरा साहीं बणाई देणा।