Read Mandeali फिलिप्पियो 4 Bible Online

फिलिप्पियो 4 - Mandeali bible

फिलिप्पियो 4

¹इधी कठे हे लाडले भाईयो होर बैहणो, हांऊँ तुस्सा किन्हें प्यार रखा होर मुंजो तुस्सा लोका किन्हें मिलणे री बढ़ी इच्छा ई। तुस्से लोक मेरे खुसी होर मेरे ताज ऐं, होर तुस्से प्रभु पर आपणे विस्वासा मन्झ मजबूत बणी रहा।

²हांऊँ युओदिया बैहण होर सुन्तुखे बैहण दुंहीं ले अर्ज करहा कि प्रभु साउगी एक हूंणे री वजहा ले तुस्से एक दूजे किन्हें बैहस करणा छाडी देआ।

³होर हे सच्चे, सहकर्मी हांऊँ तेरे ले ये अर्ज करहा कि, तू इन्हा दुहीं बैहणा री आपु मन्झा री बैहसा जो सुल्हा करा, क्यूंकि तिन्हें मेरे साउगी खुसी री खबर सुनाणे रे कठे, क्लेमेन्स होर मेरे दूजे सहकर्मी साउगी मैहनत किती। होर ऐबे इन्हा सभीरा नांऊँ जिन्दगी री कताबा मन्झ लिखिरा।

⁴प्रभु मन्झ हमेसा खुस रैहया; हांऊँ दबारा बोल्हा, खुस रैहया।

⁵सभ लोक तुस्सा रे कोमल व्यवहार जो जाणी जाए; याद रखा कि प्रभु यीसू जल्दी आऊणें वाल़ा आ।

⁶केसी भी गल्ला री फिकर नी करा; पर हर एक हालात मन्झ आपणी विनती, प्रार्थना होर अर्ज रे ज्रीए धन्यावादा समेत परमेसरा किन्हें बोल्हा।

⁷तेबे सांति देणे वाले परमेसरा, जो माह्णुंआं री समझा ले बाहर आ, तुस्सा रे दिलो होर तुस्सा रे विचारा जो मसीह यीसू मन्झ सुरक्षित रखणा।

⁸इधी कठे हे भाईयो होर बैहणो, जो-जो गल्ला सच्ची ई, जो-जो गल्ला आदरा रे लायक, होर जो-जो गल्ला ठीक ई, होर जो-जो गल्ला पवित्र ई, होर जो-जो गल्ला बांकी ई, होर जो-जो गल्ला तारीफ रे लायक ई, इधी कठे, जो-जो गल्ला सभी ले उतम होर बढ़ाई रे लायक ई, तिन्हा गल्ला पर तुस्सा रा मन लगेया रहे।

⁹जो गल्ला तुस्से मेरे ले सीखी, होर ग्रहण किती, होर सुणी, होर मेरे मन्झ देखी, तिन्हारा पालन करा, तेबे परमेसरा जो सांति देआ, तुस्सा साउगी रैंह्णां।

¹⁰हांऊँ प्रभु मन्झ बौह्त खुस आ कि, तुस्से इतने ध्याड़े ले बाद मुंजो मदद रे रूपा मन्झ पैसे भेजी किन्हें दबारा याद कितेया। पक्का तुस्से सुर्हू ले ही एह्ड़ा करणा चांहे थे, पर तुस्सा जो मौका नी मिल्या।

¹¹हांऊँ ये गल्ला इधी कठे नी बोल्दा लगिरा कि मुंजो केसी चीज़ा री कमी घटी; क्यूंकि मैं हर हालता मन्झ संतुस्ट रैहणा सीखी लितिरा।

¹²हांऊँ कमी घटी मन्झ रैंह्णां भी जाणहां होर बढ़ती मन्झ रैंह्णां भी जाणहां; मैं हर एक गल्ला मन्झ होर हर हलाता मन्झ रजणा होर भूखा रैंह्णां, होर बढ़ना घटना सीखी लईरा।

¹³मसीह रे ज्रीए जो मुंजो सक्ति देहां तेता मन्झ हांऊँ सभ कुछ करी सक्हा।

¹⁴तेबे भी तैं भला कितेया कि, तुस्से पैसे री मदद करी किन्हें मेरे दुःखा मन्झ मेरे साझी बणे।

¹⁵होर हे फिलिप्पी सैहरा रे लोको, तुस्से आपु भी जाणहां ऐं कि, जेबे मै तुस्सा जो खुसी री खबरा सुणाई किन्हें मकीदुनिया ईलाके मन्झ चली गया, ता तेबे सिर्फ तुस्सा री कलीसिया रे लोके मददा रे कठे पैसे देई किन्हें मेरी मदद किती।

¹⁶जेबे हांऊँ थिस्सलुनिके सैहरा मन्झ था, तेबे भी तुस्से मेरी ज्रूरत पूरी करणे रे कठे एक बार नी बल्की दो बारी मददा रे कठे पैसे भेजे।

¹⁷हांऊँ ये गल्ला इधी कठे नी लिख्दा लगिरा कि हांऊँ मददा रे कठे पैसे चाहां। पर हांऊँ चाहां कि तुस्सा रा ये भला काम जो तुस्से कितिरा, से तुस्सा रे होर भले कामा मन्झ जुड़ी जाए होर परमेसर इन्हा कामा रे कठे तुस्सा जो इनाम दे।

¹⁸मेरे वाले सभ कुछ हाया, बल्कि ज्रूरत ले भी ज्यादा आ। जो चीजा तुस्से इपफ्रुदीतुस रे हाथा ले भेजिरी थी तिन्हा जो पाई किन्हें हांऊँ रजी गईरा। स्यों मेरे कठे खुसबू देणे वाली भेंट साहीं आ, होर तेस बलिदान साहीं जो याजक परमेसरा रे साम्हणें चढ़ा, जेस जो परमेसर ग्रहण करहा, होर जो परमेसरा खरा लग्हा।

¹⁹होर मेरे बापू परमेसरा भी आपणे तेस धना रे मताबक जो महिमा समेत मसीह यीसू मन्झ ऐं, तुस्सा री हर एक ज्रूरत पूरी करी देणी।

²⁰आस्सा रे बापू परमेसरा री बढ़ाई जुग-जुग हुन्दी रहे। आमीन।

²¹यीसू मसीह मन्झ हर एक पवित्र लोका जो हांऊँ नमस्कार बोल्हा। जो विस्वासी लोक मेरे साउगी ऐं, स्यों तुस्सा जो नमस्कार बोल्हा ऐं।

²²पवित्र लोक, खास करी किन्हें जो महाराजे रे घराने रे ऐं, तुस्सा जो नमस्कार बोल्हा ऐं।

²³हांऊँ प्रार्थना करहा कि आस्सा रा प्रभु यीसू मसीह तुस्सा जो अनुग्रह देंदा रैहे।