Read Mandeali कुलुस्सियो 2 Bible Online

कुलुस्सियो 2 - Mandeali bible

कुलुस्सियो 2

¹हांऊँ चाहां कि तुस्से जाणी लो कि, हांऊँ कितनी कड़ी मेहनत करेया करहा। मेरी ये मेहनत तुस्सा रे कठे होर लौदिकिया सैहरा मन्झ रैहणे वाले लोका रे कठे, होर तिन्हा सभी रे कठे ई, जेह्ड़े जे मैं देखीरे भी नी ऐं।

²हांऊँ इधी कठे मेहनत करहा ताकि तुस्सा सभी जो आत्मिक रूपा ले होंसला मिले, होर तुस्से सभ प्यारा मन्झ किन्हें मिली जुली किन्हें रहो। हांऊँ चाहां कि तिन्हो पूरा भरोसा हो क्यूंकि तिन्हो बापू परमेसर रे गुप्त विचारा री पूरी समझ ई। होर ये गुप्त विचार मसीह आपु आ।

³होर तेस परमेसरा री सारे बुद्धि होर ज्ञाना रे सारे भण्डार लुख्ही रे।

⁴हांऊँ ये इधी कठे बोल्हा कि, कोई माह्णुं तुस्सा जो ललचाणे वाली मीठी-मीठी गल्ला बोली किन्हें तुस्सा जो धोखा नी दे कि, तुस्से तिन्हारे झूठे उपदेसा पर विस्वास करी लो।

⁵क्यूंकि अगर हांऊँ तुस्सा ले दूर आ, तेबे बी हांऊँ हमेसा तुस्सा सभी रे बारे मन्झ सोचदा रैहया कि जिहां हांऊँ तुस्सा वाले आ। हांऊँ ये जाणी किन्हें खुस हुंहाँ कि तुस्से आपणी जिन्दगी सही ढंगा किन्हें जीया करहा ऐं, होर मसीह मन्झ तुस्सा रा विस्वास मजबूत आ।

⁶इधी कठे जिहां तुस्से मसीह यीसू जो प्रभु जाणी किन्हें मनी लईरा, तिहां ही मसीह मन्झ वास करणे वाले साहीं आपणी जिन्दगी जीया।

⁷मसीह मन्झ आपणे विस्वासा मन्झ मजबूती किन्हें स्थिर रहो, तिहां ही जिहां तुस्सा जो सखाईरा, ठीक तिहां ही जिहां एक डाल जमीना मन्झ जड़ पकड़ी किन्हें होर घर निऊँआ किन्हें मजबूत रैहया, होर तुस्से ज्यादा ले ज्यादा परमेसरा रा धन्यावाद करदे रैहया।

⁸चतन्न रैहया कि कोई भी तुस्सा जो आपणे झूठे होर बेकार उपदेसा ले धोखा नी दे, जो माह्णुंआं रे ज्ञाना रे मताबक आ। एह्ड़ा उपदेस माह्णुंआं री परम्परा होर संसारा री बिधिया रे मताबक आ, ना कि मसीह रे मताबक।

⁹एह्ड़ा नी हो कि तुस्से इन्हा लोका रे धोखे मन्झ आई जाये, क्यूंकि मसीह जेबे माह्णुं बणेया तेबे भी से पूरी रीती ले परमेसर था।

¹⁰मसीह सारी प्रधानता होर हका रा मुखिया आ। होर अगर तुस्से मसीह मन्झ ऐं, ता तुस्से तेस मन्झ भरपूर कितिरे।

¹¹होर जेबे तुस्से मसीह पर विस्वास कितेया ता तुस्सा रा खतना माह्णुं ऐं नी कितेया (जिहां यहूदी लोक करहे थे) पर मसीह रे ज्रीए दितिरे खतने ले हुआ। ये खतना तुस्सा रे पाप रे स्वभावा जो दूर करहा।

¹²जेबे तुस्से बपतिस्मा लितेया ता मसीह साहीं दफनाए गये होर तुस्से मसीह साहीं जिउंदे भी किते गये। ये इधी कठे हुआ क्यूंकि तुस्से विस्वास कितेया कि परमेसरे आपणी सामर्था ले मसीह रे मरणे रे बाद तेस जो मरिरे मन्झा ले जिउंदा कितेया।

¹³होर परमेसरे तुस्से भी, मसीह साउगी जिउंदा करी दिते, जेबे तुस्से आपणे पापा मन्झ मरिरे थे, होर तुस्सा रे बुरे स्वभावा रा खतना नी हुईरा था। होर परमेसरे आस्सा रे सभ पापा जो माफ कितेया।

¹⁴एह्ड़ा लगा कि परमेसरे आस्सा रे पापा रे दोस पत्रा जो मटाई दितेया, जो आस्सा रे बरखलाफ लिखीरे थे, होर परमेसरे तेस दोस पत्रा जो पुरे तरीके किन्हें रद करी दितेया जेबे मसीह जो क्रूसा प्रयाल्हे मेखा किन्हें लटकाई दितेया था।

¹⁵होर परमेसरे दुस्ट ताकता रे प्रधानता होर हका जो हराई दितेया। क्रूसा प्रयाल्हे मसीह रे जीता रे ज्रीए तिन्हारा खुल्लम खुल्ला तमासा बणाया।

¹⁶इधी कठे एह्ड़ा नी हो कि तुस्से इन्हा लोका रे धोखे मन्झ आई जाये होर खाणे पीणे या साजा या नंऊँआं चांद या अरामा रे ध्याड़े रे मनाणे रे कठे तुस्सा रा कोई फैसला ना करहे।

¹⁷क्यूंकि ये सारी व्यवस्था सिर्फ एक छाऊँआ साहीं ई, पर एस छाऊँ रा सच्चा मूल मसीहा आ।

¹⁸तिन्हा लोका रे धोखे ले बचा जो दीन हूंणे रा ढोंग करहे, होर स्वर्गदूता री अराधना करहे। स्यों डिंगा माराऐ कि आस्से दर्सन देखे। ये सारी गल्ला बेकार ई क्यूंकि एह्ड़े माह्णुंआं रे मन स्वार्थ इच्छा किन्हें भरीरा, होर स्यों बगैर वजहा घमंड करहे।

¹⁹एह्ड़ा माह्णुं मसीह री सच्ची खुसी री खबरा पर विस्वास करणा होर स्खाणा छाडी दितिरा। से मसीह जो सरीर रा मूंड आ। जिहां एक मूंड सारे सरीरा जो आपणे वसा मन्झ रखा, होर नसा होर जोड़ा जो गठी किन्हें रखी किन्हें तिन्हा जो पाला ईं, तिहां ही मसीह भी आपणे लोका जो आपणे वसा मन्झ रखा, ताकि स्यों सभ एक साउगी एक जुटा मन्झ रहे। होर एह्ड़े बढ़े, जिहां परमेसर चाहां कि स्यों बढ़दा जाये।

²⁰इधी कठे कि तुस्सा रा पाप रा स्वभाव मसीह साउगी मरी गईरा, तुस्से एस संसारा री बापदादे रे बिधिया जो मनणे री जरूरत नी। ता फेरी भी तुस्से इन्हा उपदेसा रा पालन किधियो करहे, जिहां जे संसारे तुस्से हाले भी आपणे वसा मन्झ रखिरा।

²¹कि “एता जो हाथ मत लगाऊआ, एता जो मत सुआदा, एता जो मत छुआ।”

²²क्यूंकि ये सारी बिधिया माह्णुंआं रे हुक्मा होर उपदेसा रे मताबक ऐं। ये बिधिया तिन्हा सभ चीजा रे बारे मन्झ ऐं, जो इस्तेमाला मन्झ आऊंदे-आऊंदे बेकार हुई जाहें।

²³ये बिधिया जो मनणा ज्ञाना री गल लगी सकी, क्यूंकि इन्हा जो पूरी करणे मन्झ मजबूत भक्ति, सुद्ध तरीके किन्हें आपणे आपा रा नांह, होर बौह्त गंभीर रूपा किन्हें सरीरा रा अनुसासना री जरूरत हुई, पर ये बिधिया केसी री मदद नी करदी कि, स्यों आपणी बुरी इच्छा जो आपणे वसा मन्झ करी सके।