Read Mandeali कुलुस्सियो 3 Bible Online

कुलुस्सियो 3 - Mandeali bible

कुलुस्सियो 3

¹एह्ड़ा लगा कि जेबे परमेसरे मरिरे मन्झा ले भी जिउंदा कितेया ता तेस तुस्सा जो भी जिउंदे करणे, इधी कठे तिन्हा गल्ला जो पाणे री इच्छा रखा जो परमेसरे तुस्सा रे कठे स्वर्गा मन्झ रखिरी। जेथी मसीह परमेसरा रे सीधी तरफ बैठी किन्हें राज करहा।

²आपणा मन धरती री चीजा पर नी पर हमेसा स्वर्गा री चीजा पर ल्गाऊआ।

³ये एह्ड़ा कि जेबे मसीह तुस्सा रे कठे मरेया ता तुस्से, भी तेस साउगी मरी गये, होर ऐबे अगे जो तुस्से मसीह साउगी परमेसरा री मौजूदगी मन्झ आत्मिक जिन्दगी जिहां ऐं, होर दूजे लोक इन्हा गल्ला जो नी देखी सकदे।

⁴मसीह री वजहा ले ही तुस्सा जो ये नौंईं जिन्दगी मिलिरी, होर जेबे तेस वापस एस संसारा मन्झ आऊंणा, तेबे तुस्से भी आई किन्हें तेसरी महिमा मन्झ साझी बणी जाणा।

⁵इधी कठे आपणे पाप रे स्वभाव ले जुड़ीरे बुरे कामा जो करणा छाडी देआ, जिहां कि व्यभिचार, असुद्धता, बुरी कामना, होर बुरी इच्छा। होर तुस्से केसी भी गल्ला रा लालच नी करहा क्यूंकि ये मूर्ति री पूजा करणे रे बराबर आ।

⁶क्यूंकि लोक इन्हा बुरे कामा जो करहे इधी कठे परमेसरा तिन्हो जरुर बड़ी सजा देणी।

⁷होर मसीह पर विस्वास करणे ले पैहले तुस्सा रा स्वभाव भी सच्चे तेह्ड़ा ही था।

⁸पर ऐबे तुस्से इन्हा सभ गल्ला जो यानि गुस्सा, रोष, बैर-भाव, बदनामी होर गालिया देणा छाडी देऊआ।

⁹जेब्की तुस्से आपणे पुराणे पापा रे स्वभाव होर सारे बुरे कामा जो करणा छाडी दितिरा, इधी कठे एक दूजे किन्हें झूठ मत बोल्हा।

¹⁰होर ऐबे तुस्सा जो नंऊँआं स्वभाव मिली गईरा, होर ये नंऊँआं स्वभाव ज्यादा ले ज्यादा तेसरे रचणे वाले रे साहीं बणना, जेस वजहा ले तुस्से तेस जो होर भी ज्यादा समझी सके।

¹¹होर एस वजहा ले गैर-यहूदी, होर यहूदी लोका मन्झ कोई फर्क नी, तिहां ही खतना वाले होर बगैर खतना वाले मन्झ कोई फर्क नी आ, होर ना बिदेसी होर असभ्य लोका मन्झ फर्क आ, होर ना गुलाम होर अजाद लोका मन्झ कोई फर्क आ। पर मसीह ही सभ कुछ आ, होर आपणे सभ लोका मन्झ वास करहा।

¹²क्यूंकि परमेसरा तुस्सा किन्हें प्यार करहा, होर तिन्हें तुस्से चुणिरे लितिरे कि, तुस्से तेसरे पवित्र जण बणो, इधी कठे तुस्सा मन्झ करुणा, दया, दीनता, नम्रता होर सबरा स्वभाव हो।

¹³होर अगर केसी जो केसी रे कठे सिकायत करणे री कोई वजहा हो, ता एक दूजे री सही लो, होर एक दूजे रे गलतिया जो माफ करा; जिहां प्रभुए तुस्सा रे पाप माफ कितिरे, तिहां ई तुस्से भी एक दूजे जो माफ करा।

¹⁴इन्हा सभी गल्ला ले बढ़ी किन्हें एक दूजे किन्हें प्यार करहा। एह्ड़ा करणे ले तुस्सा एक दूजे किन्हें एकता मन्झ जुड़ी रेहणा।

¹⁵होर मसीह जो सांति देआ से तुस्सा रे दिला मन्झ राज करहे, क्यूंकि तुस्से सभ एक ही सरीर रे अंग ऐं, होर इधी कठे तुस्से सादीरे कि एक दूजे किन्हें मिली जुली किन्हें रहो। होर हमेसा परमेसरा रा धन्यावाद करदे रहूआ।

¹⁶मसीह रा बचन तुस्सा रे दिला मन्झ ज्यादा ले ज्यादा बसी जाये, होर तुस्सा जो ज्ञान दे। एस बचना रे ज्रीए एक दूजे जो सखाऊआ होर चेतावनी देआ। आपणे-आपणे मना मन्झ धन्यावादा साउगी परमेसरा रे कठे भजन होर बड़ाई गान होर आत्मिक गीत गाऊआ।

¹⁷होर जो कुछ तुस्से बोले होर करहे से सभ प्रभु यीसू रे नांऊँआं ले करहा; होर प्रभु यीसू रे ज्रीए बापू परमेसरा रा धन्यावाद करा।

¹⁸हे लाड़ीयो, तुस्से आपणे-आपणे लाड़े रे अधीन रैहया, क्यूंकि एह्ड़ा करणा ही प्रभु रे लोका जो खरा लघ्हा।

¹⁹हे लाड़ेयो, आपणी-आपणी लाड़ी किन्हें प्यार रखा, होर तिन्हा किन्हें सख्ती ना करा।

²⁰हे बच्चेयो, आपणे-आपणे माऊ बापू री सभ गल्ला जो मना, क्यूंकि प्रभु एस्सा गल्ला ले खुस हुंहाँ।

²¹हे माऊ-बापू, आपणे बाल बच्चेया जो गुस्सा मत दिलाऊआ, एह्ड़ा नी हो कि स्यों दुखी हुई किन्हें आपणी हिम्मत हारी ले।

²²हे गुलामो, माह्णुंआं जो खुस करणे वाल़ेया साहीं सिर्फ दिखावटी रूपा ले नी, बल्की प्रभु रा डर मन्नदे हुए, ईमानदारी किन्हें आपणे संसारा रे माल्का री सभ गल्ला जो मना।

²³होर जो कुछ तुस्से करहा ऐं, पुरे मना ले करहा, ये समझी किन्हें कि माह्णुंआं रे कठे नी, पर प्रभु रे कठे करहा ऐं।

²⁴क्यूंकि तुस्से जाणहां ऐं कि जो आसीस प्रभुए आपणे सभ लोका रे कठे रखिरी तेस मन्झ ले तुस्सा री जो विरासत ई से तुस्सा जो देणी; क्यूंकि तुस्से प्रभु मसीह री सेऊआ करहा ऐं, जो तुस्सा रा माल्क आ।

²⁵पर जो बुराई रा काम करदा ही रैहया, परमेसरा तेस जो सजा देणी, होर परमेसर केसी रा भेदभाव नी करदा।