Read Mandeali 1 थिस्सलुनकियो 3 Bible Online

1 थिस्सलुनकियो 3 - Mandeali bible

1 थिस्सलुनकियो 3

¹इधी कठे ऐबे जेबे आस्से होर इंतजार नी करी सके, ता आस्से (पौलूस होर सिलास) ये फैसला कितेया कि एथेंस सैहरा मन्झ ही रुकी रहे।

²होर मसीह रे खुसी री खबरा जो सुनाणे मन्झ आस्सा रा भाई, होर परमेसरा रा सेऊआदार तिमिथियुसा जो मैं तुस्सा वाले इधी कठे भेज्या, ताकि से तुस्सा जो मसीहा रे विस्वासा मन्झ मजबूत करहे; होर प्रभु पर विस्वासा बनाये रखणे रे कठे तुस्सा जो हिम्मत दे।

³ताकि कोई इन्हा दुःखा री वजहा ले विस्वासा ले पीछे नी हटी जाए; क्यूंकि तुस्से आपु जाणहां ऐं कि आस्सो ये दुःख सैहणा ही आ।

⁴क्यूंकि पैहले भी, जेबे आस्से तुस्सा साउगी थे, ता तुस्से बोल्या करहा ऐं थे कि, आस्सा जो दुःख उठाणे पऊणे, होर एह्ड़ा ई हुईरा, होर तुस्से इन्हा गल्ला जो जाणहां ऐं।

⁵एता री वजहा ले जेबे मेरे ले होर इंतजार नी हुआ की तुस्सा रा हाल चाल जाणी लू, तेबे मै तुस्सा रे विस्वासा रा हाल जाणने रे कठे तिमिथियुस जो भेजी दितेया। क्यूंकि हांऊँ एस गल्ला ले डरा था कि परखणी करणे वाले दुस्ट सैताने तुस्सा री परखणी कितिरी हो, होर आस्सा री मैहनत बेकार हुई गईरी हो।

⁶पर ऐबे तिमिथियुस तुस्सा रे विस्वास होर प्यारा री खरी खबर लई किन्हें आस्सा वाले वापस आई गईरा। तिन्हें ये भी सुणाया कि तुस्से आस्सा जो बड़े प्यार किन्हें याद करहा ऐं, होर जिहां आस्से तुस्सा जो देखणे रे कठे तरस्या करहा ऐं, तिहां ईं तुस्से भी आस्सा जो देखणे रे कठे तरस्या करहा ऐं।

⁷इधी कठे हे भाईयो होर बैहणो, आस्से आपणे सारे दुःख होर पीड़ा मन्झ भी तुस्सा रे बारे मन्झ तिमिथियुस ले सुणी किन्हें हिम्मत पाई कि तुस्से यीसू मसीह रे विस्वासा मन्झ मजबूत ऐं।

⁸ये जाणी किन्हें आस्सा री जाना मन्झ जान आई गई कि ऐबे तुस्से प्रभु मन्झ मजबूत बणी गईरे।

⁹होर जो खुसी आस्सा जो तुस्सा रे बारे मन्झ, तुस्सा री वजहा ले मिल्हा ई, तेता रे कठे आस्से आपणे परमेसरा रा धन्यावाद किहाँ करिए?

¹⁰आस्से राती ध्याड़ी दिला किन्हें प्रार्थना करहा ऐं, ताकि आस्से दबारा तुस्सो देखी सके, होर तुस्सा री मदद करहे कि तुस्से प्रभु यीसू मसीह पर होर ज्यादा विस्वासा करी सको।

¹¹ऐबे आस्से प्रार्थना करहे कि आस्सा रा बापू परमेसर आपु ई, होर आस्सा रा प्रभु यीसू मसीह, तुस्सा वाले आऊणें रे कठे आस्सा री मदद करहे।

¹²होर आस्से ये भी प्रार्थना करहे कि प्रभु एह्ड़ा करहे कि, जेह्ड़ा आस्से तुस्सा किन्हें प्यार रख्हा ऐं; तेह्ड़ा ई तुस्सा रा प्यार भी एक दूजे मन्झ, होर सभ माह्णुंआं साउगी बढ़े, होर तरक्की करदा जाए।

¹³आस्से ये भी प्रार्थना करहे कि प्रभु यीसू मसीह तुस्सा रे मना जो एह्ड़ा मजबूत करहे कि, जेबे आस्सा रे प्रभु यीसू आपणे सभ परमेसरा रे पवित्र लोका साउगी वापस आये, ता स्यों आस्सा रे बापू परमेसरा रे साम्हणें पवित्रता मन्झ बेकसूर बणें।