Read Mandeali 1 थिस्सलुनकियो 5 Bible Online

1 थिस्सलुनकियो 5 - Mandeali bible

1 थिस्सलुनकियो 5

¹हे भाईयो होर बैहणो, तुस्सा जो तेस टैम होर काला रे बारे मन्झ लिखणे री ज्रूरत नी कि प्रभु यीसू रा दबारा वापस आऊंणा केबे हूणा।

²क्यूंकि तुस्से ठीक ढन्गा किन्हें आप्हुए जाणहां ऐं कि, जिहां जे चोर राती आहूँआं, तिहां ईं प्रभु यीसू रा अचानक दबारा वापस आऊणें रा ध्याड़ा हूंणा।

³जेबे लोका ये बोलणा कि, “सभ कुछ सांत होर सुरक्षित आ,” तेस टैमा अचानक तिन्हारी पीड़ा सुर्हू हुई जाणी। ठीक तिहां ईं जिहां एक गर्भवती जनानिया जो बच्चे जमणे रे टैमा री पीड़ा अचानक सुर्हू हुई जाहीं, होर तिन्हा एस खरतनाक पीड़ा ले नी बचणा।

⁴पर हे भाईयो होर बैहणो, तुस्से बुराई रे नह्यारे मन्झ नी ऐं कि, प्रभु यीसू रे दबारा वापस आऊणें रा ध्याड़ा तुस्सा पर चोरा साहीं अचानक आई जाए।

⁵क्यूंकि तुस्से लोक जेह्ड़े भी काम करहा ऐं स्यों प्रयासे मन्झ करहा ऐं यानि ध्याड़ीया रे टैमा मन्झ करहा ऐं। होर ना ता नह्यारे मन्झ करहा ऐं यानि रातके टैमा मन्झ करहा ऐं।

⁶इधी कठे आस्से अविस्वासी साहीं सौंदे नी रही जाए, पर प्रभु यीसू रे दबारा वापस आऊणें रे ध्याड़े रे कठे त्यार होर चतन्न रैहया।

⁷क्यूंकि जो सौंदे रैंहे, स्यों राती ई सौंहा ऐं, होर जो मतवाले हुंहाँ ऐं, स्यों राती ई हुंहाँ ऐं।

⁸पर आस्से ता ध्याड़ीया रे टैमा मन्झ काम करणे वाले ऐं, विस्वास होर प्यारा री झिलम पैन्ही किन्हें होर उद्धारा री आसा रा टोप पैन्ही किन्हें चतन्न रैहया।

⁹क्यूंकि परमेसरे आस्सा जो गुस्से मन्झ सजा देणे रे कठे नी चुणिरा, पर इधी कठे चुणिरा, ताकि आस्से आपणे प्रभु यीसू मसीह रे ज्रीए उद्धार पाए।

¹⁰यीसू मसीह आस्सा रे कठे इधी कठे मरेया, ताकि चाहे आस्से जिउंदे हो, या चाहे मरी जाए; जेबे तेस दबारा वापस आऊंणा ता आस्से सभ मिली किन्हें तेस साउगी जिन्दगी जी सके।

¹¹इधी कठे एक दूजे जो तस्सली देआ करा, होर एक दूजे री तरक्की री वजहा बणां, होर एह्ड़ा तुस्से करहा भी ऐं।

¹²होर हे भाईयो होर बैहणो, आस्से तुस्सा ले अर्ज करहा ऐं कि, तिन्हारी इज्जत करहा जो तुस्सा रे बीचा मन्झ रैहन्दे हुए तुस्सा रे कठे बौह्त मैहनत करहा ऐं, होर जो प्रभु मन्झ तुस्सा रे अगुवे ऐं, होर तुस्सा जो स्खाहें, तिन्हारी मना।

¹³होर तिन्हारे कामा रे वजहा ले तिन्हा किन्हें प्यारा करहा होर तिन्हारा बौह्त आदर करहा; एक दूजे किन्हें सांति किन्हें रैहया।

¹⁴होर हे भाईयो होर बैहणो, आस्से तुस्सा ले अर्ज करहा ऐं कि, जो काम करणे मन्झ आलस करहा, तिन्हा जो समझाऊआ, डरपोका जो हिम्मत देआ, जो विस्वासा मन्झ कमजोर ऐं तिन्हो संभाला, सभी किन्हें सैहनसीलता रखा।

¹⁵येह ध्यान रखा कि कोई केसी किन्हें बुराई रे बदले बुराई नी करहे, पर हमेसा सब लोका किन्हें होर एक दूजे किन्हें भलाई करणे रा जतन करहा।

¹⁶हमेसा खुस रैहया।

¹⁷हमेसा प्रार्थना करदे रैहया।

¹⁸हर एक हलाता मन्झ धन्यावाद देआ, क्यूंकि तुस्सा रे कठे मसीह यीसू मन्झ परमेसरा री येही इच्छा ई।

¹⁹पवित्र आत्मा रे कामा जो मत रोका।

²⁰तिन्हा भविस्यवाणिया जो बेकार मत समझा जो परमेसरे आपणे लोका रे कठे जाहिर कितिरी।

²¹सारे उपदेसा जो परखा कि स्यों परमेसरा री वखा ले हाऐ या नी; होर जो खरी उपदेस ऐं तिन्हा जो ग्रहण करहा होर मना।

²²सभ किस्मा री बुराई ले बची किन्हें रैहया।

²³सांति देणे वाल़ा परमेसर आपु ई तुस्सा जो पूरी तरहा ले पवित्र करहे; होर तुस्सा री पूरी आत्मा होर प्राण होर सरीर आस्सा रे प्रभु यीसू मसीह रे दबारा वापस आऊणें रे ध्याड़े तक बेकसूर होर सुरक्षित रहे।

²⁴तुस्सा रा सादणे वाल़ा सच्चा आ, क्यूंकि तिन्हें तुस्से पवित्र बणने रे कठे सादीरे इधी कठे से तुस्सा री मदद करहा कि तुस्से पवित्र बणी सको।

²⁵हे भाईयो होर बैहणो, आस्सा रे कठे प्रार्थना करा।

²⁶सभ विस्वासी लोका जो गले मिली किन्हें नमस्कार करा।

²⁷हांऊँ प्रभु रे नांऊँआं ले अर्ज करहा कि, ये चिठ्ठी सभ विस्वासी लोको जो पढ़ी किन्हें सुणाई जाए।

²⁸हांऊँ प्रार्थना करहा कि आस्सा रा प्रभु यीसू मसीह तुस्सा जो अनुग्रह देंदा रैहे।