Read Mandeali 2 थिस्सलुनकियो 1 Bible Online

2 थिस्सलुनकियो 1 - Mandeali bible

2 थिस्सलुनकियो 1

¹हांऊँ पौलुस, सिलास होर तिमिथियुस साउगी ये चिठ्ठी लिखी करहा। आस्से ये चिठ्ठी थिस्सलुनिके सैहरा री कलीसिया रे विस्वासी लोका रे कठे लिख्या करहा ऐं, जो आस्सा रे बापू परमेसर होर प्रभु यीसू मसीह रे लोक ऐं।

²आस्से प्रार्थना करहे कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

³हे भाईयो होर बैहणो, तुस्सा रे बारे मन्झ आस्सो हमेसा परमेसरा रा धन्यावाद करणा चहिए। आस्सा रे कठे ये करणा ठीक भी आ, क्यूंकि यीसू मसीह मन्झ तुस्सा रा विस्वास बौह्त बढ़ी गईरा, होर एक दूजे किन्हें तुस्सा रा प्यार होर भी ज्यादा बढ़दा जाहाँ।

⁴इधी कठे आस्से परमेसरा री कलीसिया रे विस्वासी लोका रे बीचा मन्झ तुस्सा रे बारे मन्झ बडयाई करहा ऐं। हालांकि तुस्से बौह्त सारे उपद्रव होर दुःख सैहन करहा ऐं, तेबे भी तुस्से धीरज रखी किन्हें यीसू मसीह पर विस्वास करहे।

⁵जो दुःख तुस्से सहन करी करहे, एता री वजहा ले तुस्से परमेसरा रे राज मन्झ दाखल करणे लायक बणे। होर ये ही सबूत आ कि परमेसरा धार्मिकता किन्हें सभीरा न्याय करणा, जेसरे कठे तुस्से दुःख भी सही करहे।

⁶क्यूंकि परमेसरा री नजरा मन्झ ये फैसला ठीक आ कि, जो तुस्सा जो दुःख देहां ऐं, तिन्हा जो बदले मन्झ दुःख दितेया जाए।

⁷होर तुस्से दुःख उठाणे वाल़ेया जो आस्सा साउगी तेस टैम अराम दितेया जाए; जेबे प्रभु यीसू आपणे सामर्थी स्वर्गदूता साउगी स्वर्गा ले आऊंणा ता तेसरे चहुँ वखा जो आगी री लपटा हूणीं।[1]

⁸होर जो परमेसरा जो नी जाणदे, होर आस्सा रे प्रभु यीसू मसीह रे बारे मन्झ खुसी री खबरा जो नी मन्नदे, तेस तिन्हा जो सजा देणी।

⁹स्यों हमेसा रे कठे प्रभु ले दूर करी दिते जाणे, होर तेसरी महिमामय सामर्था मन्झ साझी नी हूंणे, होर तेस तिन्हो अनंत विनासा री सजा देणी।[2]

¹⁰ये गल्ला तेबे हूणीं जेबे यीसू मसीह दबारा वापस आऊंणा, होर परमेसरा रे पवित्र लोका तेसरी बढ़ाई करणी, होर तेस पर विस्वास करणे वाले मन्झ हरानी री वजहा बणने रे कठे आऊंणा। होर तुस्से भी तिन्हा लोका साउगी हूंणा जिन्हा तेस ध्याड़े तेसरी बढ़ाई करणी, क्यूंकि तुस्से तेसरे बारे मन्झ आस्सा री गुआही पर विस्वास कितेया।[3]

¹¹इधी कठे आस्से हमेसा तुस्सा रे कठे प्रार्थना भी करहा ऐं कि, आस्सा रा परमेसर तुस्सा जो तेस जिन्दगी रे लायक बणाये, जेस जो जीणे रे कठे तुस्से सादिरे। होर तुस्सा री हर एक खरी इच्छा जो भलाई रे कामा मन्झ बदली दे, होर आपणी सामर्था रे ज्रीए विस्वासा रे मताबक जिन्दगी जीणे मन्झ मदद करहे।

¹²आस्से एह्ड़ी प्रार्थना करहे कि आस्सा रे प्रभु यीसू मसीह रा नाऊँ तुस्सा रे ज्रीए महिमा पाए। होर तुस्से तेसरे ज्रीए आदर पाओ क्यूंकि तुस्से तेसरे ऐं। ये सभ कुछ आस्सा रे परमेसर होर यीसू मसीह रे अनुग्रह ले हूंणा।[4]