Read Mandeali 2 थिस्सलुनकियो 2 Bible Online

2 थिस्सलुनकियो 2 - Mandeali bible

2 थिस्सलुनकियो 2

¹हे भाईयो होर बैहणो, ऐबे आस्से प्रभु यीसू मसीह रे दबारा वापस आऊणें, होर तेस साउगी मिलणे रे बारे मन्झ लिखणा चाहें।

²तुस्सा रा मन अचानक दुआस नी हुई जाये, होर ये सुणी के देख्या डरदे कि प्रभु आई गईरा। लोक एस गल्ला जो भविस्यवाणी रे ज्रीए या केसी खास संदेसा रे ज्रीए या केसी चिठ्ठी रे ज्रीए, तुस्सा तक पुजांगे होर बोलणा कि ये चिठ्ठी आस्सा री तरफा ले ई।

³प्रभु रे आऊणें री गल्ला रे बारे मन्झ केसी रे भी धोखे मन्झ देख्या आऊंदे, क्यूंकि यीसू मसीह रे वापस आऊणें रे पैहले एह्ड़ा टैम हूंणा, जेबे बौह्त लोका परमेसरा रे खलाफ विद्रोह करणा। होर से दुस्ट आदमी जाहिर हूंणा, जेस जो परमेसरा सच्चे नरका मन्झ नास करणा।

⁴तेस परमेसर होर बाकि सभ चीजा रा विरोध करणा, जिन्हों लोक इस्वर बोली किन्हें तिन्हारी अराधना करहे, होर तेस एस गल्ला रा दावा करणा कि से इन्हा सभी ले खास आ। एथी तक कि दुस्ट आदमी परमेसरा रे मन्दरा मन्झ बैठी किन्हें ये भी दावा करहा कि से आपु ई परमेसर आ।[5]

⁵मत भुला कि जेबे हांऊँ तुस्सा साउगी था, तेबे मैं ये गल्ला तुस्सा जो बार-बार दसीरी थी।

⁶क्यूंकि हाल्ले तक से दुस्ट आदमी जाहिर नी हुईरा, होर तुस्से जाणहां ऐं कि, केस चीजे से रोकी किन्हें रखिरा। इधी कठे कि तेस परमेसरा रे नियुक्त कितिरे टैमा मन्झ जाहिर हूंणा।

⁷तेस दुस्ट आदमी री सामर्थ संसारा मन्झ गुप्त तरीके किन्हें काम करेया करहा ई, पर तेस जो रोकणे वाल़ा एक आ, होर तेस रोकणे वाले से तेबे तक रोकी रखणा, जेबे तक तेस जो टाही नी दे।

⁸तेता ले बाद तेस दुस्ट आदमिया जाहिर हूंणां, पर बादा मन्झ जेबे प्रभु यीसू मसीह आऊंणा, ता से तेस आपणे मुंहा री फूका किन्हें मुकाई देणा, होर आपणे आऊणें रे तेजा किन्हें भस्म करी देणा।[6]

⁹सैताना आप्हुए तेस दुस्ट आदमी जो आपणी सामर्थ देणी, होर तेस तेसरी सामर्था रे ज्रीए सभी किस्मा रे झूठे काम, चिन्ह, चमत्कार होर नौखे काम करणे, जेता ले लोका सोचणा कि परमेसर ही ये सभ कुछ काम करी करहा।

¹⁰होर अनंत विनासा री वखा जो जाणे वाले जो, हर प्रकारा रे बुरे कामा रे ज्रीए धोखा देणा। क्यूंकि तिन्हें सच्चाई पर विस्वास करणे रे कठे नांह करी दिती, जेसरे ज्रीए परमेसर तिन्हारा उद्धार करी सक्हा था।

¹¹होर एस वजहा ले परमेसरे सच्चाई ले भटकाणे वाली एक सामर्थ तिन्हा वाले भेजी, ताकि स्यों तेस झूठा पर विस्वास करहे, जो से दुस्ट आदमी तिन्हो दसा।

¹²होर जितने लोक सच्चाई पर विस्वास नी करदे, बल्की पाप करणे री इच्छा रखे, परमेसरा तिन्हा सभी जो सजा देणी।

¹³हे भाईयो होर बैहणो, आस्सो हमेसा तुस्सा रे कठे परमेसरा रा धन्यावाद करणा चहिए, प्रभु तुस्सा किन्हें प्यार करहा। क्यूंकि तिन्हें संसारा जो रचणे ले पैहले ही तुस्से चुणी लितिरे कि पवित्र आत्मा रे कामा रे ज्रीए तुस्सा रा उद्धार करहे; जो तुस्सा जो पवित्र बणा। होर यीसू मसीह रे बारे मन्झ सच्चाई री खबरा पर विस्वास करणे रे ज्रीए भी।[7]

¹⁴परमेसरे तेस खुसी री खबरा रे ज्रीए जो आस्से तुस्सा जो सुणाई री थी, तुस्से सादिरे कि तुस्सा रा उद्धार करी सके; ताकि तुस्से आस्सा रे प्रभु यीसू मसीह री महिमा मन्झ साझी हुई सको।

¹⁵इधी कठे, हे भाईयो होर बैहणो, मजबूत बणी रैहया होर जो उपदेस आस्से तुस्सा जो तेथी रही किन्हें सखाया, होर जो गल्ला आस्से तुस्सा जो चिठ्ठी रे ज्रीए सखाई, तिन्हा उपदेसा पर तुस्से लगातार आपणा विस्वास बणाई रखा।

¹⁶आस्से आपणे प्रभु यीसू मसीह ले होर बापू परमेसरा ले प्रार्थना करहे, जो आस्सा किन्हें प्यार करहा; होर जिन्हें आपणे अनुग्रहा ले आस्सो हमेसा होंसला दितेया, होर मजबूत आस दितीरी।

¹⁷आस्से प्रार्थना करहे कि स्यों तुस्सा रे मना जो हिम्मता किन्हें भरी दे, होर तुस्सा जो मजबूत बणाये कि तुस्से हमेसा खरा बोली सको, होर खरे काम करी सको।