Read Mandeali 1 तिमिथियुस 2 Bible Online

1 तिमिथियुस 2 - Mandeali bible

1 तिमिथियुस 2

¹सभी गल्ला ले बड़ी किन्हें हांऊँ आपणे दिला ले तुस्सा किन्हें बोलणा चाहां कि, सभ माह्णुंआं रे कठे परमेसरा ले अर्ज होर प्रार्थना होर निवेदन होर धन्यावाद कितेया जाए।

²राजेया रे कठे होर अधिकारिया रे कठे प्रार्थना करहा, ताकि आस्से सुख-चैना किन्हें रहे, जेता ले आस्से परमेसरा री भक्ति करी सके होर दूजे लोका साउगी सही बर्ताव करी सके।

³एस तरीके किन्हें सब लोका रे कठे प्रार्थना करना सही आ, होर आस्सा रा उद्धारकर्ता परमेसर एता जो ग्रहण करहा।

⁴होर से ये चाहां कि, सभ माह्णुंआं रा उद्धार हो, होर स्यों सच्चाई ठीक ढंगा किन्हें जाणी सको।

⁵क्यूंकि परमेसर एक ई आ; परमेसर होर लोका रे बीच एक ई माह्णुं बिचौलिया आ, होर से माह्णुं यीसू मसीह आ।

⁶मसीहे आपणे आपा जो बलिदान रे रूपा मन्झ देई दितेया; ताकि सभी लोका जो पाप होर मौता ले छुड़ाई सके; तेसरी मौता रे ज्रीए परमेसरे ये साबित कितेया कि ठीक टैमा ले से सब लोका रा उद्धार करणा चाहां।

⁷एस वजहा ले परमेसरे मुंजो खुसी री खबरा रा प्रचारक होर चुणिरा चेला नियुक्त कितिरा। तिन्हें हांऊँ चुणिरा कि हांऊँ अन्यजाति लोका जो विस्वास होर सच्चाई रे बारे मन्झ सखाई सकूं। हांऊँ सच्च बोल्हा, झूठ नी बोलदा।

⁸इधी कठे हांऊँ चाहां कि, हर मण्डली मन्झ मर्ध बगैर गुस्से कितिरे होर बगैर बैहसा ले, परमेसरा रे कठे समर्पित हाथा जो चक्की किन्हें प्रार्थना करेया करहे।

⁹तिहां ईं हांऊँ चाहां कि ज्नानिया भी जचणे वाले कपड़े पैहने, जो इज्जता रे लायक हो, होर मैहंगे नी हो। दूजेया जो लुभाणे रे कठे हर किस्मा-किस्मा रे बाल बनाणे, सोने होर मोतिया रे बणिरे गैह्णे, होर कीमती-कीमती कपड़े पैन्ह्णे

¹⁰रे बजाय, दूजे लोका रे कठे खरे काम करी किन्हें आपणे आपा जो जचाणा तिन्हारे कठे खरा आ।

¹¹जेबे कोई मण्डली मन्झ सारे विस्वासी लोका जो सखा, ता सारी ज्नानिया जो चुपचाप होर बड़ी इज्जता किन्हें सिखणा चहिए।

¹²हांऊँ ज्नानिया जो ये इज्जाजत नी देंदा कि, स्यों मर्धा जो स्खायें या तिन्हा पर हुक्म चलाए। जेबे तुस्से अराधना रे कठे कट्ठे हुए ता जनानिया जो चुपचाप रैहणा चहिए।

¹³हांऊँ एह्ड़ा इधी कठे बोल्हा, क्यूंकि पैहले परमेसरे आदम (मर्ध) जो बणाया, फेरी तिन्हें हव्वा (जन्नानी ) बणाई।

¹⁴होर एक वजहा ये ही कि सांपे जनानिया जो बहकाया था आदमा जो नी, होर एस तरहा हव्वे परमेसरा री व्यवस्था जो तोड़ी दितेया।

¹⁵अगर ज्नानिया मसीह पर विस्वास करही, होर दूजे लोका किन्हें प्यार करही, होर पवित्र होर सही ढंगा किन्हें जी, ता परमेसर जनानिया जो बच्चे जणने रे ज्रीए तिन्हारा उद्धार करणा।