Read Mandeali 1 तिमिथियुस 4 Bible Online

1 तिमिथियुस 4 - Mandeali bible

1 तिमिथियुस 4

¹पर पवित्र आत्मा साफ-साफ बोल्हा कि, एस आखरी ध्याड़े मन्झ कुछ लोक मसीह रे उपदेसा पर विस्वास करणा छाडी देणा। तिन्हा दुस्टात्मा री गल्ला पर मन ल्गाणा, होर झूठे नबी रे उपदेसा पर विस्वास करदे लगी जाणा, जो तिन्हा जो भटकाई देआ।

²ये झूठे उपदेस स्खाणे वाले झूठे पाखंडी ऐं, तिन्हारी अंतरात्मा मरी चुकीरी जो सही होर गलता रा फैसला करी, जिहां कि कोई गर्म लोहे से फुखी दितिरी हो।

³स्यों स्खायें कि लोक ब्याह नी करहे, होर स्यों खाणे पीणे री चीजा ले भी रोक्हा ऐ। पर परमेसरे युयां चीजा तिन्हा विस्वासी लोका रे कठे बणाईरी, जो सच्चे उपदेसा जो जाणांहे कि, स्यों प्रार्थना करी किन्हें धन्यावादा रे साउगी इन्हा चीजा जो खाई सके।

⁴क्यूंकि परमेसरा री रचिरी हर एक चीज खरी ई; होर आस्से कुछ भी खाई सके, पर सिर्फ इतना हो कि स्यों चीजा परमेसरा जो धन्यावाद देई किन्हें खाई जाए।

⁵क्यूंकि स्यों चीजा परमेसरा रे बचन होर प्रार्थना ले सुद्ध किती जाहीं।

⁶अगर तू विस्वासी भाई बैहणा जो इन्हा गल्ला जो याद कुरांदा रहे, जो मैं ऐबे तुस्सा जो करणे रे कठे बोलिरी। होर विस्वासा रे संदेसा रे ज्रीए होर खरे उपदेसा रे ज्रीए जेस जो तू मनदा आईरा, तू मजबूत बनाई गईरा, ता तुध मसीह यीसू रा खरा सेऊआदार बणना।

⁷मन घड़न्त होर नर्क्कली काह्णियां रे कठे आपणा टैम बर्बाद नी करा, जेता ले जे परमेसरा जो इज्जत नी मिल्दी; होर भक्ति री जिन्दगी जीणे रे कठे आपणे आपा जो लगातार कोसिस करदा रेह।

⁸क्यूंकि सारीरिक व्यायाम ले थोह्ड़ा ई फायदा हुंहाँ, पर भक्ति सभ गल्ला रे कठे फायदेमंद ई, क्यूंकि एस जिन्दगी मन्झ होर आऊणें वाले जिन्दगी मन्झ भी परमेसरा री वादा कितिरी जिन्दगी तुस्सा जो मिलाईं।

⁹ये भरोसे करणे रे लायक गल्ल ई, होर हर तरहा ले मन्नणे रे लायक ई।

¹⁰आस्से एस जिन्दगी जो पाणे रे कठे मैहनत होर कोसिस इधी कठे करहा ऐं, क्यूंकि आस्सा री आस तेस जिउंदे परमेसरा पर ई, जो सभ माह्णुंआं रा, होर खास कर विस्वासी लोका रा उद्धारकर्ता आ।

¹¹विस्वासी लोका जो इन्हा गल्ला जो सखा, होर तिन्हो इन्हा गल्ला जो मनणे रा आदेस दे।

¹²कोई तेरी जुआनी जो बेकार नी समझणे पाए; पर जो गल्ला तू बोल्हा, होर आपणे चाल चलना रे ज्रीए, दूजेया रे कठे तेरे प्यारा रे ज्रीए, होर मसीह पर तुस्सा रे विस्वास होर तुस्सा री पवित्र जिन्दगी रे ज्रीए, तू विस्वासी लोका रे कठे एक उदाहरण बणी जा।

¹³जेबे तक हांऊँ नी आऊँ, तेबे तक पवित्र सास्त्रा जो विस्वासी लोका जो जोरा किन्हें पढ़ी किन्हें तिन्हो सुनाणे रे कठे टैम काढ, तिन्हो हिम्मत दे होर पवित्र सास्त्रा रे मतलबा जो समझाणे मन्झ लगी रैह।

¹⁴याद रखा कि जेबे कलीसिया रे अगुवे तुस्सा पर हाथ रखिरा था, होर भविस्यवाणी करी किन्हें तेस खास वरदाना रे बारे मन्झ दसिरा था, जो परमेसरे तुस्सा जो दितिरा। तेस बरदान रे बारे मन्झ लापरवाह मत बण।

¹⁵इन्हा गल्ला जो बड़े ध्याना किन्हें करदा रह, होर आपणे आपा जो पूरी तरहा इन्हा गल्ला पर लगाई रख, ताकि हर कोई ये देखी सके कि तुस्से आपणे विस्वासा मन्झ बढ़ी करहा ऐ थे।

¹⁶ध्यान रखा कि तुस्से आपणी जिन्दगी केह्ड़ी जिया करहे होर दूजेया जो क्या सखाई करहे, इन्हा गल्ला पर मजबूत बणी रह, क्यूंकि अगर तू एह्ड़ा करदा रैहन्गा, ता परमेसरा तेरे ज्रीए तु होर तेरे सुणने वाल़ेया जो आऊणें वाले न्याय ले बचाणा।