Read Mandeali 1 तिमिथियुस 5 Bible Online

1 तिमिथियुस 5 - Mandeali bible

1 तिमिथियुस 5

¹आपणे ले उम्रा मन्झ बड़े आदमी जो बेज्जत करणे रे कठे मत प्रुआच; पर तेस जो आपणा बापू समझी किन्हें समझाई दे, होर आपणे ले कम उम्रा वाले किन्हें आपणा भाई साहीं बर्ताव कर।

²आपणे ले उम्रा मन्झ बडी ज्नानिया किन्हें आपणी माऊआ साहीं बर्ताव कर; होर तुस्सा ले कम उम्रा वाल़ेया किन्हें आपणी बैहणा साहीं बर्ताव कर। एह्ड़ा तू एक पवित्र मना किन्हें कर।

³तिन्हा विधवा रा आदर कर, जिन्हारी देखभाल रे कठे होर जरूरता जो पूरा करणे रे कठे कोई नी आ।

⁴होर अगर केसी विधवा रे बच्चे होर नाती-पोते हो, ता स्यों आपणे घरा रे एस सदस्या री देखभाल करदे हुए एक भक्ति री जिन्दगी जीणा सीखे, होर तिन्हारी देखभाल करणे ले, स्यों आपणे माऊ-बापू या दादू-नानूआ रे कठे जो कुछ तिन्हें तुस्सा रे कठे कितिरी, तेता रे बदले तुस्से तिन्हारी सेऊआ कराये, होर परमेसर येई चाहां कि तुस्से एह्ड़ा करो।

⁵जेस्सा विधवा री देखभाल करणे रे कठे कोई नी हो; से सिर्फ परमेसरा पर आस रख्हा ई, होर राती ध्याड़ी विनती होर प्रार्थना मन्झ लगी रैंहीं कि परमेसर तेस्सा री मदद करहे।

⁶पर जो विधवा आपणा पूरा टैम भोग विलासा मन्झ लाई रखा ई, से एक मरिरे आदमी साहीं, हालांकि तिन्हारा सरीर जिउंदा पर स्यों आत्मिक रूपा ले मरी गईरी।

⁷सारे विस्वासी लोका जो इन्हा बिधिया रे बारे मन्झ दस, ताकि हर कोई इन्हा जो बेकसूर पाए।

⁸पर अगर कोई आपणे रिस्तेदारा री, होर आपणे परिवारा री फिकर नी करहे, ता से विस्वासा ले मुखरी गया, होर अविस्वासी लोका ले भी बुरा बणी गईरा।

⁹विधवा जनानिया रे नांऊँआ री सूची मन्झ, जिन्हों विस्वासी लोक लगातार मदद करहे, तेता मन्झ सिर्फ तिन्हा विधवा रे नाऊँ लिखे जाये, जो साठ साला री उम्रा ले ज्यादा हो, होर जेसरा एक ई लाड़ा हो।

¹⁰होर दूजे लोक तिन्हारे बारे मन्झ ये बोलदे हो कि तेस्से हमेसा भले काम कितिरे, जिहां कि तेस्से आपणे बच्चे रा पालन पोसण खरे किन्हें कितिरा। सफर करणे वाले विस्वासी लोका जो आपणे घरा मन्झ सादी किन्हें तिन्हारी आदर-खातर कितिरा, तिन्हें परमेसरा रे पवित्र लोका री बड़ी नम्रता किन्हें सेऊआदारा साहीं तिन्हारी सेऊआ कितिरी, जो लोक दुखा मन्झ थे तिन्हारी मदद कितिरी। होर तिन्हें हर एक भले कामा जो मन ल्गाईरा किन्हें कितिरा।

¹¹पर जुआन विधवा रे नांऊँ तेस्सा सूची मन्झ मत लिखदे जिन्हों विस्वासी लोक लगातार मदद करहे, क्यूंकि जेबे तिन्हारी सरीरा री इच्छा बड़ी जाईं होर विधवा हुंदे हुए भी मसीह री सेऊआ करणे री इच्छा तेता रे मुकाबले कम हुई जाईं, ता स्यों दबारा ब्याह करणा चाहीं।

¹²होर दबारा ब्याह करणे ले परमेसरा तिन्हारा न्याय करणा, क्यूंकि तिन्हें आपणा पैहल्के वादे जो यानि दबारा ब्याह नी करणे रे वादे जो पूरा नी कितेया।[1]

¹³होर एता साउगी-साउगी स्यों घर-घर फिरि किन्हें आलसी हूंणां सीखी जाहीं, होर सिर्फ आलसी ई नी, पर दूजेया रे बारे मन्झ गलांण करी, होर दूजेया रे कामा मन्झ टांग अड़ाई होर एह्ड़ी गल्ला बोल्हा ई जो तिन्हा जो नी बोलणी चहिए।

¹⁴इधी कठे मुंजो ये ठीक लगहा कि, जुआन विधवा ब्याह करी ले; होर बच्चे जणे होर घर-बार संभाले, तेबे दुस्मणा जो तिन्हा जो बदनाम करणे रा मौका नी मिलणा।

¹⁵क्यूंकि कुछ जुआन विधवा ता परमेसरा ले दूर हुई गईरी होर सैताना रे पीछे चलदी लगिरी।

¹⁶अगर केसी विस्वासी बैहणा रे घरा मन्झ कोई विधवा हो, ता सेई तिन्हारी मदद करहे, होर कलीसिया रे विस्वासिया ले मददा रे कठे नी बोले, ताकि कलीसिया रे लोक तिन्हा विधवा री मदद करी सके, जिन्हारी देखभाल करणे रे कठे कोई नी आ।

¹⁷जो कलीसिया रे अगुवा आपणा सारा काम खरे ढंगा किन्हें करदा हो, खास करी किन्हें जो परमेसरा रे बचना जो सुनाणे होर स्खाणे रे कठे मैहनत करहा हो, स्यों आदर होर पूरी मजदूरी, इन्हा दुहीं जो पाणे रे लायक समझे जाएं।

¹⁸क्यूंकि पवित्र सास्त्र मन्झ लिखिरा कि, “कणक गांहणे वाले बोल्ह्दा रा मुंह देख्या बान्ह्दा।” एक होरी जगहा लिखिरा कि, “मजदूर आपणी मजदूरी रा हकदार आ।”[2]

¹⁹अगर कोई कलीसिया रे अगुवे पर दोस लगा कि तिन्हें पाप कितिरा, ता बगैर दो या तीन गुआहा रे एस्सा गल्ला रे कठे तेस पर दोस मत लगाऊआ।

²⁰पाप करणे वाले जो सभी विस्वासी लोका रे साम्हणें प्रुआची दे, ताकि बाकि विस्वासी लोक भी डरे।

²¹परमेसर, मसीह यीसू, होर चुणिरे स्वर्गदूता रे साम्हणें हांऊँ तूजो ये आदेस देहां कि बिना केसी भेदभावा रे इन्हा बिधिया जो पूरा कर, होर सभी किन्हें एक जेह्ड़ा बर्ताव कर।

²²पर केसी जो भी हाथ रखी किन्हें परमेसरा री सेऊआ मन्झ नियुक्त करणे रे कठे जल्दबाजी मत कर, होर अगर तुस्से एह्ड़ा करहे ता तुस्से भी तेसरे पापा रे जिम्मेदार बणना; आपणे आपा जो पवित्र बणाए रख।

²³तू सिर्फ पाणी मत पी, पर आपणे पेटा रे होर आपणे बार-बार ब्मार हूंणे री वजहा ले थोह्ड़ा-थोह्ड़ा अंगूरा रा रस भी इस्तेमाल करेया कर।[3]

²⁴जल्दबाजी मन्झ कलीसिया रे अगुवे जो नियुक्त नी करणा, हांऊँ इधी कठे बोल्हा, क्यूंकि कुछ लोक खुल्हे आम पाप करहे; तिन्हारे न्याय किते जाणे ले पैहले ही स्यों विस्वासी लोका रे साम्हणें दोसी बणी जाहें। हालांकि दूजे लोका रे पाप इतने जल्दी नी सुझदे, होर लोक तेस जो बादा मन्झ ही पछयाणहां ऐं।

²⁵तिहां ईं जेबे कोई भला काम करहा ता सभी लोका जो जल्दी सूझी जाहाँ। होर भले ही स्यों एक बारी मन्झ नी सूझे, पर मजे-मजे सभ लोक इन्हा गल्ला जो पछयाणी ले।