Read Mandeali 2 तिमिथियुस 2 Bible Online

2 तिमिथियुस 2 - Mandeali bible

2 तिमिथियुस 2

¹इधी कठे हे मेरे मह्ठे तिमिथियुस, तू ये जाणी किन्हें आपणे आपा जो मजबूत कर कि, परमेसरे तुजो से अनुग्रह दितिरा, जो आस्सा रे मसीह यीसू साउगी एक हूंणे ले वजहा ले मिला।

²तैं बौह्त लोका साम्हणें मुंजो मसीह रे बारे मन्झ संदेस स्खान्दे हुए सुणीरा था। इधी कठे हांऊँ चाहां कि तू भी इन्हा गल्ला जो दूजे भरोसे रे लायक विस्वासी लोका जो सखाई दे; जो होरिया जो भी स्खाणे रे लायक हो।

³तू एक मसीह यीसू रा खरा स्पाही आ, इधी कठे जिहां दूजे लोक दुःख सहन करही करहे, तिहां तू भी तिन्हा दुःखा जो सहन कर।

⁴एक स्पाही जो सेना मन्झ भर्ती आ, तेता रे साउगी-साउगी से केसी संसारा रे कामा जो नी करदा, क्यूंकि से आपणे भर्ती करणे वाले अधिकारी जो खुस कुराणा चाहां।

⁵होर एस तरहा जेबे अखाड़े मन्झ लड़ने वाल़ा पैहल्वान अगर बिधिया रे मताबक नी लड़े ता से इनाम नी पांदा।

⁶होर तिहां ही जो किसान मैहनत करहा, तेस्जो ही सभी ले पैहले फसला रा हिस्सा मिलणा चहिए।

⁷इन्हा उदाहरणा रे बारे मन्झ सोचा कि स्यों क्या स्खायें, होर प्रभुआ तुस्सा री मदद करणी कि तुस्से इन्हा गल्ला जो समझी सके।

⁸हमेसा याद रखा कि यीसू मसीह कुणहां, से राजा दाऊदा रा बंस आ। परमेसरे से मरिरे मन्झा ले जिउंदा कितेया, होर हांऊँ एसी खुसी री खबरा रा प्रचार करहा।

⁹क्यूंकि हांऊँ खुसी री खबरा रा प्रचार करहा, इधी कठे हांऊँ एक अपराधी साहीं दुःख सहन करहा, एथी तक कि हांऊँ कैदा मन्झ आ, पर परमेसरा रे बचना जो कोई भी आपणे कैदा मन्झ नी रखी सकदा।

¹⁰इधी कठे हांऊँ परमेसरा रे चुणिरे लोका रे कठे सभ कुछ सैहन करहा, ताकि स्यों भी मसीह यीसू पर विस्वास करी किन्हें उद्धार पाए, होर अनंत महिमा पाए।

¹¹ये भरोसे करणे रे लायक गल्ला ई कि, अगर आस्से मसीह साउगी मरी गईरे, ता आस्सा तेस साउगी जिउंदे भी हूंणा।

¹²अगर आस्से तेसरे खातर दुःख सहन करदे हुए धीरज रखे, ता आस्सा तेस साउगी राज भी करणा; पर अगर आस्से तेस जो जाणने ले मना करघे, ता तेस भी बोलणा कि आस्से तेसरे लोक नी ऐं।

¹³भले ही आस्से मसीह रे कठे भरोसे रे लायक नी ऐं, तेबे भी से भरोसे रे लायक बणी रैंहयां, क्यूंकि से आपणे ही स्वभावा रे खलाफ झूठा नी हुई सक्दा।

¹⁴ये गल्ला जो मैं तुस्सा किन्हें बोलिरी, तुस्सा रे लोक इन्हा जो भूली नी जाये। होर प्रभु जो गुआह मनी किन्हें तू तिन्हो चेतावनी दे कि, स्यों सब्दा रे मतलबा पर बैहस नी करहे। एह्ड़ी बैहसा ले कोई फायदा नी आ; बल्की सुणने वाल़ेया जो नुकसान ही पूजा।

¹⁵आपणे आपा जो परमेसरा रे ज्रीए ग्रहण करणे रे लायक बनाई किन्हें होर एह्ड़े सेऊआदारा रे रूपा मन्झ आपणे आपा जो दसणे री कोसिस करदे रैहया, जेस ले केसी भी गल्ला रे कठे सर्मिन्दा हूंणे री जरूरत नी हो। होर जो परमेसरा रे सच्चाई रे बचना जो ठीक तरहा ले इस्तेमाल करदा हो।

¹⁶सांसारिक होर बेकारा री गल्ला ले दूर रैहया, क्यूंकि एह्ड़े लोक होर भी ज्यादा परमेसरा ले दूर हुई जाहें।

¹⁷तिन्हारी गल्ला फैली किन्हें लोका रे विस्वासा जो नुकसान पुजाई, जिहां सड़ीरा जख्म फैली किन्हें एक ठीक आदमी जो बीमार करी देआ, हुमिनियुस होर फिलेतुस भाई तिन्हा लोका साहीं ऐं।

¹⁸तिन्हें सच्चाई पर विस्वास करणा छाडी दितिरा, स्यों बोले कि परमेसरे पैहले ले ही मरिरे विस्वासी लोका जो अनंत जिन्दगी पाणे रे कठे जिउंदा करी दितिरा। एता री वजहा ले स्यों कुछ विस्वासी लोका जो मसीह पर विस्वास नी करणे रे कठे मनाई कराये।

¹⁹परमेसरा रे लोक तेस निऊँआ साहीं जो बणी रैहीं, होर जेस पर ये सब्द लिखिरे कि, “प्रभु आपणे लोका जो पछ्याणा,” होर “हर एक जिन्हें प्रभु जो अपनाईरा से बुराई करणा छाडी दे।”

²⁰होर बड़े घरा मन्झ ना सिर्फ सोने चांदी रे (यानि जो कलीसिया रे सच्चे विस्वासी लोक ऐं), पर लकड़ी होर माटे रे भांडे भी हुंहाँ ऐं। (यानि झूठे उपदेस स्खाणे वाले भी) होर कुछ-कुछ खास कामा रे कठे होर कुछ-कुछ आम कामा रे कठे।

²¹एस तरीके किन्हें जो कोई विस्वासी आपणे आपा जो इन्हा बुरी गल्ला ले दूर रखा, ता से तेस कीमती भांडे साहीं हूंणा जो खास कामा रे कठे हुआ, जेसरा जिन्दगी पवित्र हुंगी; होर तेस आपणे माल्का रे काम आऊंणा, होर हर भले कामा रे कठे त्यार हूंणां।

²²तिन्हा बुरी गल्ला ले दूर रेह जेस जो करणे जो जुआना री इच्छा करी; होर जो सुद्ध मना ले प्रभु री अराधना करहा ऐं, तिन्हा साउगी धार्मिकता री जिन्दगी, विस्वास, प्यार, होर सांति रखी किन्हें अगे बढ़दे रहो।

²³पर नर्क्कली, होर बेकारा री बैहसा ले दूर रैहया। क्यूंकि तुस्से जाणहां ऐं कि इन्हा ले लड़ाई-झगड़े हुंहाँ ऐं।

²⁴होर प्रभु रे सेऊआदारा जो झगड़ा करणे वाल़ा नी हूंणां चहिए, तेस जो सभी साउगी दया किन्हें बर्ताव करणा चहिए, होर परमेसरा रे बचना जो खरे किन्हें स्खाणे वाल़ा होर आपणे व्रोध करणे वाल़ेया किन्हें सबर रखणे वाल़ा हूंणा चहिए।

²⁵होर से आपणे व्रोधिया जो नम्रता किन्हें सुधारे, सैताने इन्हा लोका जो इंहां फसाई दितिरा कि स्यों तेसरे मताबक जीए, पर तुस्सा रा तिन्हा साउगी सबर रखणे री वजहा ले हुई सक्हा कि, परमेसर तिन्हारी मदद करहे कि स्यों पाप करणा छाडी दे, होर मसीह रे बारे मन्झ सच्चाई जो पछयाणी ले। ताकि स्यों आपणे होसा मन्झ आई किन्हें सैताना ले दूर चली जाये।