Read Mandeali 2 तिमिथियुस 3 Bible Online

2 तिमिथियुस 3 - Mandeali bible

2 तिमिथियुस 3

¹तिमिथियुस हांऊँ चाहां कि तू ये जाणी ले कि, आखरी ध्याड़े मन्झ मसीह रे दबारा वापस आऊणें ले पैहले आस्सा पर बौह्त दुःखा रा टैम आऊंणा।

²लोका सिर्फ आपणे आपा ले होर धना किन्हें प्यार करणे वाले बणी जाणा, बडयाई करणे वाले, घमंड करणे वाले, दूजेया री बदनामी करणे वाले, माऊ बापू रा हुक्म नी मनणे वाले, एहसान नी मनणे वाले, होर अपवित्र लोक हूंणे।

³प्यार नी करणे वाले, दूजेया जो माफ नी करणे वाले, दूजेया री बुराई करणे वाले, आपणे आपा पर काबू नी रखणे वाले, कठोर, होर खरी गल्ला किन्हें नफरत करणे वाले भी हूंणे।

⁴दूजेया जो धोखा देणे वाले, ढीठ, आपु जो दूजेया ले बडे समझणे वाले होर परमेसरा किन्हें प्यार नी करणे वाले, पर सुख विलासा रे चाहणे वाले लोक हूंणे।

⁵तिन्हा लोका परमेसरा रे भक्त हूंणे रा भेस ता धरणा, पर तेसरी सामर्थ जो नकारी देणी; जो सच्चे तिन्हा जो परमेसरा रा भक्त बणाई सकी, एह्ड़े लोका ले दूर रैंह्णां।

⁶इन्हा मन्झ ई कुछ लोक दूजेया रे घरा मन्झ बड़ी जाहें, होर तिन्हा नर्क्कली ज्नानिया जो पूरी तरहा आपणे बसा मन्झ करी लैहां ऐं, जिन्हारा दिल तिन्हारे पापा रे बोझा किन्हें दभिरा होर हर तरहा री इच्छा रे काबू मन्झ ऐं।

⁷होर स्यों हमेसा नईं गल्ला जो सिख्दे ता रैंहयां ईं, पर सच्चाई रे बारे मन्झ खरे उपदेसा जो कधी नी समझी सकदे।

⁸ये झूठे उपदेस स्खाणे वाले सच्चाई रा व्रोध करहे, जिहां यन्नेसे होर यम्ब्रेसे पुराणे टैमा मन्झ मूसा रा व्रोध कितेया था; ये ता एह्ड़े माह्णुं ऐं, जिन्हारी बुद्धि खराब हुई गईरी, होर आपणे विस्वासा जो लेई किन्हें हारी गईरे।[1]

⁹पर तिन्हारी वेवकुफी थोड़े ही टैम तक तिन्हारी मदद करी सकी, क्यूंकि जिहां तेस टैमा रे लोके जाणी लेईरा था कि यन्नेसा होर यम्ब्रेसा नर्क्कले, तिहां ही सभी लोका पछयाणी लेणा कि ये झूठे उपदेस स्खाणे वाले नर्क्कले।

¹⁰पर तू तिमिथियुस खरे किन्हें जाणहां कि हांऊँ क्या सखा, हांऊँ किहाँ आपणी जिन्दगी जी आ, होर मेरी जिन्दगी रा मकसद क्या, होर हांऊँ क्या विस्वास करहा। तू जाणहां कि हांऊँ सभी लोका किन्हें सबर रखा होर सभी किन्हें प्यार करहा, होर दुखा रे टैमा मन्झ धीरज रखा।

¹¹लोके हांऊँ सताया जेसरी वजहा ले मैं बौह्त दुःख सहन कितेया। तू तिन्हा डरावणी गल्ला रे बारे जाणहां, जो पिसिदिया जिल्ले रे अन्ताकिया सैहरा होर इकुनियुम होर लुस्त्रा सैहरा मन्झ रैहणे वाले लोके मेरे साउगी कितेया, होर किहाँ तेथी मैं दुःख सहन किते, पर प्रभुए हांऊँ सारे दुखा ले छुड़ाई लितेया।

¹²पर ये गल्ला सच्च ई कि जितने लोक मसीह यीसू साउगी एक हुई किन्हें भक्ति री जिन्दगी जीणा चाहें, स्यों सभ सताए जाणे।

¹³पर दुस्ट लोक, होर धोखा देणे वाले लोका एता ले भी बुरा काम करणा। तिन्हा लोका जो धोखा देणा होर आपु भी धोखा खाणा।

¹⁴पर हे तिमिथियुस तू इन्हा सारी गल्ला जो मजबूती किन्हें पकड़ी रख, जो लोके तुजो सखाईरी, होर जिन्हा पर तू पूरी तरहा विस्वास करहा। क्यूंकि तू खरे ढंगा किन्हें जाणहां कि ये सच्चाई री गल्ला तुजो कुन्हें सखाईरी।

¹⁵होर जेबे तू एक बच्चा ई था ता तैं पवित्र सास्त्रा जो सिख्या, जो तुस्सा री एस गल्ला जो समझणे मन्झ मदद करहा कि, जेबे तुस्से मसीह यीसू पर विस्वास करहे, ता परमेसर तुस्सा रा उद्धार करहा।

¹⁶पवित्र सास्त्रा रा सारा बचन परमेसरा री तरफा ले आ; लोका जो स्खाणे रे कठे, तिन्हों प्रुआचणे रे कठे, होर तिन्हारी गलती जो सुधारणे रे कठे, होर तिन्हा जो धर्मा रे काम करणा स्खाणे रे कठे ये बचन मदद आस्सा री करहा।

¹⁷ताकि परमेसरा रे लोक हर भले काम करणे रे कठे त्यार हुई जाये, होर सिद्ध बणी जाये।