Read Mandeali 2 तिमिथियुस 4 Bible Online

2 तिमिथियुस 4 - Mandeali bible

2 तिमिथियुस 4

¹जेबे मसीह यीसू राजेया साहीं राज करदे आऊंणा, तेबे तेस जिउंदेया रा होर मरिरे दुहीं रा न्याय करणा। होर इधी कठे परमेसर होर मसीह जो गुआह मनी किन्हें हांऊँ तुजो आदेस देआ,

²कि तू परमेसरा रे बचना रा प्रचार कर; होर चाहे हालात खरे हो या नी, तू बचना रा प्रचार करणे रे कठे त्यार रेह। अगर लोके गलती कितिरी ता तू तिन्हों दसी दे, होर तिन्हा जो तिन्हारे पाप करणे रे कठे प्रुआच होर तिन्हों होंसला भी दे। ये सभ काम तू ध्याना किन्हें स्खान्दे हुए बड़े सबरा किन्हें करेया।

³हांऊँ ये तुस्सा जो इधी कठे बोल्या करहा कि, एक टैम एह्ड़ा आऊंणा; कि लोका खरा उपदेस सुणना नी चाहणा, पर आपणी इच्छा जो पूरी करणे रे कठे एह्ड़े लोक तोपी किन्हें स्यों सुणना चाहें।

⁴तिन्हा सच्चाई नी सुणनीं, पर झूठी मन घड़ंत काह्णियां सुणनीं।

⁵हर हालात मन्झ आपणे आपा पर काबू रख चाहे कुछ भी हुई जाये, दुःख सहन कर, होर पूरी मेहनत करी किन्हें खुसी री खबर सभी लोका जो सुणा होर जो सेऊआ तुजो सौंपीरी तेता जो पूरी कर।

⁶हांऊँ ये आदेस तुजो इधी कठे देईं करहा, पर परमेसरा रे कठे मेरी जिन्दगी होर मेरा काम दुहें खत्म हूंणे वाले, क्यूंकि हांऊँ जाणहां कि मां बौह्त जल्दी दुनिया छाडी किन्हें चली जाणा।

⁷एक खरे स्पाही साहीं जो लड़ाई रे टैम कधी हिम्मत नी हारदा, मैं मसीह रे कामा जो पूरा करणे रे कठे बौह्त मेहनत कितिरी, होर मसीह पर मेरा विस्वास कधी नी बदली रा।

⁸प्रभुआ मुंजो से ताज देणा जो धार्मिकता रा ताज आ। से जो धर्मा किन्हें न्याय करहा, जेस ध्याड़े तेस दबारा वापस आऊंणा मुंजो ये इनाम देणा। तेस सिर्फ मुंजो ई नी, बल्की तिन्हा सभी जो भी देणा, जो सच्चे चाहे कि से दबारा वापस आई जाये।

⁹तू मेरे वाले जल्दी आऊणें री पूरी कोसिस कर।

¹⁰देमास भाई एस संसारा री चीजा किन्हें बौह्त प्यार रखा, इधी कठे तिन्हें हांऊँ छाडी दितेया, होर थिस्सलुनिके सैहरा जो चली गया। होर क्रेसक्रेंस भाई गलातिया ईलाके जो चली गया, होर तितुस भाई दलमातिया ईलाके जो चली गया।

¹¹ऐबे सिर्फ भाई लूका मेरे साउगी आ; जेबे तुस्सा आऊंणा ता मरकुस भाई जो आपणे साउगी लई किन्हें आया, क्यूंकि एथी से मेरी सेऊआ रे कठे बौह्त कामा रा आ।

¹²भाई तुखिकुस जो मैं इफिसुस सैहरा जो भेजी दितिरा।

¹³जेबे तुद आऊंणा ता से चोगा आपणे साउगी लेई आया, जो मैं त्रोआस सैहरा मन्झ करपुस भाई रे घरा छाडी आईरा था। मेरे स्यों कताबा भी लेई आया, खास कर से जो चामड़े री बणीरी।

¹⁴सिकंदर ठठेरे मुंजो हर तरहा रा दुःख दितिरा, प्रभुआ तेस जो तेसरे हर बुरे कामा री सजा देणी।

¹⁵तू भी तेस ले चतन्न रैंहयां, क्यूंकि तिन्हें मसीह रे बारे मन्झ आस्सा रे उपदेसा रा घोर व्रोध कितेया।

¹⁶एथी रोम सैहरा मन्झ पैहली बार जेबे हांऊँ न्यायधिसा रे साम्हणें आपणे खलाफ लगाई रे इल्जाम रे बारे मन्झ जबाब देंदा गया, तेबे मेरे पक्सा मन्झ बोलणे रे कठे कोई नी आया। एता रे बजाय तिन्हें सभीए हांऊँ छाडी दितेया। हांऊँ प्रार्थना करहा कि परमेसर तिन्हों एह्ड़ा करणे रे कठे माफ करहे।

¹⁷पर प्रभु मेरा मददगार रैहया, होर तिन्हें मुंजो सामर्थ दिती; ताकि हांऊँ तेस कच्हरी मन्झ बैठीरे सभी लोका जो मसीह रे बारे मन्झ खुसी री खबरा रा प्रचार करी सकेया, होर सभ तेस गैर-यहूदी लोक तेसरे प्रचारा जो सुणी सके। होर एस तरहा तिन्हें हांऊँ मरणे ले बचाई लेया जिहां एक भूखे सेरा रे मुंहा ले बचाया।

¹⁸होर प्रभुआ हांऊँ हर एक बुरे कामा ले बचाणा जो स्यों करहा ऐं, होर स्वर्गा मन्झ आपणे राजा मन्झ तेस हांऊँ सम्भाली किन्हें लई जाणा; तेसरी महिमा जुग-जुग हुन्दी रहे। आमीन।

¹⁹प्रिसकिल्ला होर तेस्सा रे लाड़े अक्विला जो, होर उनेसिफुरुसा भाई रे पुरे परिवारा जो मेरा नमस्कार।

²⁰इरास्तुस भाई ऐबे तक कुरिन्थुस सैहरा मन्झ आ, मैं त्रुफिमुस भाई जो मीलेतुस सैहरा मन्झ छाडी दितेया, क्यूंकि से ब्मार था।

²¹ठण्ड सुर्हू हूंणे ले पैहले तू मेरे वाले आऊणें री कोसिस करेया; यूबूलुस, पुन्देस, लीनुस, होर क्लौदिया भाईया, होर एथी रे सभ विस्वासी लोका रा तुजो नमस्कार।

²²हांऊँ प्रार्थना करहा कि प्रभु तेरे साउगी रहे, होर से तुजो आपणा अनुग्रह देंदा रहे।