Read Mandeali तितुस 2 Bible Online

तितुस 2 - Mandeali bible

तितुस 2

¹पर हे तितुस, तू आपणे विस्वासी लोका जो से ही गल्ला सखाया, जो यीसू मसीह रे सच्चे उपदेसा रे मताबक हो।

²खपरे आदमिया जो सखाया कि स्यों आपणे आपा पर काबू रखे होर तिन्हारा स्वभाव एह्ड़ा हो कि सब तिन्हारी इज्जत करहे, होर समझदारी किन्हें काम करणे वाले हो। परमेसरा पर मजबूत विस्वास करणे वाले, दूजेया किन्हें सच्चा प्यार करणे वाले होर सभ गल्ला मन्झ धीरज रखणे वाले हो।

³इंहां ही खपरी ज्नानिया रा स्वभाव भी पवित्र लोका साहीं हो। दूजेया जो बदनाम करणे वाली नी हो, होर ना सराबी नी हो; पर दूजेया जो खरा काम करणे रे कठे स्खाणे वाली हो।

⁴ताकि तिन्हारी जिन्दगी एक उदाहरण हो कि स्यों जुआन ज्नानिया जो सखाई सके कि, किहाँ आपणे लाड़े होर बच्चे किन्हें प्यार करहे।

⁵होर किहाँ आपणे आपा पर काबू रखी सके, होर पतिव्रता रहे किहाँ आपणे-आपणे घरा री देखभाल करहे, होर दूजेया पर दया करहे, होर आपणे-आपणे लाड़े रे अधीन रहे, ताकि कोई भी परमेसरा रे बचना री निंदा नी करहे।

⁶होर इंहां ही जुआना ले अर्ज करा कि स्यों आपणे आपा पर काबू रखी सके।

⁷होर हर गल्ला मन्झ आपणे भले कामा रा उदाहरण दे कि दूजे लोक भी तुस्सा जो देखी किन्हें आपणे आपा जो बदली दे, जेबे तू विस्वासी लोका जो परमेसरा रे बारे मन्झ सखाई करहा ता खरे मकसद साउगी सखा, जेता ले स्यों तुस्सा री इज्जत करहे।

⁸तू से ही सखा जो सच्च आ, होर जेसरा विरोध कोई नी करी सके, ताकि तुस्सा रे दुसमण सर्मिन्दा हुई जाये। क्यूंकि तिन्हा वाले तुस्सा रे बरखलाफ बुरा बोलणे रे कठे कुछ भी नी आ।

⁹आपणी कलीसिया रे गुलामा जो सखा कि, स्यों आपणे-आपणे माल्का रे अधीन रहे। होर जो कुछ करहे तेता मन्झ आपणे माल्का जो खुस रखे, होर पलटी किन्हें जवाब ना दे।

¹⁰चोरी, चलाकी नी करहे; पर एस गल्ला जो साबित करहे कि स्यों हमेसा ईमानदार ऐं, ताकि जो कुछ स्यों करहे लोक तिन्हारे खरे स्वभावा जो देखी किन्हें आस्सा रे उद्धारकर्ता परमेसरा रे उपदेसा रे बारे मन्झ सुणने री इच्छा करहे।

¹¹क्यूंकि परमेसरे आपणा अनुग्रह एस तरहा जाहिर कितिरा कि तिन्हें सारे माह्णुंआं जो बचाणे रे कठे एक रस्ता बणाईरा।

¹²एस अनुग्रहा ले परमेसर आस्सो सखा कि, आस्से संसारा री चीजा रे कठे इच्छा जो छाडी दे, होर परमेसरा जो खुस नी करणे वाली गल्ला जो करणा छाडी दे। एता रे बजाय ऐबे रे टैमा मन्झ परमेसरा जो खुस करणे वाली धार्मिक होर आपु पर काबू रखणे वाली जिन्दगी जीए।

¹³आस्से एह्ड़ा ही करदे रहे जेबे कि आस्से आपणे म्हान परमेसर होर उद्धारकर्ता यीसू मसीह जो आपणी महिमा साउगी एस संसारा मन्झ वापस आऊणें री आस करदे लगिरे।

¹⁴इन्हें यीसू मसीहे आपणे आपा जो आस्सा रे कठे बलिदान करी दितेया, ताकि आस्सा जो हर किस्मा रे पापा ले छुड़ाई ले; होर आस्सो सुद्ध करी दे ताकि आस्से तेसरे खास लोक बणी जाये जो खरे काम करणे री बड़ी इच्छा रखे।[1]

¹⁵इधी कठे हे तितुस, हांऊँ चाहां कि ये गल्ला जो मैं तेरे किन्हें कितिरी क्रेते टापू रे विस्वासी लोका जो सखा, तिन्हो हिम्मत दे कि स्यों इन्हा गल्ला जो इंहां ही करहे, होर जेथी जरूरत ई तिन्हो सुधारे, एह्ड़ा करणे रा तुजो पूरा हक आ। एस गल्ला जो पक्का करी ले कि जो तू सखा, तेता जो कोई बेकार नी जाणे।