Read Mandeali तितुस 3 Bible Online

तितुस 3 - Mandeali bible

तितुस 3

¹विस्वासी लोका जो याद दिलाया कर कि, हाकमा होर अधिकारिया री इज्जत करहा, होर तिन्हारे अधीन रेहा, होर दूजे कठे खरे काम करणे रे कठे त्यार रैहया।

²केसी जो बदनाम नी करहे; झगड़ा नी करहे; पर दूजेया पर दया करहे, होर सभ माह्णुंआं किन्हें बड़ी नम्रता साउगी रहे।

³क्यूंकि आस्से भी मसीह बणने ले पैहले नर्क्कले थे होर आस्से परमेसरा रा हुक्म नी मनदे थे, होर लोक आस्सो धोखा दे थे। आस्से आपणे आपा जो तिन्हा सब बुरे काम करणे ले नी रोकी सकदे थे, जिन्हों आस्से करणा चाहें थे होर जेस जो करी किन्हें आस्से बड़े खुस हुयें थे। आस्से आपणी जिन्दगी बैर-भाव करणे मन्झ होर दूजे लोका किन्हें हिर्खा रखणे मन्झ बिताहें थे, आस्से एह्ड़े लोक थे जिन्हा किन्हें लोक नफरत करहे थे, होर आस्से भी एक दूजे किन्हें नफरत रख्हा ऐं थे।

⁴पर फेरी भी आस्सा रे उद्धारकर्ता परमेसरे आस्सा माह्णुंआं पर दया होर प्यार जाहिर किती।

⁵तिन्हें आस्सा जो आस्सा री पापा री सजा ले बचाया; होर ये आस्सा रे धर्मा रे कामा री वजहा ले नी आ, पर इधी कठे कि तिन्हें आस्सा पर दया कितिरी। पवित्र आत्मा देई किन्हें तिन्हें आस्से बचाए, जिन्हें आस्सा रे पापा जो धोई किन्हें आस्सो एक नौंईं जिन्दगी दिती, होर जीणे रा एक नंऊँआं रस्ता दसेया।

⁶परमेसरे पवित्र आत्मा जो आस्सा रे अंदर अजादी होर भरपूरी किन्हें वास करणे जो भेजेया, होर ये एस कामा री वजहा ले हुआ जो आस्सा रे उद्धारकर्ता यीसू मसीहे आस्सा रे कठे कितेया।

⁷ताकि आस्से अनंत जिन्दगी पाणे री आस रखे, जेस जो देणे रा वादा परमेसरे आस्सो आपणे बच्चे हूंणे रे नाते कितिरा। होर आस्से एस गल्ला मन्झ पक्का हो कि परमेसरे आपणे अनुग्रहा ले आस्सो आपणी नजरा मन्झ धर्मी बणाईरा।

⁸ये जो कुछ मैं ऐबे तुस्सा जो लिखिरा ये भरोसे करणे रे लायक गल्ला ई, हांऊँ ये चाहां कि तू इन्हा गल्ला रे बारे मन्झ मजबूती किन्हें विस्वासी लोका जो सखा, इधी कठे कि जिन्हें लोके परमेसरा पर विस्वास कितिरा, स्यों आपणा ध्यान भले काम करणे रे मन्झ लगाई रखे। ये सखाईरी गल्ला सब लोका रे कठे खरी होर फायदेमंद ई।

⁹बन्सावली किन्हें जुड़ीरे विवाद, मूसा री व्यवस्था किन्हें जुड़ीरे रगड़े झगड़े होर मूर्खतापूर्ण मतभेदा री गल्ला मन्झ नी पया; क्यूंकि इन्हा बैहसा ले कोई फायदा नी आ, ये सभ बेकार ऐं।

¹⁰कलीसिया मन्झ जो आदमी फूट पाई किन्हें बंटवारा करहा, तेस जो घटा ले घट दो बारी चेतावनी देआ कि, से एह्ड़ा करणा बंद करी दे। तेता ले बाद तेस आदमी जो लेखे नी पाऊआ।

¹¹क्यूंकि तुस्से जाणहां ऐं कि एह्ड़ा आदमी जाणीबूझी किन्हें गलत रस्ते पर चली पईरा; होर तेसरे पापा रे काम ही तेस जो दोसी साबित करी करहे।

¹²हांऊँ अरतिमास या तुखिकुस तुस्सा वाले क्रेते टापू मन्झ भेजणा, होर जेबे से तेथी पूजे ता तू मेरे वाले निकुपुलिस सैहरा मन्झ आऊणें री कोसिस करेया; क्यूंकि मैं तेथी ई सर्दी काटणे रा फैसला करी लईरा।

¹³जेनास वकील होर अपुल्लोस जेबे तुस्सा वाले ले आपणा सफर सुर्हू करहे, ता तुस्सा ले जितना हुआ तितनी तुस्से तिन्हारी मदद करेया। एस गल्ला जो पक्का करी लेया कि सफरा रे कठे सारी जरूरता री चीजा तिन्हा वाले हाई की नी।

¹⁴इतना ही नी पर विस्वासी लोका जो ये भी स्खान्दे रैहया कि स्यों दूजेया री ज्रूरता जो पूरा करणे रे कठे खरे कामा मन्झ हमेसा लगे रैंहे। एह्ड़ा करणे ले तिन्हारी जिन्दगी बेकार नी हूणीं।

¹⁵होर सारे विस्वासी लोक जो मेरे साउगी एथी ऐं, स्यों तुस्सा जो नमस्कार बोल्हे। होर क्रेते टापू मन्झ रैहणे वाले आस्सा रे विस्वासी भाई बैहण, जो आस्सा किन्हें प्यार रख्हा ऐं, तिन्हा जो आस्सा रा नमस्कार। हांऊँ प्रार्थना करहा कि परमेसर तुस्सा सभी जो आपणा अनुग्रह देंदा रहे।