Read Mandeali फिलेमोन 1 Bible Online

फिलेमोन 1 - Mandeali bible

फिलेमोन 1

¹हांऊँ पौलुसा एस चिठ्ठी जो लिखी करहा। हांऊ जेल्हा मन्झ आ, क्यूंकि हांऊँ मसीह यीसू रे बारे मन्झ प्रचार करहा। मेरे होर आस्सा रे भाई तिमिथियुस री वखा ले तुस्सा जो नमस्कार। हे फिलेमोन, तू आस्सा रा लाडला दोस्त होर सहकर्मी आ। होर ये चिठ्ठी तेरे कठे ई।

²होर आस्सा री विस्वासी बैहण अफफिया, होर विस्वासी भाई अरखिप्पुस जो एक स्पाही साहीं प्रभु री सेऊआ करहा, होर जो कलीसिया तुस्सा रे घरा मन्झ कठी हुई तिन्हारे रे कठे भी हांऊँ ये चिठ्ठी लिख्दा लगीरा।

³हांऊँ प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

⁴जेबे भी हांऊँ तुस्सा रे कठे प्रार्थना करहा ता हांऊँ हमेसा तुस्सा रे कठे परमेसरा रा धन्यावाद करहा।

⁵लोके मुंजो दसेया कि तुस्से हमेसा प्रभु यीसू मसीह पर विस्वास रखे होर सभ परमेसरा रे पवित्र लोका किन्हें प्यार करहे।

⁶हांऊँ प्रार्थना करहा कि विस्वासी लोका किन्हें तुस्सा री संगती होर भी डुघ्ही हुन्दी जाये, ये जाणदे हुए कि परमेसरे आस्सो कुण-कुण खरी चीजा दितिरी। एह्ड़ा हूंणे ले मसीहा री महिमा हो।

⁷हे लाडले दोस्त, हांऊँ बौह्त खुस आ, होर मुंजो ये जाणी किन्हें बौह्त हिम्मत मिलीरी कि तू दूजे किन्हें प्यार करहा, होर ये भी तेरे ज्रीए परमेसरा रे पवित्र लोका भी हिम्मत पाएं।

⁸होर एस वजहा ले कि तू एक मसीह रा विस्वासी आ, हांऊँ चाहां की तू ठीक काम करहे। हांऊँ एक मसीह रा चुणिरा चेला हूंणे रे नाते तुस्सा जो ये आदेस देई सक्हा की तुस्से एह्ड़ा करो। पर मां सिर्फ तुस्सा किन्हें पूछणा ही, क्यूंकि हांऊँ जाणहां कि तुस्से मेरे किन्हें होर दूजे विस्वासी लोका किन्हें प्यार रखायें। हांऊँ पौलुस एक खपरा माह्णुं होर ऐबे एक कैदी आ, क्यूंकि मसीह यीसू री सेऊआ करहा। होर हांऊँ तुस्सा किन्हें अर्ज करहा।

¹⁰होर मेरी ये अर्ज उनेसिमुसा रे कठे ई जो मेरे मह्ठे साहीं आ। होर जेबे हांऊँ जेल्हा मन्झ था तेबे से मेरा आत्मिक मह्ठा बणेया।

¹¹पैहले ता से मेरे कोई कामा रा नी था, पर ऐबे से तेरे कठे होर मेरे कठे बड़े कामा रा आ।

¹²हालांकि उनेसिमुस मेरे दिला रा टुकड़ा आ, होर हांऊँ तेस जो तेरे वाले वापस भेज्या करहा।

¹³हांऊँ चाहां था कि तेस जो आपणी मददा रे कठे रखूं कि, से तुस्सा रे बदले मेरी सेऊआ करहे (हांऊँ जाणहां कि तू मेरी सेऊआ करणा चाहां), क्यूंकि हांऊँ ऐबे खुसी री खबरा रे प्रचारा री वजहा ले जेल्हा मन्झ आ।

¹⁴अगर तुस्से एस गल्ला रे कठे राजी नी हुईरे, ता हांऊँ तेस जो आपणे वाले नी रखेया करहा। हांऊँ चाहां कि तुस्से ये मदद मेरे बोलणे रे दबाब से नी पर खुसी किन्हें करो।

¹⁵क्यूंकि क्या जाणे कि परमेसरे उनेसिमुस जो कुछ टैमा रे कठे तुस्सा रे घरा ले भगाई दितेया, ताकि से मसीह पर विस्वास करहे; होर से हमेसा रे कठे तेरे वाले रही सके।

¹⁶पर ऐबे से सिर्फ तुस्सा रा सेऊआदारा ही नी हूंणा। बल्की से सेऊआदारा ले भी बढ़ी किन्हें आ, होर ऐबे से तुस्सा रा लाडला विस्वासी भाई आ, हांऊँ ता तेस किन्हें बौह्त प्यार करहा, पर तुस्सा जो होर भी ज्यादा प्यार करणा चहिए, क्यूंकि से तुस्सा रा सेऊआदार आ, होर इधी कठे भी कि से मसीह भाई आ।

¹⁷इधी कठे अगर तुस्से मुंजो आपणा सहभागी समझे ता जेबे उनेसिमूसा तुस्सा वाले आऊंणा ता तुस्से खुसी किन्हें तेसरा स्वागत करहा जेहड़ा तुस्से मेरा स्वागत करहे।

¹⁸होर अगर तिन्हें तेरा कुछ नुकसान कितिरा या केसी भी गल्ला मन्झ तेरा देणदार आ, ता मां तेसरा ये कर्जा तुआरी देणा।

¹⁹हांऊँ पौलुस आपणे ई हाथ ले एस गल्ला जो लिख्हा कि, मां तेसरा कर्जा आप्हुए भरी देणा। होर तुस्से जाणहां ये कि अगर हांऊँ तुस्सा री मदद नी करदा, ता तुस्सा जो आपणे आपा ले नईं जिन्दगी नी मिलिरी हुंदी, इधी कठे कि तेरी सारी जिन्दगी मेरी कर्जदार ई।

²⁰हे लाडले दोस्त, प्रभु री वजहा ले तेरी तरफा ले मुंजो ये मदद मिली जाए: क्यूंकि आस्से दुहें मसीह हूंणे री वजहा ले तू मुंजो हिम्मत दे।

²¹जेबे ये चिठ्ठी हांऊँ तुस्सा जो लिखी करहा मुंजो पक्का विस्वास आ कि जिहां मैं तुस्सा ले पूछीरा तुस्सा तेहड़ा ही करणा, बल्कि हांऊँ जाणहां कि तुध तेता ले बढ़ी किन्हें करणा।

²²होर तेरे ले एक होर अर्ज कि, तुस्सा रे घरा मन्झ मेरे कठे एक कमरा त्यार करी किन्हें रख्या, क्यूंकि मुंजो आस ई कि, परमेसरा तुस्सा री प्रार्थना रा जवाबा देणा होर मां जेल्हा ले छुटी किन्हें दबारा तुस्सा वाले आई किन्हें तुस्सा किन्हें मिलणा।

²³इपफ्रास री तरफा ले तुस्सा जो नमस्कार, से भी मसीह यीसू रे बारे मन्झ प्रचार करणे री वजहा ले मेरे साउगी जेल्हा मन्झ आ।

²⁴होर मरकुस, अरिस्तर्खुस, देमास होर लूका विस्वासी भाईया री तरफा ले तुस्सा जो नमस्कार, स्यो मेरे साउगी प्रभु रा काम करहा ऐं।

²⁵हांऊँ प्रार्थना करहा कि आस्सा रा प्रभु यीसू मसीह तुस्सा जो अनुग्रह देंदा रहे। आमीन।