Read Mandeali इब्रानियो 10 Bible Online

इब्रानियो 10 - Mandeali bible

इब्रानियो 10

¹मूसा री व्यवस्था ता, सिर्फ आऊणें वाली खरी चीजा री परछाई, आपणे आपा मन्झ यूँ चीजा असली नी ई। व्यवस्था री बिधिया रे मताबक बलिदान बार-बार होर हर साल लगातार चढ़ाए जाहें, पर बलिदाना चढ़ाणे वाल़ा एसरे ज्रीए कधी भी पूरी तरहा ले सुद्ध नी हो पाए।

²अगर स्यों सुद्ध हुई जांदे ता तिन्हारा बलिदाना रा चढ़ाया जाणा बन्द हुई जाणा था। क्यूंकि बलिदान करी किन्हें अराधना करणे वाले लोका एक ई बारी जुग-जुग रे कठे सुद्ध हुई जाणा था, होर स्यों लोक आपणे आपु जो पापा रे कठे दोसी नी मनदे।

³एता रे बजाय हर साल स्यों बलिदान करहे ता बलिदान करणे री वजहा ले तिन्हा जो आपणे पाप याद आई जाहें थे।

⁴क्यूंकि बकरे होर बोल्ह्द रे खूना ले पाप दूर हुई जाए ये सम्भव नी आ।

⁵इधी कठे जेबे मसीह एस दुनिया मन्झ आया ता तिन्हें परमेसरा किन्हें बोल्या था, “तैं बलिदान होर कोई भेंट नी चाही, पर मुंजो एक सरीर बलिदान करणे रे कठे दितेया।

⁶तू ना ता वेदी पर पूरी तरहा ले फुखी रे जानवरा[14] ले होर ना पाप जो दूर करणे रे कठे कितिरे बलिदाना[15] ले खुस हुआ।

⁷तेबे मसीह बोल्या, ‘हे परमेसर, हांऊँ तेरी इच्छा जो पूरी करणे रे कठे आई गईरा, होर पवित्र सास्त्रा मन्झ मेरे बारे मन्झ ये ही लिखिरा।’”

⁸पैहले तिन्हें बोल्हा कि, “तुस्से ना ता कोई बलिदान चाहेया होर ना कोई भेंट चाही, होर ना वेदी पर पूरी तरहा ले फुखी रे जानवरा रा बलिदान चाहां, होर ना पाप जो दूर करणे रे कठे कितिरे बलिदान चाहां, होर ना तिन्हा ले खुस हुआ,” हलांकि ये बलिदान ता मूसा री व्यवस्था रे मताबक चढ़ाए जाहें।

⁹फेरी से ये भी बोल्हा, “कि देख, हांऊँ तेरी इच्छा जो पूरी करणे रे कठे आई गईरा,” तेबे परमेसरे पैहली व्यवस्था रे मताबक बलिदान करणे जो रद्द करी दितेया, ताकि से मसीह रे बलिदान जो स्थापित करी सके।

¹⁰परमेसरा री इच्छा ये थी कि यीसू मसीह रे बलिदाना रे ज्रीए जो एक ई बारी जुग-जुग रे कठे हुआ, आस्सो पवित्र करहे।

¹¹पैहली वाचा रे मताबक हर एक याजक ता बेदी रे साम्हणें खड़े हुई किन्हें हर रोज सेऊआ करहा, होर से बार-बार एक ई किस्मा रे बलिदान चढ़ाहां जो पापा जो कधी दूर नी करी सकदे।

¹²पर मसीह जो आस्सा रा बडा याजक आ, तिन्हें परमेसरा रे साम्हणें आपणे आपा जो एक ई बार हमेसा रे कठे पापा रे कठे बलिदान करी दितेया, होर तेबे से परमेसरा रे सीधे पासे जाई बैठया।

¹³होर तेस टैमा ले ई मसीह जो ये इंतजार आ कि, परमेसरा तेसरे सभ दुस्मण पूरी तरहा हराई देणे।

¹⁴तिन्हें एक ई बलिदाना रे ज्रीए लोक पवित्र किते, होर फेरी स्यों हमेसा रे कठे सिद्ध बणाई दिते।

¹⁵होर पवित्र आत्मा भी एस गल्ला री गुआही देहां कि, ये गल सच्च ई। क्यूंकि तिन्हें पैहले बोलिरा था कि, प्रभु बोल्हा,

¹⁶“जो नौंईं वाचा मां आऊणें वाले ध्याड़े मन्झ, तिन्हा साउगी बान्हणी, से येई कि मां आपणी व्यवस्था तिन्हो याद कुराणी, होर आपणी व्यवस्था तिन्हारे मना मन्झ पाई देणी।”

¹⁷फेरी से ये भी बोल्हा कि, “मां तिन्हारे पाप होर तिन्हारे अधर्मा रे काम फेरी कधी दबारा याद नी करणे।”[16]

¹⁸फेरी जेबे इन्हा पापा री माफी हुई गई, ता फेरी पापा रे बलिदान करणे री जरूरत नी रही।

¹⁹इधी कठे हे भाईयो होर बैहणो, ऐबे आस्से यीसू मसीह रे खूना रे ज्रीए बड़ी हिम्मता किन्हें परमेसरा रे नेडे जाई सके, जिहां कि तम्बू रे बड़े पवित्रजगहा मन्झ दाखल हूंणे री ईजाजत मिली गईरी।

²⁰यीसूए आस्सा रे कठे मरणे रे ज्रीए यानि तेस पर्दे रे ज्रीए जिन्दगी देणे वाल़ा एक नंऊँआं पैंडा खोलेया, जेस ले हुई किन्हें आस्से बड़े पवित्रजगहा मन्झ पूजी सके।

²¹होर इधी कठे कि आस्सा रा एह्ड़ा बडा याजक आ, जो परमेसरा रे तम्बू रा अधिकारी आ।

²²ता आऊआ, आस्से खरे मना होर पुरे विस्वासा साउगी, होर एस भरोसे साउगी कि आस्सा रे पाप माफ हुई गये, होर मसीह रे खूना रे छिड़काऊ ले आपणे दिला जो सुद्ध करदे हुए, होर आपणे सरीरा जो सुद्ध पाणी किन्हें धोई किन्हें परमेसरा रे नेडे जाहें।[17]

²³आस्से आपणी आसा रे बारे मन्झ गुआही देणे रे कठे मजबूत होर टिकीरे रहे, क्यूंकि परमेसरे आस्सा किन्हें वादा कितिरा, होर से भरोसे रे लायक आ।

²⁴आस्से एस गल्ला रा ध्यान रखे कि आस्से एक दूजे किन्हें प्यार करणे रे कठे होर खरे कामा करणे रे कठे एक दूजे जो हिम्मत दे।

²⁵होर एक दूजे साउगी संगती करणा नी छाडा, जिहां कि कईया जो मण्डली मन्झ नी आऊणें री आदत पई गईरी। एता रे बजाय पर एक दूजे जो होर भी हिम्मत देंदे रैहया, क्यूंकि तुस्से जाणांहे कि प्रभु जल्दी वापस आऊणें वाल़ा।

²⁶क्यूंकि मसीह री सच्चाई जो जाणने रे बाद अगर आस्से जाणी बुझी किन्हें पाप करहा ऐं, तेबे इन्हा पापा री माफी रे कठे कोई बलिदान बाकि नी आ।

²⁷हां फेरी ता सिर्फ परमेसरा रा न्याय होर भयानक आगा रा सेक जो परमेसरा रे व्रोधीयो भस्म करी देईं, इन्हा गल्ला रा इंतजार हाल्ले बाकि आ।

²⁸जो कोई मूसा री व्यवस्था जो नी मनदे थे, तेस पर बगैर दया कितिरे दो या तीन लोका री गुआही पर मारी दितेया जाहाँ।[18]

²⁹ता सोची लऊआ कि तिन्हा लोका जो कितनी ज्यादा सजा मिलणी, जिन्हें परमेसरा रे मह्ठे जो पैरा थाले रौंदया, होर परमेसरा री वाचा रा खूना जो बेकार समझ्या; जेस खूना रे ज्रीए पाप सुद्ध किते जाहें। होर जिन्हें पवित्र आत्मा री बेज्जती किती, जो आस्सो अनुग्रह देईं।

³⁰क्यूंकि आस्से तेस परमेसरा जो जाणहां ऐं, जिन्हें बोल्या कि, “बदला लैणा मेरा काम आ, मां ईं बदला लेणा।” तिन्हें ये भी बोल्या कि, “प्रभुआ आपणे लोका रा न्याय करणा।”

³¹जिऊन्दे परमेसरा रे हाथा मन्झ पऊणा बडी खतरनाक गल ई।

³²पर तिन्हा ध्याड़े जो याद करा, जेबे तुस्से पैहली बारी मसीह पर विस्वास कितिरा था, होर तेता ले बाद तुस्से बौह्त दुःखा रा साम्हणां कितेया, होर भारी पीड़ा मन्झ मजबूत रहे।

³³कधी-कधी लोके सभिरे साम्हणें तुस्सा री बेज्जती किती, होर तुस्सा किन्हें हाथा-पाई किती, होर तुस्से कधी-कधी दूजेया री मदद किती जो तुस्सा साहीं दुखा मन्झ थे।

³⁴तुस्से कैदिया रे दुःखा मन्झ दु:खी हुए। होर जेबे होरी लोके तुस्सा रा सारा धन लुटेया, तेबे तुस्से इन्हा गल्ला जो खुसी किन्हें सहेया। क्यूंकि तुस्से जाणांहे थे कि तेता ले भी बांकी चीजा तुस्सा जो मिलणी जो जुग-जुग रे कठे ई।

³⁵इधी कठे आपणी हिम्मत नी हारा, क्यूंकि हिम्मत नी हारने वाल़ेया जो परमेसर बौह्त बडा इनाम देणा।

³⁶क्यूंकि तुस्सा जो सबर रखणा जरूरी ई, ताकि तुस्से परमेसरा री इच्छा जो पूरी करी सके। तेबे परमेसरा तुस्सा जो से सब कुछ देणा जेता रा देणे रा वादा तिन्हें तुस्सा किन्हें कितिरा।

³⁷क्यूंकि जिहां पवित्र सास्त्रा मन्झ मसीह रे बारे लिखिरा कि, “ऐबे थोह्ड़ा ई टैम रही गईरा, जेबे कि आऊणें वाले आई जाणा, होर देर नी करणी।

³⁸पर मेरे धर्मी लोका मेरे पर विस्वास करणे ले ही जिऊन्दे रैंह्णां, होर अगर स्यों मेरे पर विस्वास करणे ले पीछे हटी जाए, ता हांऊँ तिन्हा ले खुस नी हुंदा।”

³⁹होर आस्से एह्ड़े नी ऐं जो परमेसरा पर विस्वासा करणे ले पीछे हटी जाहें होर नास हुई जाये, पर परमेसरा पर विस्वास करणे वाले ऐं, जिन्हों से बचाई लेया।