Read Mandeali इब्रानियो 3 Bible Online

इब्रानियो 3 - Mandeali bible

इब्रानियो 3

¹इधी कठे हे विस्वासी भाई बैहणो, तुस्से परमेसरा रे, क्यूंकि तिन्हें तुस्से स्वर्गा री जिन्दगी मन्झ साझी हूंणे रे कठे सादिरे। तेस मसीह यीसू पर ध्यान देआ जेस जो आस्से मन्ना ऐं होर जेस जो परमेसरा री खुसी री खबरा रे कठे परमेसरा रा दूत होर बडा याजक रे रूपा मन्झ भेजीरा।

²जिहां परमेसरा रे परिवारा रे लोका री सेऊआ करणे मन्झ मूसा सच्चा था, तिहां ईं यीसू भी सेऊआ करणे मन्झ परमेसरा रे प्रति सच्चा था जिन्हें तेजो नियुक्त कितिरा था।

³घरा रा बनाणे वाल़ा घरा ले बढ़ी किन्हें आदर पांहा। इंहां यीसू मूसा री तुलना मन्झ बौह्त आदरा रे लायक आ।

⁴क्यूंकि हर एक घरा रा कोई ना कोई बनाणे वाल़ा हुंहाँ, पर परमेसर से आ जिन्हें सारी चीजा बणाई।

⁵मूसा ता परमेसरा रे परिवारा रे लोका मन्झ सेऊआदार साहीं सच्चा रैंह्यां कि, से तिन्हा गल्ला जो करी सके जिन्हों परमेसर भविष्य मन्झ जाहिर करणे वाल़ा था।

⁶पर मसीह एक मह्ठे साहीं परमेसरा रे परिवारा रे लोका मन्झ सच्चा आ, अगर आस्से आपणी हिम्मता होर तेस आस मन्झ विस्वासा मन्झ मजबूत रहे ता आस्से आपु ही तेसरे परिवारा रे लोक ऐं।

⁷ता जिहां पवित्र आत्मा पवित्र सास्त्रा मन्झ बोल्हा, “अगर आज तुस्से परमेसरा री अवाज सुणघे;

⁸ता तुस्से जिद्दी देख्या बणदे, जिहां कि तुस्सा रे बापदादे जंगला मन्झ आपणी परखणी करदे टैमा परमेसरा किन्हें विद्रोह कितेया।

⁹जेथी तुस्सा रे बापदादे चाली साला तक मेरे महान कामा जो देखणे रे बाद भी, चुनौती देंदे हुए मुंजो परखिरा था।

¹⁰एस वजहा ले हांऊँ तेस टैमा रे लोका साउगी गुस्सा रैंहयां, होर बोल्या कि, स्यों हमेसा मेरे ले दूर चली जाएं, होर तिन्हें मेरे हुक्म नी मन्हें।

¹¹तेबे मैं गुस्से मन्झ आई किन्हें कसम खाध्ही कि, ‘तिन्हा तेस देसा मन्झ दाखल नी हूंणा जेथी तिन्हो हांऊँ अराम देआ।’”

¹²हे भाईयो होर बैहणो, चतन्न रैहया, ताकि तुस्सा मन्झ ले केसी रा मन बुरा होर अविस्वासी नी हो, जो जिउंदे परमेसरा ले तुस्सा जो दूर करी दे।

¹³बल्की जेबे भी पवित्र सास्त्रा तुस्सा किन्हें ये बोले कि, आज रा ध्याड़े, तेबे तुस्सा एक दूजेया जो हर ध्याड़े तक होंसला देंदे रैहया, ताकि तुस्सा मन्झा ले कोई भी पापा रे धोखे मन्झ आई किन्हें परमेसरा रे बरखलाफ जिद्दी ना बणा।

¹⁴जो विस्वास आस्सा रा मसीह जो अपनाणे टैमा मन्झ था, अगर आखरी ध्याड़े तक हिम्मता साउगी आस्से आपणे तेस विस्वासा मन्झ बणी रैहन्गे, ता तेबे आस्सा मसीह साउगी साझी बणी जाणा।

¹⁵तिहां ही जिहां पवित्र सास्त्रा मन्झ लिखिरा, “अगर आज तुस्से परमेसरा री अवाज सुणघे, ता तुस्से जिद्दी देख्या बणदे, जिहां कि तुस्सा रे बापदादे जंगला मन्झ परमेसरा किन्हें विद्रोह कितेया।”

¹⁶भला स्यों कुण लोक थे जिन्हें परमेसरा री अवाजा जो सुणी किन्हें भी तेस जो मनणे ले नांह करी दिति? क्या स्यों ये लोक नी थे जिन्हा जो मूसे मिस्र देसा ले बाहर काढेया था?

¹⁷होर परमेसर चाली साला तक किन्हा लोका किन्हें गुस्सा रैंहयां? तिन्हा इस्राएल रे लोका ले, जिन्हें पाप कितेया, होर जंगला मन्झ मरी गये।

¹⁸होर परमेसरे किन्हा लोका साउगी कसम खाध्ही कि तिन्हा तेस देसा मन्झ दाखल नी हूंणा जेथी मां तिन्हो अराम देणा? से सच्चे तिन्हा लोका रे बारे मन्झ दसेया करहा जिन्हें जे हुक्म नी मन्या?

¹⁹एस तरहा आस्से जाणी गये कि, तिन्हा लोका विस्वास नी करणे री वजहा ले तेस अराम री जगहा मन्झ दाखल नी करी पाए।