Read Mandeali इब्रानियो 4 Bible Online

इब्रानियो 4 - Mandeali bible

इब्रानियो 4

¹इधी कठे तेसरे अरामा री जगहा मन्झ दाखल हूंणे रा वादा आज भी आस्सा वाले हाया, ता आस्सा जो एस बारे मन्झ होर भी ध्यान रखणा चहिए। एह्ड़ा नी हो कि, तुस्सा मन्झा ले कोई जन तेस अरामा री जगहा मन्झ दाखल हूणें बगैर रही जाए जेसरा वादा परमेसरे कितिरा।

²क्यूंकि जिहां आस्से मसीह रे बारे मन्झ खरी खबर सुणी, तिहां ही इस्राएला रे लोके से अरामा री जगहा री खरी खबर सुणी, पर तिन्हें विस्वास नी कितेया। इधी कठे तेस खबरा ले तिन्हो कोई फायदा नी हुआ।

³इधी कठे आस्से परमेसरा री बोलिरी गल्ला पर विस्वास कितेया तेबे आस्सा अरामा री जगहा मन्झ दाखल हुंहाँ ऐं, जिहां परमेसरे दूजेया रे कठे बोल्या कि, “मैं गुस्से मन्झ कसम खाध्ही, कि तिन्हा मेरे अरामा री जगहा मन्झ दाखल नी हूंणा।” परमेसरे ये नी बोल्या कि अरामा री जगहा हाल्ले त्यार नी, पर से संसारा रचणे रे टैमा ले ही त्यार हुई गईरी थी।

⁴क्यूंकि सात्वे ध्याड़े रे बारे मन्झ परमेसरे एह्ड़ा बोल्या कि, “परमेसरे सात्वे ध्याड़े आपणे सभ काम काज निपटाई किन्हें अराम कितेया।”

⁵होर आस्से पढ़े कि बादा मन्झ तिन्हें ये भी बोल्या कि, “तिन्हा मेरे अरामा री जगहा मन्झ दाखल नी करी पाणा।”

⁶होर इस्राएला रे लोक जिन्हें सभी ले पैहले ये खुसी री खबर सुणी, स्यों अराम री जगहा मन्झ दाखल नी हुई पाए, क्यूंकि तिन्हें परमेसरा रे हुक्म नी मन्नेया, पर बाकिया रे कठे अराम रे जगहा रा रस्ता हल्ली तक खुलिरा।

⁷इधी कठे परमेसरे आपणे अरामा री जगहा मन्झ दबारा दाखल हूंणे रे कठे एक खास ध्याड़ा नियुक्त कितेया, होर से टैम आ “आज।” आस्सा रे बापदादेया रे विद्रोह करणे रे कई साल्ला बाद, परमेसरे राजा दाऊदा रे ज्रीए एस ध्याड़े रे बारे मन्झ दबारा तेस ही पवित्र सास्त्र रे बचना रे ज्रीए बोल्या, जेस मन्झ ले पैहले भी बोली गईरा था कि, “अगर आज तुस्से परमेसरा री अवाज सुणघे, ता तुस्से जिद्दी देख्या बणदे।”

⁸होर आस्से ये भी जाणांहे कि अराम री जगहा कनान देस नी, जेथी यहोसू आस्सा रे बापदादेया जो लई गईरा था। क्यूंकि अगर ये कनान रा देस हुंदा ता परमेसरे कुछ टैमा बाद ये नी बोल्या हुंदा कि एक होर टैम आ।

⁹इधी कठे जाणी लऊआ कि परमेसरा रे लोका रे कठे एक जगहा त्यार ई, जेथी स्यों पूरा अराम लेई सके। जिहां परमेसरे सातुहें ध्याड़े अराम कितेया, तिहां तिन्हा भी अराम करणा।

¹⁰परमेसरे आपणा काम पूरा करी किन्हें अराम कितेया था। हर कोई जो परमेसरा वाले अराम करदे जाहाँ, तिन्हा लोका भी आपणे कामा जो पूरा करणे रे बाद अराम पाणा।

¹¹इधी कठे आस्से भी तेस अराम री जगहा मन्झ दाखल हूंणे कठे कड़ी मेहनत करिए। एह्ड़ा नी हो कि कोई भी तिन्हा लोका साहीं परमेसरा रे हुक्म ना मनणे री वजहा ले तेस अराम री जगहा मन्झ दाखल हूंणे ले रही जाए।

¹²क्यूंकि परमेसरा रा बचन जिउंदा होर प्रबल आ। से हर एक दोधारी तलवारा ले ज्यादा पैना आ। से आत्मा होर प्राण, होर गांठ-गांठ, होर गुदे-गुदे तक डूगघा छेद पां। से मना री भावना होर विचारा जो परखी लेहां।

¹³परमेसरा ले कुछ भी लुख्ही रा नी आ, बल्की आस्सा जो तेजो आपणे सारे कामा रा लेखा देणा पो। तेसरे साम्हणें सभ चीजा खुल्ही होर जाहिर ई।

¹⁴परमेसरा रा मह्ठा यीसू, जो आस्सा सभीरा बडा याजक आ, स्वर्गा मन्झ परमेसरा वाले चली गया। इधी कठे जेस विस्वासा रा अंगीकार आस्से सभी रे साम्हणें कितिरा था, एता जो नी छाडी किन्हें आस्से मजबूत किन्हें खड़ीरे रहे।

¹⁵क्यूंकि आस्सा रा बडा याजक यीसू मसीह, आस्सा री कमजोरिया जो समझी जाहाँ। सैताने हर गल्ला मन्झ से आस्सा साहीं परखेया, तेबे भी तिन्हें पाप नी कितेया।

¹⁶इधी कठे आऊआ, आस्से हिम्मत करी किन्हें अनुग्रहा देणे वाले परमेसरा री राजगद्दी रे साम्हणें आये। तेबे परमेसरा आस्सा जो दया होर अनुग्रह देणा होर ज्रूरत रे टैमा आस्सा री मदद करणी।