Read Mandeali इब्रानियो 5 Bible Online

इब्रानियो 5 - Mandeali bible

इब्रानियो 5

¹परमेसरे हर बडा याजक जो इस्राएला रे लोका रे मन्झ ले चुणेया। लोका री वखा ले परमेसरा री सेऊआ करणे रे कठे से नियुक्त कितेया कि, से पापा री माफी रे कठे भेंट होर बलि चढ़ाये।

²क्यूंकि से आपु भी कई सारी चीजा मन्झ कमजोरिया रे अधीन आ, इधी कठे से नासमझ, होर भूले भटके साउगी नर्मी किन्हें पेस आई सक्हा।

³होर एक बडा याजक हुंदे हुए तेस जो आपणे पापा रे कठे होर तिहां ईं लोका रे पापा रे कठे बलिया चढ़ाणी चहिए।

⁴होर बडा याजक हूंणे रे आदर जो कोई आपणे आपु नी लेई सकदा। कोई भी माह्णुं तेबे तक बडा याजक नी बणी सकदा जेबे तक हारूना जो पैहला बडा याजक था, जेस साहीं परमेसरा तेजो नियुक्त नी करदा।

⁵तिहां ईं मसीहे भी बडा याजक बणने रे आदरा जो आपणे आप नी लितेया, पर परमेसरे तेस जो ये बोली किन्हें नियुक्त कितेया जो तिन्हें केसी होरी बडे याजका किन्हें नी बोल्या, जो भजन संगीतकारे पवित्र सास्त्रा मन्झ बोल्या, “तू मेरा मह्ठा आ, आज हांऊँ तुजो आपणे मह्ठे रे रूपा मन्झ जाहिर करहा।”

⁶दूजी जगहा मन्झ परमेसरे दबारा तेस किन्हें बोल्या, “जिहां मलिकिसिदक [1] एक याजक रा काम करहा था तिहां ही तुध सदा रे कठे याजक बणी रेहणा।”

⁷जेबे यीसू एस संसारा मन्झ जिउंदा था, परमेसर जो तेस जो मौता ते बचाई सक्हा था, उची अवाजा किन्हें जोरा-जोरा किन्हें रोई-रोई किन्हें तिन्हें तेस ले प्रार्थना होर अर्ज कितिरी थी होर बड़े आदर होर आपणे आपा जो परमेसरा जो सौंपणे री वजहा ले परमेसरे तेस जो जबाब दितेया।

⁸यीसू मसीह परमेसरा रा मह्ठा हूणें पर भी, तिन्हें दुःख सहन करी किन्हें हुक्म मनणा सीखी लेया कि परमेसर तेस ले क्या चाहां।

⁹होर सिद्ध बणने पर, तेसरे हुक्म मनणे वाले सभ लोका रे कठे से जुग-जुग रे कठे उद्धारा री वजहा बणी गया।

¹⁰होर तेस जो परमेसरा री वखा ले मलिकिसिदका साहीं बडे याजका रा काम करणे री पदवी मिली।

¹¹एता रे बारे मन्झ आस्सा वाले बोलणे जो बौह्त सारी गल्ला ई, जिन्हारा समझणा भी कठण आ; क्यूंकि तुस्से परमेसरा रे बचन जाणने रे बारे मन्झ आलसी हुई गईरे।

¹²सच्चे एस टैमा तक ता तुस्सा जो गुरु बणी जाणा चहिए था। पर तुस्सा जो ता ऐबे भी एह्ड़े माह्णुं री जरूरत जो तुस्सा जो नंऊँऐं तरीके ले परमेसरा रे उपदेसा री सुर्हू री गल्ला स्खाये। तुस्सा जो हाल्ले बच्चे साहीं दूध ही चहिए, क्यूंकि तुस्से नाजा रा खाणा नी खाई सकदे।

¹³क्यूंकि दूध पिणे वाले परमेसरा रे उपदेसा री गल्ला जो नी जाणदे, जो आस्सो सखा कि परमेसरा रे नजरा मन्झ किहाँ धर्मी बणना। क्यूंकि हाल्ले से बच्चा ई आ।

¹⁴पर नाजा रा खाणा विस्वासा मन्झ स्याणेया रे कठे आ, जिन्हें आपणे अनुभवा ले भले बुरे मन्झ फर्क करणा सीखी लईरा।