Read Mandeali इब्रानियो 8 Bible Online

इब्रानियो 8 - Mandeali bible

इब्रानियो 8

¹ऐबे जो गल्ला आस्से बोल्या करहा ऐं, तिन्हा मन्झा ले सभी ले बडी गल्ल येई कि, आस्सा वाले एह्ड़ा ही बडा याजक आ, जो स्वर्गा मन्झ तेस म्हान परमेसरा री राजगद्दी री सीधी वखा जो बैठी गया।

²होर आस्सा रा बडा याजक सच्चे तम्बू रे बड़े पवित्रजगहा मन्झ सेऊआ करहा जेह्ड़ा स्वर्गा मन्झ आ, जो परमेसरे बणाईरा ना कि केसी माह्णुं ऐ, बल्की प्रभुए खड़ा कितरा।

³क्यूंकि हर एक बडा याजक जो इधी कठे नियुक्त कितेया जाहाँ ताकि से पापा री माफी रे कठे, भेंट होर बलिदान चढ़ाए। इधी कठे एस बडे याजका यीसू रे कठे भी ये जरूरी था कि, तेस वाले भी कुछ चढ़ाणे रे कठे हो।

⁴होर अगर मसीह संसारा मन्झ हुन्दा ता से कधी याजक नी हुन्दा, क्यूंकि संसारा मन्झ मूसा री व्यवस्था रे मताबक दान चढ़ाणे रे कठे पैहले ले ही याजक लोक हाए।

⁵जो काम ये याजक लोक करहे स्यों स्वर्गा री चीजा रे प्रतिरूप होर परछाई ऐं, पर हुबहू तेहड़ा नी जेहड़ा स्वर्गा मन्झ आ। क्यूंकि जेबे मूसा तम्बू बणान्दे जांदा लगिरा था, तेस ई टैम परमेसरे तेजो चेतावनी दिति कि, “तू हर चीज ठीक तिहां ई बणाया जो तुजो प्हाड़ा पर दस्सीरा था।”

⁶पर जो याजका री सेऊआ रा काम आस्सा रे बडे याजक यीसू जो मिल्या, से होरी याजका री सेऊआ ले बढ़ी किन्हें आ। क्यूंकि से होर भी खरी वाचा रा बिचौलिया, जो पुराणी वाचा ले भी खरी ई होर खरी चीजा री वाचा पर आधारित ई।

⁷क्यूंकि अगर पैहली वाचा मन्झ कमिया नी थी, ता दूजी वाचा रे कठे कोई जरूरत नी थी।

⁸पर परमेसरे लोका पर दोस ल्गाई किन्हें बोल्या, “देखा स्यों ध्याड़े आया करहा ऐं, कि मां इस्राएल देसा रे लोका साउगी, होर यहूदा रे गोत्रा रे लोका साउगी[2], नौंईं वाचा बान्हणी।

⁹ये वाचा तेस वाचा साहीं नी हूणी, जो मैं तिन्हारे बापदादेया साउगी तेस टैम बान्ही थी, जेबे मैं मिस्र देसा ले स्यों काढी किन्हें ल्यांदे, क्यूंकि स्यों मेरी बान्हिरी वाचा पर टिकी नी रहे, होर मैं तिन्हा ले मुंह फेरी लितेया, प्रभु एह्ड़ा ई बोल्हा।

¹⁰फेरी प्रभु बोल्हा, क्यूंकि येई से वाचा ई, जो वाचा मां आऊणें वाले ध्याड़े ले बाद इस्राएला रे घराने साउगी बान्हणी; से येई कि कि मां आपणी व्यवस्था तिन्हो याद कुराणी, होर तिन्हा स्यों गल्ला आपणे दिला मन्झ रखणी, होर मां तिन्हारा परमेसरा बणना, होर तिन्हा मेरे लोक हूंणा।

¹¹फेरी कधी भी कोई भी इस्राएल रे लोका आपणे देस वाल़ेया जो, होर आपणे रिस्तेदारा जो ये नी सिखाणा, कि तुस्से प्रभु जो मन्ना, क्यूंकि छोटे लोका ले बड़े लोका तक सभिया मन्नी लेणा कि हांऊँ तिन्हारा परमेसर आ।

¹²क्यूंकि मां तिन्हारे पाप माफ करी देणे, होर मां तिन्हारे पाप दबारा याद नी करणे।”

¹³प्रभु एस वाचा जो नौंईं वाचा मन्ना होर पैहली वाली वाचा जो पुराणी ठैहरा। होर जो चीज पुराणी हुई जाहीं से फीकी पई जाहीं होर तिन्हा नी रैहणा।