Read Mandeali याकूब 2 Bible Online

याकूब 2 - Mandeali bible

याकूब 2

¹हे भाईयो होर बैहणो, तुस्से आस्सा रे महिमामय प्रभु यीसू मसीह रे चेले, इधी कठे भेदभाव री भावना ले दूर रेहा।

²उदाहरणा कठे अगर एक आदमी सोने री गुठी होर मैहंगे कपड़े पैन्ही किन्हें तुस्सा री मंडली मन्झ आये होर एक गरीब भी मैले कुचैले कपड़े पैन्ही किन्हें तुस्सा री मंडली मन्झ आये।

³होर तुस्से तेस मैहंगे कपड़े वाले जो ज्यादा इज्जत देई किन्हें बोलो कि, “तुस्से तेथी खरी जगहा मन्झ बैठा,” होर तेस गरीबा किन्हें बोले कि, “तू जाई किन्हें तेथी खड़ी रह,” या “मेरे पैरा वाले थाले बैठी जा।”

⁴ता क्या तुस्से आपु मन्झ भेदभाव नी कितेया होर बुरे सोचा किन्हें न्याय करणे वाले नी बणे?

⁵हे लाडले भाईयो होर बैहणो, सुणा; परमेसरे एस संसारा रे गरीबा जो नी चुणिरा कि विस्वासा मन्झ अमीर होर तेस राज्या रे वारस हो, जेसरा देणे रा वादा परमेसरे तिन्हा कठे कितिरा, जेह्ड़े परमेसरा किन्हें प्यार करहे।

⁶पर तुस्से तेस गरीबा री बेज्जती किती। तुस्से जाणांहे की अमीर लोक ही तुस्सा पर अत्याचार करहे, होर स्यों ही तुस्सा जो कच्हरी मन्झ घसीटी किन्हें लई जाहें।

⁷होर स्यों अमीर लोक प्रभु यीसू रे बांके नांऊँआं री जो तुस्सा जो दितिरा, तेस नांऊँआं री निंदा करहा ऐं।

⁸तेबे भी अगर तुस्से पवित्र सास्त्रा रे बचना रे मुताबक, “आपणे पड़ोसी किन्हें आपु साहीं प्यार रख्हा ऐं,” ता सच्चे तुस्से मूसा रे व्यवस्था रा खास हुक्म जो पूरी करहा ऐं, होर तुस्से खरा करहा ऐं।

⁹पर अगर तुस्से भेदभाव करहा ऐं, ता पाप करहा; होर मूसा री व्यवस्था तुस्सा जो दोसी बणाहीं।

¹⁰क्यूंकि जो कोई पूरी मूसा री व्यवस्था रा पालन करहा, पर एक भी हुकमा जो टाल्ली देआ ऐ, ता से सभ गल्ला मन्झ दोसी बणी जां।

¹¹इधी कठे कि जिन्हें ये बोल्या कि, “तू व्यभिचार नी करणा” तिन्हें ई ये भी बोल्या कि, “तू हत्या नी करणा,” इधी कठे कि तैं अगर व्यभिचार नी कितेया, पर हत्या किती तेबे भी तू मूसा री व्यवस्था रा टालणे वाल़ा बणेया।

¹²तुस्से तिन्हा लोका साहीं दया किन्हें बोला होर काम भी करा, जिन्हारा न्याय तेस व्यवस्था रे मताबक हूंणा जिन्हें आस्से जो अजाद कितिरा।

¹³क्यूंकि जिन्हें दया नी किती, तेसरा न्याय बगैर दया किन्हें हूंणां। अगर तुस्से दूजेया पर दया करघे ता परमेसरा भी न्याया रे ध्याड़े तुस्सा पर दया करणी।

¹⁴हे भाईयो होर बैहणो, अगर कोई बोल्हा कि हांऊँ प्रभु यीसू पर विस्वास करहा पर दूजेया रे कठे कोई भला काम नी करदा हो, ता एह्ड़े विस्वासा रा क्या फायदा? क्या एह्ड़ा विस्वास कधी केसी रा उद्धार करी सक्हा?

¹⁵अगर केसी भाई या बैहणा वाले कपड़े नी हो, होर तिन्हा जो हर ध्याड़े खाणे पीणे री कमी हो,

¹⁶होर तुस्सा मन्झा ले कोई तिन्हा किन्हें बोले, “सुख-सांति किन्हें जाऊआ, तुस्से गर्म-गर्म कपड़े पैहना होर पेट भरी किन्हें खाऊआ पिऊआ,” पर जो चीजा सरीरा रे कठे जरूरी ई से तुस्से तिन्हा जो नी दे, ता क्या फायदा?

¹⁷तिहां ईं अगर विस्वासा करणे वाल़ा भला काम नी करहे ता तेसरा विस्वास मरीरा।

¹⁸पर कोई बोले कि, “कुछ लोका जो विस्वास आ पर कुछ लोका रे भले काम ऐं।” पर हांऊँ तुस्सा किन्हें बोल्हा, “तू आपणा विस्वास मुंजो बगैर भले कामा ले साबित कर; होर मां तुजो आपणा विस्वास भले कामा साउगी साबित करणा।”

¹⁹तुजो विस्वास आ कि एक ई परमेसर आ; तू खरा करहा; दुस्टात्मा भी विस्वास करहा ई, होर थर-थर काम्हा ई।

²⁰पर हे नर्क्कले माह्णुं! क्या तू ये भी नी जाणदा कि, बगैर भले कामा ले विस्वास बेकार आ?

²¹जेबे आस्सा रे बापदादे अब्राहमे आपणा मह्ठा इसहाक बेदी पर चढ़ाया, ता एसरे एस भले कामा ले परमेसरे से धर्मी ठैहराया।

²²तैं देखी लया कि तेसरे विस्वासे कामा साउगी मिली किन्हें असर कितेया होर भले कामा रे ज्रीए तेसरा विस्वास सिद्ध हुआ।

²³होर पवित्र सास्त्रा रा ये बचन पूरा हुआ कि, “अब्राहमे परमेसरा रे वादे पर विस्वास कितेया, इधी कठे परमेसरे से आपणी नजरा मन्झ धर्मी माह्णुं बणाया,” होर येथी तक से परमेसरा रा दोस्त बोल्या गया।

²⁴इधी कठे तैं देखी लया कि माह्णुं सिर्फ विस्वासा ले ई नी, पर आपणे भले कामा ले भी धर्मी माह्णुं मन्नेया जां।

²⁵तिहां ईं वेस्या राहाबे भी जेबे तेस्से दूता जो आपणे घरा मन्झ ठैहराया, होर दूजे पैंडे ले विदा करी दितेया, ता से भी तेस्सा रे भले कामा ले धर्मी जन्नानी मनी गई।

²⁶इधी कठे, जिहां सरीर बगैर आत्मा ले मरीरा आ, तिहां ई विस्वास भी बगैर भले कामा ले मरीरा आ।