Read Mandeali याकूब 4 Bible Online

याकूब 4 - Mandeali bible

याकूब 4

¹तुस्सा मन्झ लड़ाईया होर झगड़े केथी ले आई गये? ये गल्ला तिन्हा बुरी इच्छा ले आहूँआं जो तुस्सा रे अंदर लड़दे रैहया ऐ।

²एह्ड़ी चीजा ई जिन्हा जो पाणे री तुस्से बौह्त इच्छा रख्हा ऐं, पर तुस्सा जो स्यों चीजा नी मिल्दी; इधी कठे तुस्से हत्या करहा ऐं। जो चीजा होरी वाले ई तिन्हा चीजा जो पाणे री इच्छा ले तुस्से लड़दे झगड़दे रैंहयां ऐं पर तुस्सा जो नी मिल्दी। जो कुछ तुस्सा जो चहिए से तुस्सा जो इधी कठे नी मिल्दा कि, तुस्से परमेसरा ले नी मांगदे।

³हलांकि तुस्से मांघ्हा ऐं फेरी भी तुस्सा जो नी मिलदा, क्यूंकि तुस्से बुरी इच्छा ले मांघ्हा ऐं, ताकि आपणी अभिलासा जो पूरी करी सको।

⁴हे व्यभिचारीया साहीं धोखा देणे वाले लोको, क्या तुस्से नी जाणदी कि, संसारा री चीज़ा किन्हें दोस्ती करणी परमेसरा किन्हें दुस्मणी रखणा आ? इधी कठे जो कोई संसारा किन्हें दोस्ती रखणा चाहां, से आपणे आपा जो परमेसरा रा दुस्मण बणाहां।

⁵या क्या तुस्से ये सोच्हा ऐं कि, पवित्र सास्त्र बेकार ई ये सभ कुछ बोल्हा? “परमेसरे आस्सा री आत्मा बणाईरी, इधी कठे से चांहा कि आस्से सिर्फ तेस जो प्यार करहे, जिहां एक लाड़ा जल्नी करहा कि तेसरी लाड़ी सिर्फ तेस किन्हें ही प्यार करहे”

⁶पर परमेसर ता होर ज्यादा अनुग्रह देहां कि आस्से इन्हा बुरी इच्छा ले दूर रहे। जिहां पवित्र सास्त्रा मन्झ लिखिरा कि, “परमेसर बडयाई करणे वाल़ेया रा ता विरोध करहा, पर नम्र दीना पर अनुग्रह करहा।”

⁷इधी कठे परमेसरा रे अधीन हुई जाओ; होर सैताना रा विरोध करा, ता तेस तुस्सा वाले ले भगी जाणा।

⁸परमेसरा रे नेडे आऊआ; ता तेस भी तुस्सा रे नेडे आऊंणा; हे पापियो, आपणी जिंदगी ले पापा जो दूर करहा; होर ये दोगले लोको आपणे दिला जो पवित्र करा।

⁹दुःखी हुई जाऊआ क्यूंकि तुस्से पाप कितिरा, होर मातम मणाऊआ होर रोआ, तुस्सा री हासी मातमा मन्झ होर तुस्सा री खुसी दुआसी मन्झ बदली जाए।

¹⁰प्रभु रे साम्हणें नम्र दीन बणा, ता तेस तुस्से उचे उठाणे।

¹¹हे भाईयो होर बैहणो, एक दूजे री बदनामी नी करा, जो आपणे भाई री बदनामी करहा, या भाई पर दोस ल्गाहां, से मूसा री व्यवस्था री बदनामी करहा, ता से मूसा री व्यवस्था पर दोस ल्गाहां, तेबे तुस्से मूसा री व्यवस्था पर चलणे वाल़ा नी, पर तुस्से तेस व्यवस्था रे न्यायी बणिरे।

¹²मूसा री व्यवस्था देणे वाल़ा होर न्याय करणे वाल़ा एक ई आ, से परमेसर आ, जेस जो बचाणे होर नास करणे री सामर्थ ई; ता आपणे पड़ोसी रा न्याय करणे वाले तू कुणहां?

¹³तुस्से जो ये बोल्हा ऐं कि, “आज या काल आस्सा केसी होरी सैहरा मन्झ जाई किन्हें तेथी एक साल बिताणा, होर काम धंधा करी किन्हें पैसा कमाणा।”

¹⁴पर तुस्से ये नी जाणदे कि काला क्या हूंणां? सुणी ता लऊआ, तुस्सा री जिन्दगी हाई ई क्या? तुस्से ता धुंधा साहीं ऐं, जो थोह्ड़ी देर सुझ्हा ई, फेरी गायब हुई जाहीं।

¹⁵एता रे बदले तुस्सा जो ये बोलणा चहिए कि, “अगर प्रभु चाहे ता आस्सा जिउंदे रैंह्णां, होर ये या से काम भी करणा।”

¹⁶पर ऐबे तुस्से आपणे आऊणें वाल़ा काला रे बारे मन्झ सोच विचार करी किन्हें बडयाई करहा ऐं; होर एह्ड़ी बडयाई करणा पापा ले बुरा हुंहाँ।

¹⁷इधी कठे जो भलाई करणा जाणहां होर नी करदा, तेसरे कठे ये पाप आ।